ព័ត៌មានអន្ដរជាតិ
ការញ៉ាំវីតាមីនប្រចាំថ្ងៃ មិនអាចជួយឲ្យអាយុវែងទេ តែអាចបង្កជាបញ្ហាមួយទៅវិញ
របកគំហើញវេជ្ជសាស្ត្រថ្មីមួយ បានរកឃើញថា ការទទួលទានវីតាមីនចម្រុះរាល់ថ្ងៃ មិនអាចជួយឲ្យមនុស្សរស់នៅបានយូរជាងមុននោះទេ តែវាអាចបង្កជាហានិភ័យនៃការស្លាប់មុនអាយុទៅវិញ។ ការសិក្សានេះ ធ្វើឡើងដោយក្រុមអ្នកស្រាវជ្រាវនៅវិទ្យាស្ថានមហារីកជាតិនៃសហរដ្ឋអាមេរិក ដែលបានវិភាគលើកំណត់ត្រាសុខភាពមនុស្សពេញវ័យជិត ៤០ម៉ឺននាក់ ក្នុងរយៈពេលជាង២០ឆ្នាំ។
នៅអំឡុងការសិក្សាស្រាវជ្រាវដែលចាប់ផ្ដើមតាំងពីទស្សវត្សរ៍ឆ្នាំ១៩៩០មក ក្នុងចំណោមក្រុមមនុស្សដែលទទួលទានវីតាមីនចម្រុះជាប្រចាំថ្ងៃ មានអត្រាស្លាប់មុនអាយុច្រើនជាងអ្នកដែលមិនបានទទួលទាន ដល់ទៅជាង ៤% ឯណោះ។ ផ្អែកលើទិន្នន័យនេះហើយទើបក្រុមអ្នកស្រាវជ្រាវរបស់រដ្ឋាភិបាលអាមេរិក បានសន្និដ្ឋានថា ការអះអាងដែលថាវីតាមីនអាចជួយឲ្យមនុស្សរស់នៅយូរអង្វែងជាងមុនគឺជារឿងមិនពិតនោះទេ ថ្វីត្បិតបច្ចុប្បន្នមនុស្សភាគច្រើននៅលើពិភពលោកកំពុងនាំគ្នាចំណាយលុយអស់ជាច្រើនសន្ធឹកលើថ្នាំវីតាមីន ឬអាហារបំប៉ននានា។
ទីផ្សារសកលនៃថ្នាំវីតាមីន និងអាហារបំប៉ន មានតម្លៃប៉ាន់ស្មានប្រមាណដល់ខ្ទង់ ១០ពាន់លានដុល្លារឯណោះជារៀងរាល់ឆ្នាំ។
ទោះមានការពេញនិយមខ្លាំងនៃការទទួលទានវីតាមីន ក៏អ្នកស្រាវជ្រាវមួយចំនួន នៅតែបង្ហាញការសង្ស័យពីអត្ថប្រយោជន៍ ដែលបានផ្សព្វផ្សាយអំពីថ្នាំវីតាមីន ក៏ដូចជាអាហារបំប៉នទាំងនោះ។ បន្ថែមពីនេះ ក្រុមអ្នកស្រាវជ្រាវ ក៏បានព្រមានពីប្រភេទថ្នាំវីតាមីនមួយចំនួន ដែលអាចបង្កជាគ្រោះថ្នាក់ចំពោះសុខភាពទៅវិញ ជាជាងការហុចផលប្រយោជន៍ផ្នែកសុខភាពរាងកាយ។ ជាឧទាហរណ៍ដូចជា ប្រភេទអាហារបំប៉ន ដែលមានសារធាតុ beta-carotene ប្រឆាំងជំងឺមហារីក អាចបង្កជាហានិភ័យនៃការជំងឺមហារីកសួត និងជំងឺបេះដូងទៅវិញ ព្រោះតែអាហារបំប៉នប្រភេទនេះខ្វះនូវសារធាតុគួបផ្សំសំខាន់ៗ។ អាហារបំប៉ន beta-carotene មានលក្ខណៈមិនដូចជាគ្នាទៅនឹងអាហារធម្មជាតិដែលមានផ្ទុកសារធាតុ beta-carotene នោះទេ។ ឧទាហរណ៍មួយវិញទៀត ការទទួលទានជាតិដែកដែលមាននៅក្នុងថ្នាំគ្រាប់វីតាមីនសឹងតែគ្រប់មុខទៅហើយ អាចបង្កជាហានិភ័យនៃការលើសជាតិដែក ហើយបណ្ដាលឲ្យកើតជំងឺស្ទះសរសៃឈាមបេះដូង ជំងឺទឹកនោមផ្អែម និងជំងឺចាស់វង្វេង។
