ព័ត៌មានអន្ដរជាតិ

មេដឹកនាំតៃវ៉ាន់ ឆ្លើយតប ក្រោយចិនគំរាមកាត់ទោសប្រហារជីវិតជនផ្ដាច់ខ្លួន

បានផុស

៧ នាទី មុន

នៅ

ថ្ងៃចន្ទ ២៤ មិថុនា ២០២៤

ដោយ

លោក Lai Ching-te ប្រធានាធិបតីតៃវ៉ាន់ បានប្រកាសនៅថ្ងៃទី២៤ ខែមិថុនានេះ ថា ចិនគ្មានសិទ្ធិអ្វីនោះទេ ដែលអាចមកដាក់ទោសប្រជាជនតៃវ៉ាន់។ នេះគឺជាការឆ្លើយតបរបស់លោក Lai បន្ទាប់ពីរដ្ឋាភិបាលក្រុងប៉េកាំង បានប្រកាសពីច្បាប់ថ្មីគំរាមកាត់ទោសប្រហារជីវិតលើជនផ្ដាច់ខ្លួននិយមតៃវ៉ាន់។

លោក Lai Ching-te ប្រធានាធិបតីតៃវ៉ាន់ (រូបភាព៖ AP)

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

មេដឹកនាំតៃវ៉ាន់ បាននិយាយថា ប្រជាធិបតេយ្យមិនមែនជាទោសឧក្រិដ្ឋកម្មទេ តែអ្វីដែលគួរឲ្យខ្លាចបំផុតគឺ អត្តាធិបតេយ្យរបស់ចិនទៅវិញ។ លោក Lai បានបន្តថា ចិនគ្មានឯណានូវសិទ្ធិអំណាចអាចដាក់ទោសឆ្លងដែនលើប្រជាជនតៃវ៉ាន់ជាដាច់ខាត។

លោក បានបញ្ជាក់ទៀតថា ទំនាក់ទំនងរវាងតៃវ៉ាន់ និងចិន មិនអាចល្អប្រសើរឡើងឡើយ លុះត្រាណាតែចិនទទួលស្គាល់វត្តមានរបស់តៃវ៉ាន់។ ទន្ទឹមនោះ លោកក៏បានឆ្លៀតប្រកាសពីបំណងចង់ធ្វើកិច្ចចរចាសន្តិភាពជាមួយរដ្ឋាភិបាលក្រុងប៉េកាំងផងដែរ។

សូមបញ្ជាក់ថា ចាប់តាំងពីការឈ្នះឆ្នោតរបស់លោក Lai កាលពីខែមករា ឆ្នាំ២០២៤មក ភាពតានតឹងរវាងតៃវ៉ាន់ និងចិន បានកើនឡើងមួយកម្រិតទៀតគួរឲ្យកត់សម្គាល់ ដោយយោធាចិនតែងតែបង្កើនសកម្មភាពរបស់ខ្លួនជានិច្ចនៅជុំវិញកោះតៃវ៉ាន់។ តួយ៉ាងដូចជាកាលពីថ្ងៃព្រហស្បតិ៍ ដល់ថ្ងៃអាទិត្យសប្ដាហ៍មុន តៃវ៉ាន់បានអង្កេតការណ៍ឃើញមាន យន្តហោះចម្បាំងរបស់ចិនចំនួន ១១៥គ្រឿងបានហោះមកក្បែរកោះតៃវ៉ាន់ ហើយខ្លះបានហោះមកកៀកខ្លាំងត្រឹម ៥៧គីឡូម៉ែត្រប៉ុណ្ណោះពីភាគត្បូងក្រុងតៃប៉ិ។

បន្ថែមពីនេះ កាលពីថ្ងៃទី២១ ខែមិថុនា ឆ្នាំ២០២៤ រដ្ឋាភិបាលក្រុងប៉េកាំង បានប្រកាសពីចំណាត់ការដ៏ធ្ងន់ធ្ងរមួយ ពាក់ព័ន្ធនឹងសកម្មភាពផ្ដាច់ខ្លួននិយមរបស់តៃវ៉ាន់។ ចិន ថា សកម្មភាពផ្ដាច់ខ្លួននិយមរបស់តៃវ៉ាន់ គឺជាទោសឧក្រិដ្ឋ ហើយគំរាមដាក់ទោសធ្ងន់ធ្ងរបំផុតគឺ ការព្យួរ ក ប្រហារជីវិត។

ក្រោយការប្រកាសច្បាប់នេះ តៃវ៉ាន់បានព្រមានប្រជាជនខ្លួនឲ្យប្រុងប្រយ័ត្ន នៅរាល់ពេលចាកចេញទៅក្រៅប្រទេស ជាពិសេសគឺប្រទេសដែលមានកិច្ចព្រមព្រៀងបត្យាប័នជាមួយចិន៕

ដោយ៖ ឈាង