ព័ត៌មានអន្ដរជាតិ

ហ្វាំងឡង់ ថា ចិនខលតែមួយវឹង នោះសង្គ្រាមអ៊ុយក្រែននឹងបញ្ចប់ភ្លាម

បានផុស

៣ ខែ មុន

នៅ

ថ្ងៃពុធ ៣ កក្កដា ២០២៤

ដោយ

Chheang

ថ្លែងនៅក្នុងបទសម្ភាសន៍មួយជាមួយសារព័ត៌មាន Bloomberg នៅថ្ងៃទី៣ ខែកក្កដា ឆ្នាំ២០២៤ លោក Alexander Stubb ប្រធានាធិបតីហ្វាំងឡង់ បានឲ្យដឹងថា មហាយក្សចិនមានកូនសោសំខាន់ ដែលអាចពន្លត់ភ្លើងសង្គ្រាមរវាងរុស្ស៊ី និងអ៊ុយក្រែន។

លោក Alexander Stubb ប្រធានាធិបតីហ្វាំងឡង់ (រូបភាព៖ AP)

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោក Stubb បានបញ្ជាក់ថា កូនសោ ដែលអាចដោះស្រាយបញ្ហាសង្គ្រាមនៅអ៊ុយក្រែន គឺឥទ្ធិពលរបស់ចិនលើរុស្ស៊ី ខណៈរដ្ឋាភិបាលក្រុងមូស្គូ កំពុងប្រឈមនឹងភាពជាប់គាំងសេដ្ឋកិច្ចដ៏អាក្រក់ ព្រោះតែរងទណ្ឌកម្មពីលោកខាងលិច។ ប្រធានាធិបតីហ្វាំងឡង់ ថា “រុស្ស៊ីពឹងផ្អែកខ្លាំងលើចិននៅពេលឥលូវនេះ ដែលការហៅទូរសព្ទតែមួយវឹងពីលោកប្រធានាធិបតី ស៊ី ជីនពីង នឹងអាចដោះស្រាយវិបត្តិនេះបាន។ ប្រសិនបើគាត់និយាយថា ដល់ពេលចាប់ផ្ដើមកិច្ចចរចាសន្ដិភាព នោះរុស្ស៊ីនឹងត្រូវបង្ខំចិត្តធ្វើតាមជាក់ជាមិនខាន”។

លោក Stubb បានសង្កត់ធ្ងន់ថា បើទោះជាចិនតែងប្រកាសក្ដែងៗទាមទារឲ្យមានកិច្ចចរចាដោយសន្តិវិធីនៅក្នុងសង្គ្រាមរុស្ស៊ី-អ៊ុយក្រែនក៏ពិតមែន តែបំណងពិតរបស់ចិនគឺមិនដូចការប្រកាសឡើយ។ លោក Stubb បន្តថា “បើចិនចាប់អារម្មណ៍ពិតប្រាកដចំពោះទំនាក់ទំនងសុខដុមរមនារវាងរដ្ឋប្រជាជាតិទាំង២ ខ្លួនមិនអាចបណ្ដោយឲ្យប្រទេសដូចជារុស្ស៊ីធ្វើសង្គ្រាមអាណានិគម ឈ្លានពាន និងចក្រពត្តិ ប្រឆាំងនឹងរដ្ឋឯករាជ្យមួយនោះទេ”។

ពាក់ព័ន្ធនឹងការលើកឡើងបែបនេះ តំណាងរដ្ឋាភិបាលក្រុងមូស្គូ និងក្រុងប៉េកាំង នៅមិនទាន់មានការឆ្លើយតបណាមួយនោះទេ។

លោក វ៉្លាឌឺមៀរ ពូទីន ប្រធានាធិបតីរុស្ស៊ី និងលោក ស៊ី ជីនពីង ប្រធានាធិបតីចិន (រូបភាព៖ AP)

បើតាមក្រុមអ្នកវិភាគមួយចំនួន នាពេលកន្លងទៅ ជឿជាក់ថា ចិនមិនចង់ឲ្យសង្គ្រាមនៅអ៊ុយក្រែនចប់ទេ។ លោក Chels Michta អ្នកវិភាគនៅមជ្ឈមណ្ឌលសម្រាប់ការវិភាគនយោបាយអឺរ៉ុប ធ្លាប់បាននិយាយកាលពីខែឧសភាកន្លងទៅថា ការផ្ទុះសង្គ្រាមនៅអ៊ុយក្រែន ការដែលសហរដ្ឋអាមេរិកបន្តជួយអ៊ុយក្រែន និងការបន្តវាយលុករបស់រុស្ស៊ី គឺជាគោលបំណងដែលចិនចង់បាន។ លោក ថា បើសង្គ្រាមកាន់តែកើនឡើងនៅក្នុងចំណោមប្រទេសសមាជិកអង្គការណាតូ នោះណាតូនឹងកាន់តែទាញដៃអាមេរិកឲ្យលូកចូលកាន់តែជ្រៅនៅក្នុងបញ្ហាជម្លោះទាំងនោះ ដែលប្រការនេះហើយអាចធ្វើឲ្យសមត្ថភាពអាមេរិកក្នុងការឆ្លើយតបនឹងវិបត្តិនៅអាស៊ីចាប់ផ្ដើមថមថយ ហើយចិននឹងឆ្លៀតយកឱកាសនេះបង្កើនអំណាចខ្លួននៅឥណ្ឌូប៉ាស៊ីហ្វិក៕

ដោយ៖ ឈាង