ព័ត៌មានអន្ដរជាតិ

ស្លាប់២០នាក់នៅនេប៉ាល់ ព្រោះភ្លៀងធ្លាក់ បាក់ដី និងរន្ទះបាញ់

បានផុស

៣ ខែ មុន

នៅ

ថ្ងៃព្រហស្បតិ៍ ២៧ មិថុនា ២០២៤

ដោយ

Chheang

គ្រោះធម្មជាតិក្នុងរយៈពេល២ថ្ងៃកន្លងទៅ បានប្រល័យជីវិតពលរដ្ឋនេប៉ាល់ អស់យ៉ាងហោចណាស់ ២០នាក់ ព្រោះតែភ្លៀងធ្លាក់ខ្លាំង បាក់រលំដី និងរន្ទះបាញ់។ នេះយោងតាមការចុះផ្សាយរបស់សារព័ត៌មាន Asia One នៅថ្ងៃព្រហស្បតិ៍ទី២៧ ខែមិថុនា ឆ្នាំ២០២៤។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ករណីបាក់រលំដី បានបំផ្លាញផ្ទះប្រជាជនអស់ចំនួន ៣ខ្នង ក្នុងតំបន់ Lamjung ខេត្ត Gandaki ដែលមានចម្ងាយប្រមាណ ១២៥គីឡូម៉ែត្រពីភាគខាងជើងរដ្ឋធានី Kathmandu។ ហេតុការណ៍នេះ បានសម្លាប់មនុស្សអស់ ៤នាក់ ក្នុងនោះមានកុមារ២នាក់។ ចំណែកឯនៅតំបន់ Morang នៃខេត្ត Koshi ឯណោះវិញ ទឹកជំនន់បានឆក់យកជីវិតមនុស្សអស់ ៤នាក់ គិតចាប់តាំងពីថ្ងៃទី២៥ ខែមិថុនា។ មនុស្ស៣នាក់ផ្សេងទៀត ត្រូវបានសម្លាប់ ក្នុងករណីបាក់ដី នៅតំបន់២ផ្សេងគ្នា គឺតំបន់ Kaski និងតំបន់ Okhaldhunga។

ចំណែកឯករណីរន្ទះបាញ់ បានសម្លាប់មនុស្សអស់ យ៉ាងហោចណាស់ ៩នាក់ នៅទូទាំងប្រទេស នារយៈពេល២ថ្ងៃកន្លងទៅ។

សូមបញ្ជាក់ថា នេប៉ាល់ គឺជាប្រទេសដែលសម្បូរទៅដោយតំបន់ភ្នំជាច្រើនកន្លែង ដែលជារៀងរាល់ឆ្នាំ គ្រោះធម្មជាតិបានសម្លាប់មនុស្សអស់រាប់ពាន់នាក់ឯណោះ ដោយសារតែទឹកជំនន់ និងការបាក់រលំដី ជាពិសេសនៅអំឡុងរដូវធ្លាក់ខ្យល់មូសុង ចាប់ពីពាក់កណ្ដាលខែមិថុនា រហូតដល់ពាក់កណ្ដាលខែកញ្ញា៕

ដោយ៖ ឈាង

Related Topics:ប្រទេសនេប៉ាល់