ព័ត៌មានអន្ដរជាតិ

ស្រ្តី អាមេរិក ម្នាក់បំពុលប្ដី ដោយសារខឹងមិនសរសើរដែលនាងខំរៀបចំខួបកំណើតឲ្យ

បានផុស

៣ នាទី មុន

នៅ

ថ្ងៃពុធ ៣ កក្កដា ២០២៤

ដោយ

កាលពីថ្ងៃទី ០២ ខែកក្កដា គេហទំព័រ odditycentral បានរាយការណ៍មកថា ស្ត្រីរដ្ឋមីសសួរីម្នាក់ត្រូវបានអាជ្ញាធរចាប់ខ្លួន បន្ទាប់ពីប្តីរបស់នាងដាក់ពាក្យប្ដឹងដោយសង្ស័យប្រពន្ធខ្លួនលួចបំពុលគាត់តាមរយៈទឹកផឹកដែលដាក់ក្នុងទូទឹកកក។

មែនទែនទៅ រឿងរ៉ាវនេះបានបានកើតឡើងនៅថ្ងៃទី ២៤ ខែមិថុនាមកម៉្លេះ នៅពេលដែលបុរសជាស្វាមីបានកត់សម្គាល់ឃើញថាភេសជ្ជៈរបស់គាត់នៅក្នុងទូទឹកកកមានរសជាតិខុសពីមុន ហើយភ្លាមៗបន្ទាប់ពីគាត់បានផឹក គាត់បែរជាមានអាការ រាគ និងក្អួតធ្ងន់ធ្ងរ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ជនរងគ្រោះបានបន្ថែមថា គាត់បានចាប់ផ្តើមកត់សំគាល់ថារសជាតិនៃភេសជ្ជៈនៅក្នុងទូទឹកកកគឺប្លែក តាំងពីថ្ងៃទី ០១ ខែឧសភាមកម្ល៉េះ ប៉ុន្តែគាត់មិនខ្វល់ថាវាជាអ្វីនោះទេ។ បន្ទាប់ពី ២-៣ សប្តាហ៍គាត់ចាប់ផ្តើមក្អួត ឡើងស្លសពណ៌ត្នោត ហើយមានរាគធ្ងន់ធ្ងរ និងឈឺបំពង់កខ្លាំង បន្ទាប់មកនៅពេលមួយ គាត់បានកត់សម្គាល់ឃើញថា រាល់ពេលដែលគាត់ផឹកទឹកមួយប្រភេទនេះនៅខាងក្រៅផ្ទះ វាមានរសជាតិធម្មតា ចំណែកឯដបនៅក្នុងទូរទឹកកករបស់គាត់មានរសជាតិប្លែកដូចគ្នា។

ក្រោយមក ដោយការសង្ស័យថាមាននរណាម្នាក់ដាក់អ្វីមួយក្នុងភេសជ្ជៈដែលខ្លួនចូលចិត្ត ជនរងគ្រោះបានសម្រេចចិត្តពិនិត្យមើលប្រព័ន្ធកាមេរ៉ាសុវត្ថិភាព។ គាត់មានការភ្ញាក់ផ្អើលជាខ្លាំងនៅពេលដែលឃើញប្រពន្ធរបស់គាត់ Michelle យកដបពីរលីត្រនៃ Diet Mountain Dew ចេញពីទូទឹកកកនិងដបថ្នាំសំលាប់ស្មៅ Roundup ចូលទៅក្នុងផ្ទះ ហើយត្រលប់មកវិញដោយដាក់ភេសជ្ជៈទៅកន្លែងដើមវិញ។

ព្រោះតែខ្លាចស្លាប់បុរសជាប្តីបានរាយការណ៍ និងនាំយកឃ្លីបវីដេអូពីកាមេរ៉ា CCTV ទុកជាភស្តុតាង។ ប្តីជឿថា មូលហេតុដែលប្រពន្ធធ្វើបែបនេះ ដោយសារតែនាងកំពុងបោកប្រាស់គាត់ និងចង់កម្ចាត់ ឬចង់បានប្រាក់ធានារ៉ាប់រងអាយុជីវិតរបស់គាត់ដែលមានចំនួន ៥០០,០០០ ដុល្លារ។ ភ្លាមៗ ប៉ូលិសបានកោះហៅ Michelle ឲ្យធ្វើសេចក្តីថ្លែងការណ៍ភ្លាមៗ។ ក្នុងអំឡុងពេលសាកសួរលើកដំបូង ស្រ្តីជាភរិយាបានបដិសេធថាមិនបានបំពុលភេសជ្ជៈរបស់ប្តីទេ ផ្ទុយទៅវិញនាងបានអះអាងថាខ្លួនកំពុងផ្សំ Mountain Dew ជាមួយ Round Up ដើម្បីសាកល្បងរូបមន្តថ្នាំសម្លាប់ស្មៅថ្មីដែលនាងបានរកឃើញនៅលើ Pinterest តែប៉ុណ្ណោះ។

ទោះយ៉ាងណាក៏ដោយ នៅពេលដែលប៉ូលិសបង្ហាញឃ្លិបវីដេអូពីកាមេរ៉ា CCTV ទីបំផុតនាងបានដាច់ចិត្តសារភាពពីមូលហេតុដែលខ្លួនជ្រុលដាក់ថ្នាំចង់សម្លាប់ប្ដីថា នេះក៏ព្រោះតែនាងមិនពេញចិត្តនឹងប្តីដែលមិនលើកសរសើរដែលនាងខំរៀបចំពិធីខួបកំណើតគម្រប់៥០ឆ្នាំឲ្យគាត់។ អ្វីដែលគួរឲ្យចាប់អារម្មណ៍នោះ រាល់ពេលដែលប្តីរបស់នាងលើកឡើងថាគាត់មិនស្រួលខ្លួន Michelle តែងតែប្រាប់ថា គាត់ប្រហែលជាមាន COVID ហើយត្រូវនៅឲ្យឆ្ងាយពីចៅៗ ទោះបីជាដឹងយ៉ាងច្បាស់ថានាងកំពុងបំពុលគាត់ក៏ដោយ៕