គ្រឿងស្រវឹង សម្លាប់មនុស្ស ជាង២លាននាក់ ទូទាំងពិភពលោក មួយឆ្នាំៗ

តាមរបាយការណ៍របស់អង្គការសុខភាពពិភពលោក (WHO) ចេញផ្សាយកាលពីថ្ងៃអង្គារទី២៥ខែមិថុនាឆ្នាំ២០២៤, គ្រឿងស្រវឹង បានសម្លាប់មនុស្ស ២.៦លាននាក់ជារៀងរាល់ឆ្នាំ ភាគច្រើនជាមនុស្សប្រុស។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

របាយការណ៍ស្តីពីគ្រឿងស្រវឹងនិងសុខភាពនេះបង្ហាញថា គិតជាមធ្យម គ្រឿងស្រវឹងបណ្តាលឲ្យមនុស្ស ជិតម្នាក់ក្នុងចំណោម២០នាក់នៅទូទាំងពិភពលោក បាត់បង់ជីវិតក្នុងមួយឆ្នាំៗ ហើយវាមិនមែនសំដៅតែលើការផឹកគ្រឿងស្រវឹងដល់ស្លាប់ទេ ពោលគឺគេគិតលើកត្តាមរណភាពដែលពាក់ព័ន្ធនឹងគ្រឿងស្រវឹងដូចជាការបើកបរក្នុងស្ថានភាពស្រវឹង ប្រើអំពើហិង្សា ការរំលោភបំពាននិងជំងឺបណ្តាលមកពីស្រាជាដើម។

ពាក់ព័ន្ធបញ្ហានេះ ប្រមុខ WHO លោក Tedros Adhanom Ghebreyesus គូសបញ្ជាក់ថា “ការប្រើប្រាស់សារធាតុប៉ះពាល់យ៉ាងធ្ងន់ធ្ងរដល់សុខភាពបុគ្គលនេះ គឺបានបង្កើនហានិភ័យកើតជំងឺរ៉ាំរ៉ៃ ស្ថានភាពសុខភាពផ្លូវចិត្តចុះខ្សោយ និងក្លាយជាសោកនាដកម្មដែលបណ្តាលឲ្យមានអ្នកស្លាប់រាប់លាននាក់ក្នុងមួយឆ្នាំៗ”។

ការផឹកស្រា ត្រូវបានផ្សារភ្ជាប់ទៅនឹងស្ថានភាពសុខភាពមួយចំនួន ដូចជាជំងឺក្រិនថ្លើម និងមហារីកជាដើម។ ក្នុងចំណោមអ្នកស្លាប់ទាំងអស់ក្នុងរបាយការណ៍ឆ្នាំ២០១៩ខាងលើ រកឃើញថា មនុស្សប្រមាណ១.៦លាននាក់ គឺបាត់បង់ជីវិតដោយសារជំងឺ។ ក្នុងនោះមាន ៤៧៤ ០០០នាក់ស្លាប់ដោយសារជំងឺដាច់សរសៃឈាមបេះដូង,  ៤០១ ០០០នាក់ដោយសារជំងឺមហារីក និង៧២៤ ០០០នាក់ស្លាប់ដោយសាររបួសព្រោះគ្រោះថ្នាក់ចរាចរណ៍។

ដោយឡែក តាមការប៉ាន់ស្មាន មានមនុស្ស២០៩លាននាក់ទូទាំងពិភពលោក ញៀននឹងការផឹកស្រាក្នុងឆ្នាំ ២០១៩ ពោលគឺស្មើនឹង ៣.៧% នៃចំនួនប្រជាជនសរុបជាសកល ដោយអឺរ៉ុបជាតំបន់មានមនុស្សផឹកស្រាក្នុងកម្រិតខ្ពស់ជាងគេ ពោលគឺម្នាក់ផឹកអស់ ៩.២លីត្រ បន្ទាប់មកគឺអាមេរិក ដែលម្នាក់ផឹក៧.៥លីត្រ៕

អត្ថបទ៖ សុខ សុវណ្ណ

ចុចអាន៖ នាយករដ្ឋមន្ត្រី ប្រាប់ទៅអាជ្ញាធរឱ្យរឹតបន្តឹងការផ្សាយគ្រឿងស្រវឹងលើផ្ទាំងប៉ាណូតាមទីសាធារណៈ