ព័ត៌មានអន្ដរជាតិ

អាមេរិក ប្រាប់ពីចំនួនគ្រាប់បែកដែលឲ្យអ៊ីស្រាអែល ជិត៩ខែមកនេះ

បានផុស

៣ ខែ មុន

នៅ

ថ្ងៃសៅរ៍ ២៩ មិថុនា ២០២៤

ដោយ

Chheang

គិតចាប់តាំងពីថ្ងៃផ្ទុះសង្គ្រាមជាមួយក្រុមហាម៉ាស សហរដ្ឋអាមេរិក បានផ្ដល់ជំនួយជាគ្រាប់បែកក្នុងចំនួនច្រើនសន្ធឹកសន្ធាប់ឲ្យទៅអ៊ីស្រាអែល ដោយក្នុងនោះមានដូចជា ប្រភេទគ្រាប់បែកទម្ងន់ជិត១តោន និងប្រភេទមីស៊ីល Hellfire ជាដើម។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

បើយោងតាមចុះផ្សាយរបស់សារព័ត៌មាន The Times of Israel នៅថ្ងៃទី២៩ ខែមិថុនា ឆ្នាំ២០២៤, ក្នុងរយៈពេលជិត៩ខែកន្លងមក អ៊ីស្រាអែល ទទួលបានគ្រាប់បែកជាច្រើនពីអាមេរិក ដូចជា គ្រាប់បែកទម្ងន់ជាង៩០០គីឡូក្រាមម៉ូឌែល MK-84 ចំំនួន ១៤ ០០០គ្រាប់, គ្រាប់បែកទម្ងន់ជាង២០០គីឡូក្រាមចំនួន ៦ ៥០០គ្រាប់, មីស៊ីលបំពាក់លើយន្តហោះចម្បាំង Hellfire ចំនួន ៣០០០គ្រាប់, គ្រាប់បែក Bunker-Buster ចំនួន ១០០០គ្រាប់, គ្រាប់បែកទម្លាក់តាមអាកាសខ្នាតតូចចំនួន ២៦០០គ្រាប់ និងប្រភេទគ្រាប់បែកផ្សេងៗមួយចំនួនទៀត។

ចំពោះគ្រាប់បែកទម្ងន់ជាង៩០០គីឡូក្រាម ត្រូវបានសហរដ្ឋអាមេរិកផ្អាកការផ្គត់ផ្គង់ទៅអ៊ីស្រាអែល ចាប់តាំងពីខែឧសភា ឆ្នាំ២០២៤មកម៉្លេះ ដោយហេតុថាខ្លាចប៉ះពាល់ខ្លាំងចំពោះអាយុជីវិតជនស៊ីវិល ក្រោយការវាយប្រហាររបស់អ៊ីស្រាអែលនៅទីក្រុង Rafah តំបន់ហ្គាហ្សា។ យ៉ាងណាមិញ ការបញ្ជូនគ្រាប់បែកផ្សេងទៀត នៅដំណើរការដូចធម្មតា។

ក្រៅតែពីគ្រាប់បែក អាមេរិកក៏បានបញ្ជូនសព្វាវុធផ្សេងៗទៀតសម្រាប់ឲ្យអ៊ីស្រាអែលទុកវាយប្រហារក្រុមហាម៉ាសផងដែរ ហើយបើគិតជាចំនួនទឹកប្រាក់ មានសុរបប្រមាណជា ៦,៥ពាន់លានដុល្លារ។

សូមបញ្ជាក់ថា ក្រសួងសុខាភិបាលហ្គាហ្សា បានប្រកាសថា តួលេខប្រជាជនប៉ាឡេស្ទីនដែលបានស្លាប់នៅក្នុងសង្គ្រាមអ៊ីស្រាអែល-ហាម៉ាស បានកើនឡើងលើសពី ៣៧ ០០០នាក់ ហើយតួលេខនេះពិបាកក្នុងការបែងចែកឲ្យច្បាស់ថា មានអ្នកស្លាប់ជាជនស៊ីវិលប៉ុន្មាន និងក្រុមទាហានហាម៉ាសប៉ុន្មាននាក់ណាស់។ យ៉ាងណាមិញ បើតាមអ៊ីស្រាអែល បានឲ្យដឹងថា ពួកគេបានសម្លាប់ក្រុមប្រយុទ្ធហាម៉ាសបានប្រមាណ ១៥ ០០០នាក់ និងក្រុមភេវរករបានចំនួន ១០០០នាក់ គិតចាប់តាំងពីថ្ងៃទី៧ ខែតុលា ឆ្នាំ២០២៣៕

ដោយ៖ ឈាង

Related Topics:សង្គ្រាមអ៊ីស្រាអែល-ប៉ាឡេស្ទីន