មេណាតូថ្មី ជាអ្នកចាត់ទុករុស្ស៊ី ជាសត្រូវ ក្នុងកែវភ្នែក

តាមសេចក្តីរាយការណ៍របស់ RT កាលពីថ្ងៃពុធទី២៦ខែមិថុនា, ពេលនេះ អង្គការណាតូ រកបានប្រធានថ្មីហើយ នោះគឺជានាយករដ្ឋមន្ត្រីហូឡង់ស្តីទីលោក Mark Rutte ហើយអ្នកនយោបាយជើងចាស់រូបនេះ គឺជាបុគ្គលម្នាក់ដែលចាត់ទុករុស្ស៊ី ជាសត្រូវក្នុងកែវភ្នែក និងជាអ្នកដែលគាំទ្រប្រទេសអ៊ុយក្រែនខ្លាំងក្លាបំផុត។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោក Rutte នឹងត្រូវចូលកាន់តំណែងជំនួសលោក Jens Stoltenberg ដែលបំពេញការងារនៅតំណែងកំពូលនេះ អស់រយៈពេល១០ឆ្នាំមកហើយ។

ការជ្រើសរើសលោក Rutte កើតឡើង បន្ទាប់ពីមានការឈ្លោះប្រកែកគ្នារាប់ខែសម្រាប់តំណែងនេះ រវាងបេក្ខជននានារួមមាន អតីតរដ្ឋមន្ត្រីការពារជាតិចក្រភពអង់គ្លេសលោក Ben Wallace, នាយករដ្ឋមន្ត្រីអេស្តូនីលោកស្រី Kaja Kallas និងប្រធានាធិបតីរ៉ូម៉ានីលោក Klaus Iohannis។

ការតែងតាំងនេះទៀតសោត ធ្វើឡើងចំពេលបណ្តាប្រទេសណាតូ បន្តផ្តល់ការគាំទ្រផ្នែកយោធាទ្រង់ទ្រាយធំដល់អ៊ុយក្រែន ហើយលោក Rutte នេះឯងបាននិយាយកាលពីដើមខែមិថុនាថា លោកខាងលិចត្រូវតែធានាថា ទីក្រុងកៀវនឹងឈ្នះរុស្ស៊ីដាច់ខាត។

មិនមែនត្រឹមសង្គ្រាមរុស្ស៊ី-អ៊ុយក្រែនទេ អាណត្តិរបស់លោក Rutte នេះ ក៏អាចប្រឈមនឹងការតទល់ជាមួយលោក Donald Trump ផងដែរ ប្រសិនបើគាត់ពិតជាឈ្នះការបោះឆ្នោតជាប្រធា​នាធិបតីសហរដ្ឋអាមេរិកមែន ព្រោះគេដឹងថា លោក ត្រាំ មិនសូវពេញចិត្តណាតូប៉ុន្មានទេ។

ពាក់ព័ន្ធការតែងតាំងនេះដែរ ប្រទេសរុស្ស៊ី បានចេញមុខបញ្ជាក់ច្បាស់ៗថា ទោះអ្នកណាឡើងកាន់តំណែងជាប្រមុខណាតូក៏ដោយ ក៏ទីក្រុងមូស្គូ នៅតែរក្សាគោលជំហរដដែលចំពោះជម្លោះនៅអ៊ុយក្រែន ហើយស្ថានការណ៍ក៏គ្មានប្រែប្រួលអ្វីដែរ។

សូមបញ្ជាក់ថា ក្នុងនាមជានាយករដ្ឋមន្ត្រី​កាន់​អំណាច​យូរ​បំផុត​ក្នុង​ប្រវត្តិសាស្ត្រ​ហូឡង់ លោក Rutte នឹងត្រូវចាប់ផ្តើមការងារកំពូលនៅអង្គការណាតូ ចាប់ពីថ្ងៃទី១ខែតុលាឆ្នាំ២០២៤នេះទៅ៕

អត្ថបទ៖ សុខ សុវណ្ណ

ចុចអាន៖ សមាជិក NATO ២៣​ប្រទេស អាច​សម្រេច​គោល​នយោបាយ​ចំណាយ ២% នៃ GPD លើ​យោធា