ព័ត៌មានអន្ដរជាតិ

ជាង១ពាន់នាក់ ពុលគីមឈី នៅកូរ៉េខាងត្បូង

បានផុស

៣ ខែ មុន

នៅ

ថ្ងៃអាទិត្យ ៧ កក្កដា ២០២៤

ដោយ

មនុស្សប្រមាណ ១ពាន់នាក់ នៅកូរ៉េខាងត្បូង បានកើតមានអាការៈពុលចំណីអាហារ ក្រោយទទួលទានគីមឈី ដែលមានផ្ទុកនូវមេរោគណូរ៉ូវីរុស។ នេះបើយោងតាមការចុះផ្សាយរបស់សារព័ត៌មាន BBC កាលពីថ្ងៃទី៦ ខែកក្កដា ឆ្នាំ២០២៤។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ហេតុការណ៍ពុលនេះ បានកើតឡើងនៅទីក្រុង Namwon ស្ថិតនៅភាគនិរតីប្រទេសកូរ៉េខាងត្បូង ហើយគិតត្រឹមរសៀលថ្ងៃសៅរ៍ តួលេខមនុស្សដែលពុលគីមឈី មានដល់ចំនួន ១០២៥នាក់។ យ៉ាងណាមិញ ពុំមានរបាយការណ៍អំពីមនុស្សស្លាប់នោះទេ។

អាជ្ញាធរក្នុងតំបន់ បានឲ្យដឹងថា គីមឈី ដែលពុល ត្រូវបានចែកចាយដោយក្រុមហ៊ុនមួយ ទៅកាន់អាហារដ្ឋាននៅតាមសាលារៀននានាក្នុងទីក្រុង។ សិស្សសាលា និងបុគ្គលិកនៅតាមសាលារៀនចំនួន ២៤កន្លែងផ្សេងៗគ្នា មានអាការៈក្អួតចង្អោរ រាក និងចុកពោះ។ អាជ្ញាធរ មិនទាន់បង្ហើបឲ្យដឹងពីឈ្មោះរបស់ក្រុមហ៊ុនបង្កនៅឡើយទេ ដោយរង់ចាំការស៊ើបអង្កេតបន្តជាមុនសិន។

ក្រោយកើតហេតុការណ៍ដ៏អាក្រក់នេះ នាយកដ្ឋានគ្រោះមហន្តរាយ និងសុវត្ថិភាពនៅទីក្រុង Namwon បានសម្រេចផ្អាកជាបណ្ដោះអាសន្ននៃការផលិត និងលក់ផលិតនានារបស់ក្រុមហ៊ុនដែលពាក់ព័ន្ធ ហើយជាពិសេសនោះគឺប្រមូលត្រឡប់មកវិញនូវរាល់ផលិតផលដែលបានចែកចាយរួចនៅលើទីផ្សារ។

សូមបញ្ជាក់ថា ណូរ៉ូវីរុស គឺជាមេរោគដែលងាយឆ្លងខ្លាំងណាស់ តាមរយៈការចាប់កាន់ផ្ទៃដែលមានសាយភាយមេរោគ ឬក៏ប៉ះពាល់ដោយផ្ទាល់ជាមួយអ្នកដែលឆ្លងមេរោគ។ មនុស្សភាគច្រើនដែលឆ្លងមេរោគណូរ៉ូវីរុស អាចជាសះស្បើយត្រឹមពេល២ឬ៣ថ្ងៃប៉ុណ្ណោះ ដោយមិនចាំបាច់សម្រាកព្យាបាលនៅមន្ទីរពេទ្យឡើយ ប៉ុន្តែអ្នកខ្លះអាចធ្លាក់ខ្លួនឈឺធ្ងន់ធ្ងរក៏មាន៕

ដោយ៖ ឈាង

Related Topics:ប្រទេសកូរ៉េខាងត្បូង