ព័ត៌មានអន្ដរជាតិ

NASA ឲ្យ SpaceX ជិត១ពាន់លានដុល្លារ កម្ទេចស្ថានីយអវកាសអន្តរជាតិ

បានផុស

៨ ខែ មុន

នៅ

ថ្ងៃព្រហស្បតិ៍ ២៧ មិថុនា ២០២៤

ដោយ

Chheang

អង្គការ NASA កាលពីថ្ងៃទី២៦ ខែមិថុនា ឆ្នាំ២០២៤ បានប្រកាសផ្ដល់ឲ្យក្រុមហ៊ុន SpaceX របស់លោក Elon Musk នូវគម្រោងតម្លៃ ៨៤៣លានដុល្លារ ដើម្បីរុញស្ថានីយអវកាសអន្តរជាតិឲ្យចេញពីគន្លងភពផែនដី នៅអំឡុងឆ្នាំ២០៣០ខាងមុខ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

កិច្ចសន្យាថ្មីរបស់ NASA បានបញ្ជាក់ថា ក្រុមហ៊ុន SpaceX នឹងត្រូវសាងសង់យានអវកាសមួយគ្រឿង មានឈ្មោះថា US Deorbit Vehicle ទុកសម្រាប់យកទៅទាញទម្លាក់ស្ថានីយអវកាសអន្តរជាតិទម្ងន់ជាង៤៥០តោន ក្នុងរយៈពេលកម្ពស់៤០៨គីឡូម៉ែត្រពីផែនដី ដើម្បីកម្ទេចចោលក្នុងមហាសមុទ្រប៉ាស៊ីហ្វិក បន្ទាប់ពីប្រតិបត្តិការអស់រយៈពេលជាង ២០ឆ្នាំកន្លងមក គិតចាប់ពីថ្ងៃបាញ់បង្ហោះដំបូងកាលពីឆ្នាំ១៩៩៨។

ស្ថានីយអវកាសអន្តរជាតិ ដែលមានទំហំស្មើនឹងតារាងបាល់ទាត់នេះ ត្រូវបានបង្កើតឡើង និងស្ថិតនៅក្រោមការគ្រប់គ្រងរបស់សហរដ្ឋអាមេរិក និងប្រទេសរុស្ស៊ី។ ស្ថានីយនេះ នឹងត្រូវដាក់ឲ្យចូលនិវត្តន៍ នៅក្នុងឆ្នាំ២០៣០ខាងមុខ ក្រោមហេតុផលថា គ្រឿងបន្លាស់នៃយានអាចមានសភាពចាស់ទ្រុឌទ្រោមទៅតាមអាយុកាល។

សូមបញ្ជាក់ថា បើទោះជាបច្ចុប្បន្នកំពុងមានជម្លោះបញ្ហាភូមិសាស្ត្រនយោបាយក៏ពិតមែន, រុស្ស៊ី និងសហរដ្ឋអាមេរិក ព្រមទាំងបណ្ដាប្រទេសមួយចំនួននៅសហភាពអឺរ៉ុប នៅតែបន្តកិច្ចសហប្រតិបត្តិការអវកាសរួមគ្នាដដែល។ អង្គការ NASA បានប្រកាសថា គម្រោងស្ថានីយអវកាសថ្មី នឹងចាប់ផ្ដើមនៅក្នុងឆ្នាំ២០៣០ បន្តវេនពីស្ថានីយអវកាសចាស់ដែលត្រៀមនឹងដកចេញដោយក្រុមហ៊ុន SpaceX។ យ៉ាងណាមិញ កិច្ចសហប្រតិបត្តិការជាមួយរុស្ស៊ី មិនប្រាកដថាអាចបន្តទៅមុខទៀតនោះឡើយ ព្រោះរុស្ស៊ីបានប្រកាសសហការជាមួយអាមេរិកលើវិស័យលំហអវកាសត្រឹមឆ្នាំ២០២៨ប៉ុណ្ណោះ៕

ដោយ៖ ឈាង