ធ្លាក់ភ្លៀងមួយម៉ោង ទីក្រុងហូជីមិញ ត្រូវទឹកជន់លិច ល្ហាចល្ហឹម

តាមការចុះផ្សាយរបស់សារព័ត៌មាន VN Express កាលពីថ្ងៃពុធទី៣ខែកក្កដា ឆ្នាំ២០២៤, ភ្លៀងធ្លាក់ត្រឹមមួយម៉ោង បណ្តាលឲ្យតំបន់មួយចំនួនក្នុងទីក្រុងហូជីមិញ ត្រូវជន់លិចបង្កទុក្ខលំបាកដល់ប្រជាជន ហើយមិនមែនត្រឹមទីក្រុងនេះទេ, ខេត្ត Dong Nai និង Binh Thuan ក៏រងគ្រោះដោយទឹកជំនន់ផងដែរ ក្រោយភ្លៀងធ្លាក់ដូចហែកមេឃ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

នៅសង្កាត់មួយចំនួនដូចជា Binh Thanh និង Go Vap ក៏ដូចជាកណ្តាលទីក្រុងផងដែរនោះ ទឹកបានជន់លិចជម្រៅកន្លះម៉ែត្រ លិចទាំងរថយន្ត ហើយមនុស្សត្រូវជាប់គាំង ចង់ចេញទៅណាក៏មិនរួច។

មិនត្រឹមប៉ុណ្ណឹង ព្យុះភ្លៀងពាំនាំមកជាមួយកម្លាំងខ្យល់បក់ខ្លាំង ក៏បានផ្តួលរំលំដើមឈើតាមដងផ្លូវ បាក់សង្កត់យានយន្ត បង្កជាការកកស្ទះចរាចរណ៍នៅទីតាំងមួយចំនួនផងដែរ។

សូមបញ្ជាក់ថា ពេលនេះ ប្រទេសវៀតណាម បានឈានចូលរដូវវស្សាហើយ ហើយភ្លៀងធ្លាក់ខ្លាំង ជាមួយផ្គររន្ទះ និងព្យុះ បានវាយប្រហារទីក្រុងហូជីមិញ ជាញឹកញាប់។

យោងតាមស្ថានីយ៍ជលសាស្ត្របានឲ្យដឹងថា តំបន់ខ្លះនៃទីក្រុង បានជួបប្រទះកម្រិតភ្លៀងធ្លាក់ ១៥០មិល្លីម៉ែត្រ, ​ខ្លះ៦១មិល្លីម៉ែត្រ និងខ្លះទៀត ៤០មិល្លីម៉ែត្រ៕

អត្ថបទ៖ សុខ សុវណ្ណ

ចុចអាន៖ ទីក្រុងហូជីមិញ ធ្លាក់ភ្លៀងមួយមេជួយឲ្យមេឃត្រជាក់ប្រហែល ៥ នាទី