ព័ត៌មានអន្ដរជាតិ

ពលករថៃ បង្ខំចិត្តវិលទៅអ៊ីស្រាអែលវិញ ទោះទីនោះកំពុងមានសង្គ្រាម

បានផុស

១១ នាទី មុន

នៅ

ថ្ងៃពុធ ២៦ មិថុនា ២០២៤

ដោយ

តាមការចុះផ្សាយរបស់ Bangkok Post, ពលករថៃក្រុមទី១ មានគ្នា ៩៤នាក់ បានវិលត្រឡប់ទៅប្រទេសអ៊ីស្រាអែលវិញហើយកាលពីថ្ងៃអង្គារទី២៥ខែមិថុនាឆ្នាំ២០២៤ ទោះសង្គ្រាមនៅទីនោះ ហាក់មិនទាន់ធូរស្រាលខ្លាំងក៏ដោយ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ពលករដែលត្រូវវិលត្រឡប់ទៅវិញនេះ ក៏បង្ហាញក្តីបារម្ភអំពីសុវត្ថិភាពរបស់ពួកគេដែរ ប៉ុន្តែយ៉ាងណា ត្រូវតែបង្ខំចិត្តដើម្បីជីវភាពគ្រួសារ ហើយមិនត្រឹមតែព្រួយបារម្ភពីការប្រយុទ្ធគ្នានៅអ៊ីស្រាអែលនិងតំបន់ហ្គាហ្សាប៉ុណ្ណោះទេ ប៉ុន្តែអាកាសធាតុ ក៏ចោទជាបញ្ហាប្រឈមសម្រាប់ពលករថៃដែរ។

ប្រទេសថៃ បានផ្អាកផ្តល់កម្លាំងពលកម្មដល់អ៊ីស្រាអែល ចាប់តាំងពីការវាយប្រហាររបស់ក្រុមហាម៉ាសកាលពីថ្ងៃទី៧ខែតុលាឆ្នាំមុន ដែលក្នុងនោះមានជនជាតិថៃយ៉ាងតិច ៤១នាក់ត្រូវបានសម្លាប់ និងក្រោយមកប្រហែល ៧ ០០០នាក់ត្រូវបានជម្លៀសចេញ។

សូមបញ្ជាក់ថា ដើម្បីបំពេញតាមកូតាដែលផ្តល់ដោយអាជ្ញាធរទីក្រុងហ្ស៊េរុយសាឡិម, ក្រសួងការងារថៃ នឹងត្រូវបញ្ជូនពលករសរុប ១០ ០០០នាក់ទៅធ្វើការក្នុងវិស័យកសិកម្មរបស់អ៊ីស្រាអែល។ ពលករ ក៏ត្រូវទទួលការហ្វឹកហ្វឺនដើម្បីត្រៀមខ្លួនសម្រាប់គ្រាអាសន្នដែរ ហើយពួកគេនឹងទទួលបានប្រាក់ពី ៥០ ០០០ ទៅ ៥៥ ០០០ បាតក្នុងមួយខែ ដោយមិនរាប់បញ្ចូលប្រាក់បន្ថែមម៉ោង។

ប្រជាជនថៃជាច្រើន ជាពិសេសអ្នកនៅតាមតំបន់ជនបទភាគឦសានប្រទេស មានបំណងស្វែងរកការងារធ្វើនៅអ៊ីស្រាអែល ក៏ព្រោះតែទីនោះអាចទទួលបានប្រាក់កម្រៃខ្ពស់ សម្រាប់ដោះបំណុល ដែលការជំពាក់បំណុលនេះគឺជាបញ្ហាសេដ្ឋកិច្ចលំដាប់ថ្នាក់ទី២ចំពោះមនុស្សរាប់លាននាក់នៅអាស៊ីអាគ្នេយ៍។

បើតាមការចុះផ្សាយរបស់សារព័ត៌មាន BBC កាលពីខែតុលា ឆ្នាំ២០២៣កន្លងទៅ, ពលករថៃចាប់ផ្ដើមធ្វើចំណាកស្រុកទៅកាន់ប្រទេសអ៊ីស្រាអែល តាំងពីអំឡុងទសវត្សរ៍ឆ្នាំ១៩៨០មកម៉្លេះ មុនកិច្ចព្រមព្រៀងជាផ្លូវការរវាងរដ្ឋាភិបាលប្រទេសទាំងពីរ កាលពីឆ្នាំ២០១១ទៅទៀត។

សព្វថៃ កម្រៃប្រចាំខែរបស់ពលករថៃនៅអ៊ីស្រាអែល អាចទទួលបានចន្លោះពី ២១០០ដុល្លារ ដល់ជាង ៣២០០ដុល្លារ។ ក្រុមពលករថៃ បានអះអាងថា កម្រៃប៉ុណ្ណឹងគឺច្រើនជាងការរកចំណូលនៅប្រទេសកំណើតពួកគេដល់ទៅ ៧ ឬ ៨ដងឯណោះ៕

អត្ថបទ៖ សុខ សុវណ្ណ

ចុចអាន៖ ថៃ ត្រៀមបញ្ជូនពលករទៅអ៊ីស្រាអែលវិញ ទោះសង្គ្រាមនៅទីនោះមិនទាន់ចប់