ភូកេត លិចលង់ដូចទន្លេ ក្រោយភ្លៀងធ្លាក់ខ្លាំង

តាមការចុះផ្សាយរបស់ Bangkok Post កាលពីថ្ងៃអាទិត្យទី៣០ខែមិថុនាឆ្នាំ២០២៤ ភ្លៀងធ្លាក់ខ្លាំងដូចហែកមេឃ បានប្រែក្លាយតំបន់ខ្លះនៃខេត្តភូកេត ប្រទេសថៃ ឲ្យលិចលង់មើលទៅដូចជាទន្លេ ហើយថែមទាំងរាំងស្ទះដល់ការធ្វើចរាចរណ៍ផ្លូវអាកាសផងដែរ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

អ្នកព្យាករអាកាសធាតុបានឲ្យដឹងថា ភ្លៀងធ្លាក់ខ្លាំង បានគ្របដណ្តប់ខេត្តភូកេត ដល់ទៅ៦០%ឯណោះ ហើយទឹកបានជន់លិចជ្រៅជាង១ម៉ែត្រនៅភាគខាងជើងខេត្ត ជាពិសេសស្រុក Thalang។

គ្រោះទឹកជំនន់នេះ ក៏បង្ខំឲ្យមនុស្សប្រហែល១០០នាក់ រត់ទៅនៅសាលាសំណាក់ និងសាលារៀននានា នៅតាមទីតាំងមួយចំនួនផងដែរ ដើម្បីសុវត្ថិភាព។

ជើងហោះហើរចំនួន១០ចូលមកខេត្តភូកេត ត្រូវបង្វែទៅអាកាសយានដ្ឋានដុនមឿង និងសុវណ្ណភូមិវិញ ក៏ដូចជាអាកាសយានដ្ឋាននៅខេត្ត Krabi និង Surat Thani ផងដែរ ព្រោះពីឡុតមើលផ្លូវចុះមិនឃើញ។

ទោះបីជាយ៉ាងណាក៏ដោយ មកដល់ថ្ងៃចន្ទទី១ខែកក្កដា កម្ពស់ទឹកបានស្រកចុះវិញ ហើយស្ថានភាពក៏ធូរស្រាលបន្តិច រីឯជើងហោះហើរ ក៏ដំណើរការឡើងវិញដែរ ស្របពេលក្រុមមន្ត្រីមូលដ្ឋាន ចាប់ផ្តើប្រតិបត្តិការបោសសម្អាត៕

អត្ថបទ៖ សុខ សុវណ្ណ

ចុចអាន៖ យន្តហោះដឹកភ្ញៀវទេសចរជាង ៣០០នាក់ ផ្ទុះឆេះម៉ាស៊ីន នៅ ភូកេត