សមាជិកណាតូ ថា លោកខាងលិច ចង់បង្កើតសង្គ្រាមលោកលើកទី៣

ថ្លែងប្រាប់អ្នកសារព័ត៌មានក្រោយចាកចេញពីកិច្ចប្រជុំកំពូលអង្គការកិច្ចសហប្រតិបត្តិការសៀងហៃ (SCO), លោក Recep Tayyip Erdogan ប្រធានាធិបតីតួកគីដែលជាសមាជិកណាតូ បានលើកឡើងថា “ពិតជារឿងគួរឲ្យសោកស្តាយជាទីបំផុត ដែលមានប្រទេសនៅលោកខាងលិច ប្រកាន់យកវិធីសាស្រ្ត ចង់បង្កឲ្យមានសង្គ្រាមលោកលើកទី៣”។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោក Erdogan អះអាងថា មហាអំណាចលោកខាងលិចមួយចំនួន ហាក់ដូចជាកំពុងព្យាយាមខ្លាំងណាស់ ដើម្បីបង្វែរជម្លោះនៅអ៊ុយក្រែន ឲ្យប្រែក្លាយទៅជាសង្រ្គាមលោកទាំងមូល ប៉ុន្តែលោក​សង្ឃឹម​ថា ​សន្តិភាព​នឹង​នៅតែកើតឡើងបាន។

ស្របពេលជាមួយគ្នានោះដែរ លោកបានស្តីបន្ទោសឥតសំចៃមាត់ទៅលើក្រុមហ៊ុនផលិត​សព្វាវុធ ដែលព្យាយាមចាក់ឲ្យផ្ទុះជម្លោះ ហើយមហាអំណាចលោកខាងលិច នៅតែបន្តផ្តល់ជំ​នួយយោធាដល់អ៊ុយក្រែន។ នេះបង្ហាញថា វាច្បាស់ណាស់ ជាការធ្វើពាណិជ្ជកម្មអាវុធពិតៗ។

មិនត្រឹមប៉ុណ្ណឹង ប្រមុខរដ្ឋតួកគីអះអាងថា លោកខាងលិច ខុសពីរុស្ស៊ីដាច់, រុស្ស៊ីបាននិងកំពុងជំរុញការសន្ទនា និងដំណោះស្រាយដោយសន្តិវិធីលើជម្លោះអ៊ុយក្រែនខណៈទីក្រុងអង់ការ៉ា សង្ឃឹមថា ទីក្រុងកៀវនិងមូស្គូ នឹងចុះហត្ថលេខាលើកិច្ចព្រមព្រៀងសន្តិភាពក្នុងពេលឆាប់ៗនេះ។

ពាក់ព័ន្ធបញ្ហានេះដែរ កាលពីខែមុន ប្រធានាធិបតីរុស្ស៊ីលោក វ្ល៉ាឌីមៀរ ពូទីន សង្កត់ធ្ងន់ថា រុស្ស៊ីបានត្រៀមខ្លួនរួចជាស្រេចអស់ហើយ ដើម្បីបើកការចរចាសន្តិភាពជាមួយអ៊ុយក្រែនភ្លាមៗ ប្រសិនបើក្រុងកៀវដកទ័ពចេញពីតំបន់ Donbass និងអតីតតំបន់ពីរផ្សេងទៀតរបស់ខ្លួន ក៏ដូចជាការប្តេជ្ញាចិត្តក្នុងស្ថានភាពអព្យាក្រឹតផងដែរ។ ទោះបីជាយ៉ាងណាក៏ដោយ ទីក្រុងកៀវ និង​អ្នក​គាំទ្រ​លោក​ខាង​លិច​ បាន​ច្រានចោល​សំណើ​នេះដោយមិនអើពើនិងខ្វល់ខ្វាយឡើយ៕

អត្ថបទ៖ សុខ សុវណ្ណ