ព័ត៌មានអន្ដរជាតិ

កូរ៉េខាងជើង ប្រហារជីវិតបុរសវ័យក្មេងម្នាក់ ព្រោះស្ដាប់ចម្រៀង K-Pop

បានផុស

២២ ម៉ោង មុន

នៅ

ថ្ងៃសុក្រ ២៨ មិថុនា ២០២៤

ដោយ

បុរសជនជាតិកូរ៉េខាងជើងវ័យ២២ឆ្នាំម្នាក់ ត្រូវបានកាត់ទោសប្រហារជីវិត ក្រោយរូបគេបានស្ដាប់ចម្រៀង និងមើលវីដេអូកុនរបស់កូរ៉េខាងត្បូង។ នេះបើយោងតាមរបាយការណ៍មួយរបស់ក្រសួងបង្រួបបង្រួមកូរ៉េខាងត្បូង កាលពីថ្ងៃទី២៧ ខែមិថុនា ឆ្នាំ២០២៤។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ក្រសួងបង្រួបបង្រួមកូរ៉េខាងត្បូង បានបញ្ចេញឯកសាររបាយការណ៍មួយមានឈ្មោះថា “2024 Report on North Korean Human Rights” ដែលបានចងក្រងនូវសក្ខីកម្មរបស់ជនរត់គេចខ្លួនពីកូរ៉េខាងជើងចំនួន ៦៤៩នាក់។ យោងតាមសក្ខីកម្មនៅក្នុងរបាយការណ៍នេះ បុរសម្នាក់មកពីភាគខាងត្បូងខេត្ត Hwanghae ត្រូវបានប្រហារជីវិតជាសាធារណៈ កាលពីឆ្នាំ២០២២កន្លងទៅ បន្ទាប់ពីលួចស្ដាប់ចម្រៀង K-Pop បាន៧០បទ, មើលកុនកូរ៉េខាងត្បូងបាន៣រឿង ព្រមទាំងបានចែករំលែកវីដេអូចម្រៀង និងរឿងទាំងនោះឲ្យទៅអ្នកដទៃ។ រដ្ឋាភិបាលក្រុងព្យុងយ៉ាង បានចាត់ទុកទង្វើនេះគឺជារឿងក្បត់ជាតិ និងខុសពីច្បាប់ដែលបានអនុម័តកាលពីឆ្នាំ២០២០ ស្ដីពីបំរាមវប្បធម៌ និងមនោគមវិជ្ជាប្រឆាំងពីបរទេស។

របាយការណ៍របស់កូរ៉េខាងត្បូង បានបញ្ជាក់ទៀតថា ច្បាប់កាត់ទោសរបស់កូរ៉េខាងជើងនេះ សំដៅជាពិសេសចំពោះមនុស្សវ័យជំទង់ ដែលពួកគេអាចងាយនឹងឆាប់ចាប់យកវប្បធម៌ពីបរទេស ជាពិសេសពីកូរ៉េខាងត្បូង។

លោក គីម ជុងអ៊ីល និងលោក គីម ជុងអ៊ុន (រូបភាព៖ EPA)

គួរបញ្ជាក់ថា បំរាមលើចម្រៀងនិងកុន K-Pop គឺជាផ្នែកមួយនៃយុទ្ធនាការរបស់កូរ៉េខាងជើង ដែលមានគោលបំណងហាមឃាត់ប្រជាជនកុំឲ្យទទួលរងឥទ្ធិពលពីលោកខាងលិច ហើយការអនុវត្តបំរាមនេះ ធ្វើឡើងតឹងរ៉ឹងតាំងតែពីសម័យកាលដឹកនាំដោយលោក គីម ជុងអ៊ីល មកម៉្លេះ ដែលជាឪពុករបស់លោក គីម ជុងអ៊ុន មេដឹកនាំបច្ចុប្បន្ន។

ក្រុមអ្នកជំនាញ បានសន្និដ្ឋានថា ការឲ្យវប្បធម៌ប្រជាប្រិយរបស់កូរ៉េខាងត្បូងជ្រាបចូលក្នុងសង្គមកូរ៉េខាងជើង អាចបង្កជាការគំរាមកំហែងដល់មនោគមវិជ្ជា ដែលតម្រូវឲ្យប្រជាជនត្រូវបង្ហាញពីភាពស្មោះត្រង់ឥតងាករេចំពោះរបបដឹកនាំដោយគ្រួសារត្រកូល “គីម” ចាប់តាំងពីការបង្កើតកូរ៉េខាងជើងឡើងនៅឆ្នាំ១៩៤៨៕

ដោយ៖ ឈាង

Related Topics:ប្រទេសកូរ៉េខាងជើង