កូរ៉េខាងជើង៖ អាមេរិក កំពុងបង្កើត “ណាតូ Version អាស៊ី”

តាមការចុះផ្សាយរបស់សារព័ត៌មាន TASS កាលពីថ្ងៃអាទិត្យទី៣០ខែមិថុនា, ប្រទេសកូរ៉េខាងជើង បានចោទប្រកាន់ខ្លាំងៗទៅលើអាមេរិកថា ពួកគេនិងសម្ព័ន្ធមិត្តគឺកូរ៉េខាងត្បូងនិងជប៉ុន កំពុងបង្កើនកិច្ចសហប្រតិបត្តិការការពារត្រីភាគី ដើម្បីបង្កើត “ណាតូ Version អាស៊ី”។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ការចោទប្រកាន់នេះគឺចេញពីក្រសួងការបរទេសនៅទីក្រុងព្យុងយ៉ាង ដែលលើកឡើងថា “ឥឡូវ ទីក្រុងវ៉ាស៊ីនតោន កំពុងអះអាងថា ទំនាក់ទំនងអាមេរិក-ជប៉ុន-កូរ៉េខាងត្បូង គឺគ្រាន់តែជាកិច្ចសហប្រតិបត្តិការសម្រាប់ការពង្រឹងស្ថិរភាព និងសន្តិសុខក្នុងតំបន់ប៉ុណ្ណោះ ហើយមិនមែនមានន័យថាជា ណាតូ Version អាស៊ីអ្វីនោះទេ ប៉ុន្តែជាក់ស្តែង នេះគ្រាន់តែជាវោហារសាស្ត្រ ដើម្បីគេចពីការរិះគន់ជាអន្តរជាតិប៉ុណ្ណោះ”។

លើសពីនេះ ក្រសួងបានចង្អុលបង្ហាញថា កិច្ចព្រមព្រៀងជំរុញកិច្ចសហប្រតិបត្តិការលើវិស័យការពារជាតិ ដែលចុះហត្ថលេខាដោយមេដឹកនាំអាមេរិក ជប៉ុន និងកូរ៉េខាងត្បូងក្នុងឆ្នាំ២០២៣ គឺដូចទៅនឹងគោលការណ៍របស់អង្គការណាតូ ឬគេស្គាល់ថា “មាត្រា៥”​ ដែលបើកដៃឲ្យរដ្ឋជាសមាជិកទាំងអស់រួមគ្នាសងសឹកលើសត្រូវ ពេលរដ្ឋរបស់ខ្លួនមួយ ត្រូវគេវាយប្រហារ។

មិនត្រឹមប៉ុណ្ណឹង ក្រសួងការបរទេសកូរ៉េខាងជើង ក៏បានថ្កោលទោសយ៉ាងខ្លាំង ចំពោះសមយុទ្ធយោធាត្រីភាគី Freedom Edge ដែលធ្វើឡើងនៅក្នុងតំបន់ផងដែរ ដោយចាត់ទុកវាថា ជាការប៉ុនប៉ងបញ្ឆេះភាពតានតឹងផ្នែកយោធាក្នុងតំបន់ឲ្យកាន់តែឆាបឆួល, ដាក់សម្ពាធលើចុងបូព៌ានៃប្រទេសរុស្ស៊ី និងដាក់ការឡោមព័ទ្ធប្រទេសចិន។

សូមបញ្ជាក់ថា កាលពីសប្តាហ៍មុន សហរដ្ឋអាមេរិក កូរ៉េខាងត្បូង និងជប៉ុន បានធ្វើសមយុទ្ធយោធាត្រីភាគីជាលើកដំបូងមានឈ្មោះ Freedom Edge នៅក្នុងដែនទឹកអន្តរជាតិភាគខាងត្បូងកោះ Jeju របស់ប្រទេសកូរ៉េខាងត្បូង។ សមយុទ្ធនេះ មានការចូលរួមពីយន្តហោះ ឧទ្ធម្ភាគចក្រ និងកប៉ាល់ រួមទាំងនាវា USS Theodore Roosevelt របស់កងទ័ពជើងទឹកអាមេរិក និងនាវាពិឃាត ROKS Seoae Ryu Seong-ryong របស់កូរ៉េខាងត្បូង ផងដែរ៕

អត្ថបទ៖ សុខ សុវណ្ណ

ចុចអាន៖ មេណាតូថ្មី ជាអ្នកចាត់ទុករុស្ស៊ី ជាសត្រូវ ក្នុងកែវភ្នែក