EU តែងតាំងបុគ្គលប្រឆាំងរុស្ស៊ី ជាអ្នកការទូតកំពូល

តាមសេចក្តីរាយការណ៍របស់ BBC នៅថ្ងៃសុក្រទី២៨ខែមិថុនាឆ្នាំ២០២៤ នាយករដ្ឋមន្ត្រីអេស្តូនីលោកស្រី Kaja Kallas ដែលជាបុគ្គលនិយាយមិនសំចៃមាត់ប្រឆាំងរុស្ស៊ីនិងជាអ្នកចេញមុខចេញមាត់ខ្លាំងជាងគេលើការជំរុញដាក់ទណ្ឌកម្មទីក្រុងមូស្គូ ពេលនេះត្រូវបានសហភាពអឺរ៉ុប តែងតាំងជាផ្លូវការឲ្យកាន់តំណែងជាអ្នកការទូតកំពូលរបស់ប្លុកមួយនេះជំនួសលោក Josep Borrell។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ជុំវិញការតែងតាំងនេះ លោកស្រី Kallas បានបង្ហោះនៅលើបណ្តាញសង្គម X ថា តំណែងថ្មី នឹងក្លាយជាទំនួលខុសត្រូវដ៏ធំសម្បើមមួយ ចំពេលមានភាពតានតឹងភូមិសាស្ត្រនយោបាយ។ លោកស្រីបន្តថា “សង្រ្គាមនៅអឺរ៉ុប អស្ថិរភាពចេះតែកើនឡើងខ្លាំងនៅក្នុងប្លុករបស់យើង និងជាសកល គឺជាបញ្ហាប្រឈមចម្បងសម្រាប់គោលនយោបាយការបរទេសរបស់អឺរ៉ុប។

ស្របពេលជាមួយគ្នានោះដែរ លោកស្រីបានតាំងចិត្តធ្វើការដើម្បីសម្រេចឲ្យបាននូវឯកភាព EU និងការពារផលប្រយោជន៍និងតម្លៃរបស់ EU នៅក្នុងបរិបទភូមិសាស្រ្តនយោបាយដែលកំពុងផ្លាស់ប្តូរ។

ដោយឡែកពាក់ព័ន្ធការតែងតាំងនេះដែរ សារព័ត៌មានរុស្ស៊ី RT បានចេញផ្សាយថា បុគ្គលម្នាក់នេះហើយ ដែលតែងអំពាវនាវឲ្យដាក់ទណ្ឌកម្មខ្លាំងឡើងៗលើទីក្រុងមូស្គូ និងគាំទ្រគំនិតប្រើប្រាស់ទ្រព្យសម្បត្តិបង្កករបស់រុស្ស៊ី ដើម្បីយកទៅផ្តល់ជំនួយឲ្យទីក្រុងកៀវ។

លើសពីនេះ លោកស្រីថែមទាំង​ជំរុញឲ្យ​ EU ពន្លឿន​ការ​ផ្តល់​អាវុធ​ដល់​អ៊ុយក្រែន និង​បង្កើន​សមត្ថភាព​ការពារ​របស់​ប្លុក​នេះ​ទៀតផង។

មិនត្រឹមប៉ុណ្ណឹង កាលពីដើមឆ្នាំ រុស្ស៊ីក៏បានដាក់នាយករដ្ឋមន្ត្រីអេស្តូនីរូបនេះ ក្នុងបញ្ជីខ្មៅហើយ ចេញដីកាចាប់ខ្លួនលោកស្រីផងដែរ ដោយចោទប្រកាន់ពីការដាក់ចេញគោលនយោបាយអរិភាពចំពោះរុស្ស៊ី។

សូមបញ្ជាក់ ក្រៅពីលោកស្រី Kallas ត្រូវបានតែងតាំងឲ្យកាន់តំណែងជាអ្នកការទូតកំពូល, EU ក៏បានអនុម័តអាណត្តិទី៣របស់លោកស្រី Ursula von der Leyen ក្នុងនាមជាប្រធានគណៈកម្មការអឺរ៉ុប និងគាំទ្រអតីតរដ្ឋមន្ត្រីការបរទេសព័រទុយហ្គាល់លោក Antonio Costa ជាប្រធានក្រុមប្រឹក្សាអឺរ៉ុបថ្មីផងដែរ៕

អត្ថបទ៖ សុខ សុវណ្ណ

ចុចអាន៖ មេណាតូថ្មី ជាអ្នកចាត់ទុករុស្ស៊ី ជាសត្រូវ ក្នុងកែវភ្នែក