​ប៉ូលិស​កេនយ៉ា​​ទៅដល់ភ្លាម, នាយក​រដ្ឋមន្ត្រី​ហៃទី​តាំងចិត្ត​ ស្តារ​ប្រទេសឡើង​វិញ​

តាមការចេញផ្សាយរបស់ទីភ្នាក់ងារពត៌មាន Al Jazeera, នាយក​រដ្ឋមន្ត្រី​ហៃទី​ បានប្តេជ្ញា​ស្តារប្រទេសឡើង​វិញ បន្ទាប់ពីកងប៉ូលិសកេនយ៉ា ទៅដល់រដ្ឋធានី ព័រអូប្រាំង កាលពីថ្ងៃអង្គារទី២៥ខែមិថុនាឆ្នាំ២០២៤ ដើម្បីចាប់ផ្តើមបេសកកម្មរក្សាសន្តិភាពនៅក្នុងប្រទេស ដែលកំពុងបំផ្លិចបំផ្លាញដោយអំពើហិង្សានិងការតវ៉ាដ៏ចលាចល។

នាយករដ្ឋមន្ត្រីហៃទី លោក Garry Conille បានឲ្យដឹងនៅក្នុងសន្និសីទសារព័ត៌មានមួយថា កម្លាំងចម្រុះជាតិសាសន៍ក្រុមទី១ មកពីប្រទេសកេនយ៉ាបានមកដល់ ហៃទី ហើយដើម្បីជួយស្តារប្រទេសឡើងវិញ ប៉ុន្តែពួកគេនឹងមិនធ្វើសកម្មភាពអ្វីខ្លាំងក្លាពេកទេ ដើម្បីឲ្យប្រជាជនហៃទីទាំងអស់អាចរស់នៅដោយសន្តិភាព។

សង្គ្រាមក្រុមក្មេងទំនើងឥឡូវនេះ បានបណ្តាលឲ្យមានការជម្លៀសមនុស្សជាងកន្លះលាននាក់ និងជិតប្រាំលាននាក់ ត្រូវប្រឈមនឹងអសន្តិសុខស្បៀងយ៉ាងធ្ងន់ធ្ងរ។ លើសពីនេះការសម្លាប់រាលដាល ការចាប់ជំរិត អំពើហិង្សាផ្លូវភេទ និងការផ្ទុះជំងឺអាសន្នរោគកាចសាហាវ ក៏កំពុងរុកគួនប្រទេសហៃទីដែរ។

ប៉ូលិសកេនយ៉ា ត្រូវបានគេរំពឹងថានឹងមានការចូលរួមដោយមន្ត្រីមកពីប្រទេសចំនួន ១៥ផ្សេងទៀត រួមទាំងកាណាដា បារាំង អាល្លឺម៉ង់ អង់គ្លេស និងអេស្ប៉ាញផងដែរ។ កងកម្លាំងសន្តិសុខរបស់ប្រទេសទាំងអស់នឹងបង្កើតបេសកកម្មរក្សាសន្តិភាពដែលមានកម្លាំងចំនួន ២៥០០ នាក់ ផ្តល់មូលនិធិដោយសហរដ្ឋអាមេរិក ជាមួយការសន្យាផ្តល់ប្រាក់ចំនួន ៣៦០ លានដុល្លារ។

ស្រពេលជាមួយគ្នានោះ ប្រធានាធិបតីសហរដ្ឋអាមេរិក លោក Joe Biden ក៏បានសាទរចំពោះការមកដល់របស់ប៉ូលិសកេនយ៉ាផងដែរដែលនឹងនាំមកនូវការសង្គ្រោះដល់ប្រទេសជិតខាង ដោយប៉ូលិសទាំងនេះនឹងផ្តល់អាទិភាពដល់ការការពារជនស៊ីវិល ការបើកផ្លូវសម្រាប់ចរាចរណ៍របស់មនុស្ស ទំនិញ និងជំនួយមនុស្សធម៌ និងការការពារស្ថាប័នរដ្ឋ៕

អត្ថបទ៖ ប៊ុន សុភាព