ឆេះរោងចក្រអាគុយនៅកូរ៉េខាងត្បូង ស្លាប់មនុស្ស ២០នាក់

តាមការចុះផ្សាយរបស់សារព័ត៌មាន Yonhap នៅថ្ងៃចន្ទទី២៤ខែមិថុនា, អគ្គិភ័យយ៉ាងសន្ធោសន្ធៅបានឆាបឆេះរោងចក្រអាគុយ Aricell ក្នុងទីក្រុង Hwaseong នៃប្រទេសកូរ៉េខាងត្បូង ដោយបណ្តាលឲ្យមនុស្សចំនួន២០នាក់បាត់បង់ជីវិត។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ទោះបីជាយ៉ាងណាក៏ដោយ អាជ្ញាធរមូលដ្ឋានជឿថា តួលេខមនុស្សស្លាប់អាចកើនឡើងបន្ថែមទៀតព្រោះ ពេលអគ្គិភ័យចាប់ផ្តើម មានកម្មករប្រមាណ១០០នាក់ កំពុងធ្វើការនៅខាងក្នុង ខណៈពេលនេះ នៅមានមនុស្សមួយចំនួន មិនទាន់រកឃើញនៅឡើយ។

ទន្ទឹមនោះ មូលហេតុនៃការឆេះ ក៏មិនទាន់ត្រូវបានគេដឹងច្បាស់ដែរ ប៉ុន្តែក្រុមមន្ត្រីនិយាយថា សាក្សីឃើញផ្ទាល់ភ្នែក បានឮសំឡេងផ្ទុះខ្លាំងនៅជាន់ទី២ មុនពេលអគ្គិភ័យឆាបឆេះ។

សូមបញ្ជាក់ថា កូរ៉េខាងត្បូង គឺជាប្រទេសផលិតអាគុយដ៏ធំមួយលើពិភពលោក ខណៈបច្ចុប្បន្ននេះ អាគុយត្រូវបានប្រើប្រាស់ជាទូទៅក្នុងឧបករណ៍ជាច្រើនដូចជា កុំព្យូទ័រយួរដៃ និងរថយន្តអគ្គិសនីជាដើម។

យ៉ាងណាក្តី អាគុយប្រភេទនេះ ងាយបង្កហានិភ័យនៃការឆាបឆេះនិងផ្ទុះណាស់ ដល់ថ្នាក់ក្រុមហ៊ុនអាកាសចរណ៍ទាំងឡាយ ដាក់បទប្បញ្ញត្តិយ៉ាងតឹងរ៉ឹងលើការត្រួតពិនិត្យឧបករណ៍ដោយប្រើថ្មប្រភេទនេះទៀតផង៕

អត្ថបទ៖ សុខ សុវណ្ណ

ចុចអាន៖ សមត្ថកិច្ចប្រើពេលជិត១២ម៉ោងដើម្បីគ្រប់គ្រងអគ្គិភ័យឆេះឃ្លាំងស្តុកបារីនៅខណ្ឌដង្កោ