វេជ្ជបណ្ឌិត Neal Barnard សាស្ត្រាចារ្យផ្នែកវេជ្ជសាស្ត្រនៅសកលវិទ្យាល័យ George Washington និងជាអ្នកចូលរួមក្នុងការស្រាវជ្រាវខាងលើ បានប្រាប់ថា វីតាមីនមានផលប្រយោជន៍ក្នុងលក្ខខណ្ឌច្បាស់លាស់ប៉ុណ្ណោះ ដូចជា ការលេបថ្នាំវីតាមីន C, E និង ស័ង្កសី ដើម្បីពន្យារការចុះខ្សោយនៃចក្ខុ ឬការលេបវីតាមីន ដើម្បីព្យាបាលជំងឺខ្វះវីតាមីន C និងជំងឺចុះខ្សោយការចង់ចាំ ជាដើម។ លោកវេជ្ជបណ្ឌិត បាននិយាយថា ការផ្សព្វផ្សាយពីអត្ថប្រយោជន៍នៃវីតាមីន គឺលើសពីការពិតជាក់ស្ដែង។ លោក Barnard បន្តថា ជំនួសឲ្យការញ៉ាំថ្នាំវីតាមីន មនុស្សគ្រប់រូបគួរទទួលអាហារសុខភាព ដែលផ្ដល់នូវជាតិសរសៃ និងសារធាតុចិញ្ចឹមចម្រុះ ដោយមិនគួរទទួលទានអាហារសម្បូរជាតិខ្លាញ់ឆ្អែត និងកូឡេស្តេរ៉ុល៕
ដោយ៖ ឈាង
-
ព័ត៌មានជាតិ៧ ថ្ងៃ ago
លោក ជួន ណារិន្ទ បញ្ជាឱ្យហៅគ្រូមន្តអាគមយកកាំភ្លើងពោះខ្លួនឯងមកសួរនាំ ទោះសាមីខ្លួនសុំទោសជាសាធារណៈ
-
ព័ត៌មានជាតិ៦ ថ្ងៃ ago
អភិបាលខេត្តជើងខ្លាំង៤រូប នៅរក្សាតំណែង ខណៈអភិបាល៤រូបទៀត របូតតំណែងនេះ
-
ព័ត៌មានអន្ដរជាតិ៦ ថ្ងៃ ago
ព្យុះខ្សាច់សាហារ៉ាដ៏ធំ ហោះឆ្លងមហាសមុទ្រអាត្លង់ទិក ទៅវាយប្រហារអាមេរិក ចុងសប្តាហ៍នេះ
-
ព័ត៌មានជាតិ៣ ថ្ងៃ ago
ចោទកម្ពុជាបង្កើត CoolApp ដើម្បីយកការណ៍ ឯកឧត្ដម ឌី វិជ្ជា ចោទសួរទៅវិញថាតើ Appរបស់ប្រទេសមហាអំណាចបង្កើតដើម្បីអ្វី?
-
សន្តិសុខសង្គម៥ ថ្ងៃ ago
នគរបាលខណ្ឌព្រែកព្នៅ បញ្ជូនខ្លួនលោក ណុប សក្កដា ហៅគ្រូផេះគ្រូអង្កាមទៅតុលាការ
-
ព័ត៌មានជាតិ៤ ម៉ោង ago
រថយន្តដឹកទំនិញ រត់សាកល្បងជោគជ័យពីទីក្រុងគុនមីនប្រទេសចិន មកដល់រាជធានីភ្នំពេញ
-
សន្តិសុខសង្គម៧ ថ្ងៃ ago
ព័ត៌មានបឋម! ជនមិនស្គាល់មុខចាក់សម្លាប់យុវជនម្នាក់នៅផ្ទះជួលជាន់ទី៣
-
ព័ត៌មានជាតិ៦ ថ្ងៃ ago
ស្រុក២ នៃខេត្តកំពង់ចាម ផ្ទុះករណីហ្វូងសត្វដង្កូវបំផ្លាញដំណាំស្រូវ និងដំឡូងមី សរុបជិត២រយហិកតា