ព័ត៌មានអន្ដរជាតិ

ថៃ ត្រៀមបញ្ជូនពលករទៅអ៊ីស្រាអែលវិញ ទោះសង្គ្រាមនៅទីនោះមិនទាន់ចប់

បានផុស

៦ ខែ មុន

នៅ

ថ្ងៃអង្គារ ២៥ មិថុនា ២០២៤

ដោយ

Chheang

ការបញ្ជូនពលករផ្នែកកសិកម្មរបស់ថៃទៅកាន់ប្រទេសអ៊ីស្រាអែល នឹងត្រូវចាប់ផ្ដើមធ្វើឡើងវិញហើយ បន្ទាប់ពីផ្អាកអស់រយៈពេលជាង៨ខែកន្លងមក ក្រោយផ្ទុះមានសង្គ្រាមរវាងក្រុមហាម៉ាស និងយោធាអ៊ីស្រាអែល។ នេះបើយោងតាមការប្រកាសរបស់ក្រសួងការងារថៃ កាលពីថ្ងៃទី២៤ ខែមិថុនា។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

បើតាមគម្រោង ថៃនឹងត្រៀមបញ្ជូនពលករផ្នែកកសិកម្មទៅអ៊ីស្រាអែលឲ្យបាន ១ម៉ឺននាក់ រហូតដល់បំណាច់ឆ្នាំ២០២៤។ ក្រុមដំបូង មានគ្នា១០០នាក់ នឹងហោះចេញទៅអ៊ីស្រាអែល នៅថ្ងៃអង្គារទី២៥ នេះ ខណៈដែលក្រុមបន្ទាប់ នឹងធ្វើដំណើរ នាដើមខែកក្កដាខាងមុខ។

ក្រសួងការងារថៃ បានប្រកាសថា រដ្ឋាភិបាលបានស្នើសុំកិច្ចសហប្រតិបត្តិការជាមួយអ៊ីស្រាអែលរួចមកហើយ ដើម្បីឲ្យនិយោជកជួយយកចិត្តទុកមើលថែក្រុមពលករចំណាកស្រុករបស់ថៃ។

ប្រជាជនថៃជាច្រើន ជាពិសេសអ្នកនៅតាមតំបន់ជនបទភាគឦសានប្រទេស មានបំណងចង់ស្វែងរកការងារធ្វើនៅក្នុងប្រទេសអ៊ីស្រាអែល ក៏ព្រោះតែនៅទីនោះអាចទទួលបានប្រាក់កម្រៃខ្ពស់ សម្រាប់ដោះបំណុល ដែលការជំពាក់បំណុលនេះគឺជាបញ្ហាសេដ្ឋកិច្ចលំដាប់ថ្នាក់ទី២ចំពោះមនុស្សរាប់លាននាក់នៅអាស៊ីអាគ្នេយ៍។

បើតាមការចុះផ្សាយរបស់សារព័ត៌មាន BBC កាលពីខែតុលា ឆ្នាំ២០២៣កន្លងទៅ, ពលករថៃចាប់ផ្ដើមធ្វើចំណាកស្រុកទៅកាន់ប្រទេសអ៊ីស្រាអែល តាំងពីអំឡុងទសវត្សរ៍ឆ្នាំ១៩៨០មកម៉្លេះ មុនកិច្ចព្រមព្រៀងជាផ្លូវការរវាងរដ្ឋាភិបាលប្រទេសទាំង២ កាលពីឆ្នាំ២០១១ទៅទៀត។ សព្វថ្ងៃ កម្រៃប្រចាំខែរបស់ពលករថៃនៅអ៊ីស្រាអែល អាចទទួលបានចន្លោះពី ២១០០ដុល្លារ ដល់ជាង ៣២០០ដុល្លារ។ ក្រុមពលករថៃ បានអះអាងថា កម្រៃប៉ុណ្ណឹងគឺច្រើនជាងការរកចំណូលនៅប្រទេសកំណើតពួកគេដល់ទៅ ៧ ឬ ៨ដងឯណោះ។

សូមបញ្ជាក់ថា ពេលសង្គ្រាមរវាងអ៊ីស្រាអែល និងហាម៉ាស ផ្ទុះឡើងកាលពីថ្ងៃទី៧ ខែតុលា ឆ្នាំ២០២៣ ក្នុងចំណោមពលករថៃចំនួន ៣ម៉ឺននាក់ មាន ៣៩នាក់ ត្រូវបានសម្លាប់ និង ៣២នាក់ផ្សេងទៀត ត្រូវបានចាប់ជាចំណាប់ខ្មាំងដោយក្រុមហាម៉ាស យកទៅតំបន់ហ្គាហ្សា។ បើតាមរដ្ឋាភិបាលថៃ បានឲ្យដឹងថា បច្ចុប្បន្ន នៅមានចំណាប់ខ្មាំងថៃប្រមាណជា ៦នាក់ទៀត នៅមិនទាន់ត្រូវបានដោះលែងដោយក្រុមហាម៉ាសនៅឡើយទេ៕

ដោយ៖ ឈាង

Related Topics: