ព័ត៌មានអន្ដរជាតិ

ម្តាយសិង្ហបុរី ជះទឹកក្តៅដាក់កូន៤នាក់ ព្រោះសង្ស័យថា លួចលុយ

បានផុស

២៦ វិនាទី មុន

នៅ

ថ្ងៃពុធ ២៦ មិថុនា ២០២៤

ដោយ

បង្ហាញខ្លួនក្នុងតុលាការ, ម្ដាយសិង្ហបុរីវ័យ៣៣ឆ្នាំ បានសារភាពថា ពិតជាជះទឹកក្ដៅដាក់កូនៗបួននាក់មែន ព្រោះសង្ស័យថា មានកូនម្នាក់លួចលុយរបស់នាង។ នេះបើយោងតាមការចេញផ្សាយរបស់សារពត៌មាន CNA កាលពីថ្ងៃទី ២៥ ខែមិថុនា។

តាមពិតទៅ បទល្មើសនេះកើតឡើងតាំងតែពីខែកក្កដា ឆ្នាំ ២០២២ មកម្ល៉េះ ខណៈកាលនោះ កូនៗមានអាយុ ៨ឆ្នាំ, ៩ឆ្នាំ, ១០ឆ្នាំ និង១១ឆ្នាំ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ស្ត្រីដែលគេមិនបញ្ចេញឈ្មោះរូបនេះ ត្រូវបានរកឃើញថាមានទោស៤ករណីចំពោះការប្រព្រឹត្តមិនត្រឹមត្រូវលើកុមារ ហើយកំពុងត្រៀមខ្លួនទទួលទោស។

តាមដំណើររឿង, នៅព្រឹកថ្ងៃទី ២ ខែកក្កដា ឆ្នាំ ២០២២ ស្រ្តីជាម្តាយ បានឲ្យកូនស្រីច្បងយកលុយ ២០ដុល្លារសិង្ហបុរី ស្មើនឹង ១៤.៧០ដុល្លារ ពីកាបូប ទៅទិញនំប៉័ងសម្រាប់អាហារពេលព្រឹក ប៉ុន្តែក្មេងស្រីប្រាប់ម្តាយថា ក្នុងកាបូបមានលុយត្រឹម៥ ដុល្លារសិង្ហបុរីប៉ុណ្ណោះ។ ស្ត្រីនោះភ្ញាក់ផ្អើលខ្លាំងនិងក្តីចិត្ត ព្រោះនាងដឹងថា លុយនៅសល់ពីយប់ដល់ទៅ ៦០ដុល្លារសិង្ហបុរីឯណោះ ទើបនាងសង្ស័យថា ពិតជាមានកូនណាម្នាក់លួចហើយ ព្រោះកូនៗធ្លាប់មានប្រវត្តិលួចលុយម្តងហើយ។ នាងក៏ប្រើឲ្យពួកគេដើររកលុយ និងគំរាមចាក់ទឹកក្តៅលើពួកគេ បើរកមិនឃើញ។

ទីបំផុត ម្តាយក៏បានចាក់ទឹកក្ដៅលើកូនៗដែលកំពុងរកលុយក្នុងបន្ទប់គេង ហើយទាមទារឲ្យពួកគេប្រគល់លុយមកវិញ តែក្មេងៗនៅតែបដិសេធលួចលុយ។ នាងនៅតែបន្តជះទឹកក្ដៅឧណ្ហៗលើពួកគេ ហើយថែមទាំងវាយពួកគេម្នាក់ម្ដងៗទៀតផង។

ពេលក្មេងៗឈប់រកលុយនិងរៀបចំទៅសាលា ស្ត្រីនោះបានសម្គាល់ឃើញកូនប្រុសអាយុ៩ឆ្នាំមានស្នាមរលាកលើខ្លួន ។នាងបានពិនិត្យមើលកូនផ្សេងទៀត ហើយបានដឹងថាពួកគេមានរបួសស្រដៀងគ្នា។នាងចាប់ផ្ដើមយំ ហើយលាបប្រេងថ្នាំលើពួកគេ ខណៈរថយន្តសង្គ្រោះបន្ទាន់ត្រូវបានហៅមកជាបន្តបន្ទាប់។

បើយោងតាមឯកសាររបស់តុលាការបានរៀបរាប់លម្អិតពីរបួសលើកុមារតែម្នាក់ប៉ុណ្ណោះគឺកុមារីអាយុ១០ឆ្នាំដែលជាកូនទីពីរ។ កុមារីម្នាក់នេះបានរលាកផ្នែកខាងក្រៅដែលមានសភាពរលាកជាង ១០ ភាគរយនៃរាងកាយរបស់នាង រួមទាំងដៃឆ្វេង ពោះ និងភ្លៅ និងបានទទួលការព្យាបាល និងរុំមុខរបួស ។ក្មេងស្រីនេះត្រូវបានពិនិត្យចុងក្រោយក្នុងខែតុលា ឆ្នាំ ២០២២ ដោយនាយកដ្ឋានវះកាត់កែសម្ផស្ស និងសោភ័ណភាពនៃមន្ទីរពេទ្យ KK Women’s and Children’s Hospital ដែលមានស្លាកស្នាមទំហំប្រហែល ២cm គុណនឹង ១cm នៅលើដៃខាងឆ្វេងរបស់នាង ។

គួរបញ្ជាក់ថាមេធាវីរបស់ជនល្មើសបានអះអាងថាកូនក្តីរបស់គាត់បានចិញ្ចឹមកូនទាំង៤នាក់តែម្នាក់ឯង បន្ទាប់ពីបានលែងលះប្ដី និងមានជំងឺបាក់ទឹកចិត្តជាប់រហូត។ស្ត្រីរូបនេះបានខិតខំប្រឹងប្រែងស្វែងរកជំនួយពីភ្នាក់ងារសង្គម ដើម្បីលើកកម្ពស់ខ្លួនឯង និងមើលថែកូន។ ទោះកូនៗស្រលាញ់ម្តាយ ហើយចង់ជួបជុំជាមួយម្ដាយវិញ ប៉ុន្តែការចោទប្រកាន់បច្ចុប្បន្ននេះបានធ្វើឲ្យក្មេងៗទាំងនោះត្រូវបំបែកពីម្តាយ ហើយត្រូវបានដាក់ឲ្យនៅផ្ទះដាច់ដោយឡែកពីគ្នា៕