ព័ត៌មានអន្ដរជាតិ

ប្រធានាធិបតីប៉ូឡូញ សង្ឃឹមថា ចិនអាចជួយនាំសន្តិភាពឲ្យអ៊ុយក្រែន

បានផុស

៨ ខែ មុន

នៅ

ថ្ងៃអង្គារ ២៥ មិថុនា ២០២៤

ដោយ

Chheang

អំឡុងទស្សនកិច្ចនៅក្រុងប៉េកាំង កាលពីថ្ងៃចន្ទទី២៤ ខែមិថុនាកន្លងទៅ លោក Andrzej Duda ប្រធានាធិបតីប៉ូឡូញ បានបង្ហាញក្ដីសង្ឃឹមថា ចិននឹងអាចជួយស្វែងរកដំណោះស្រាយសន្តិភាពឲ្យប្រទេសអ៊ុយក្រែន ដើម្បីបិទបញ្ចប់ជម្លោះរវាងក្រុងមូស្គូ និងក្រុងកៀវ។

លោក ស៊ី ជីនពីង ប្រធានាធិបតីចិន និងលោក Andrzej Duda ប្រធានាធិបតីប៉ូឡូញ (រូបភាព៖ KPRP)

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោក Duda បានប្រាប់ថា ក្នុងទស្សនៈរបស់លោកចំពោះស្ថានភាពសន្តិសុខនៅអឺរ៉ុប ក៏ដូចជានៅលើពិភពលោកទាំងមូល លោករំពឹងថា ចិននឹងខំប្រឹងប្រែងជួយរកសន្តិភាពឲ្យអ៊ុយក្រែនបាន ដោយផ្អែកតាមគោលការណ៍ច្បាប់អន្តរជាតិ និងការកំណត់ព្រំដែនរបស់អ៊ុយក្រែន ដែលត្រូវបានទទួលស្គាល់ជាសកល។ ជាការឆ្លើយតប លោក ស៊ី ជីនពីង មេដឹកនាំចិន បានបញ្ជាក់ថា ចិនគាំទ្រនូវកិច្ចប្រឹងប្រែងទាំងអស់ ក្នុងការពន្លត់ភ្លើងសង្គ្រាមរុស្ស៊ី-អ៊ុយក្រែន ដោយសន្តិវិធី។ លោក បន្ថែមថា ចិននឹងបន្តដើរតួនាទីជាអ្នកស្វែងរកដំណោះស្រាយនយោបាយទៅលើបញ្ហាទាំងនោះ។

សូមបញ្ជាក់ថា ចិន និងរុស្ស៊ី បានប្រកាសពីភាពជាដៃគូគ្មានដែនកំណត់រវាងសម្ព័ន្ធមិត្តទាំង២ ប៉ុន្មានថ្ងៃមុនលោក វ៉្លាឌឺមៀរ ពូទីន មេដឹកនំារុស្ស៊ី បានបញ្ជាឲ្យបើកការវាយប្រហារទ្រង់ទ្រង់ធំឈ្លានពានអ៊ុយក្រែន កាលពីខែកុម្ភៈ ឆ្នាំ២០២២។ យ៉ាងណាមិញ ចិន បានអះអាងថា ខ្លួនមិនជាប់ពាក់ព័ន្ធនឹងជម្លោះប្រដាប់អាវុធនេះឡើយ ដោយរដ្ឋាភិបាលក្រុងប៉េកាំងមានភាពអព្យាក្រឹត្យ ឈរនៅកណ្ដាល។ មួយវិញទៀត ចិន ក៏បានសង្កត់ធ្ងន់ដែរថា ខ្លួនមិនបានផ្គត់ផ្គង់គ្រឿងសព្វាវុធឲ្យក្រុងមូស្គូ យកទៅប្រើប្រាស់ឈ្លានពានអ៊ុយក្រែននោះទេ៕

ដោយ៖ ឈាង