វៀតណាម ព្រមានឲ្យពលរដ្ឋត្រៀមខ្លួន ព្រោះថា រលកកម្តៅនឹងវាយប្រហារក្នុងសប្តាហ៍នេះ

ប្រទេសវៀតណាម បានប្រកាសឲ្យពលរដ្ឋរបស់ខ្លួននៅភាគខាងជើងនិងកណ្តាល ត្រូវត្រៀមលក្ខណៈព្រោះថា ក្នុងសប្តាហ៍នេះ ការវិវឌ្ឍនៃប្រព័ន្ធសម្ពាធទាបនៅប៉ែកខាងលិច នឹងបង្កឲ្យមានរលកកម្តៅ ខណៈសីតុណ្ហភាពត្រូវបានគេព្យាករថា នឹងកើនឡើងដល់​ ៣៩អង្សាសេ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

តាមសេចក្តីរាយការណ៍របស់ VN Express កាលពីថ្ងៃអាទិត្យទី៦ខែកក្កដា, ចាប់ពីថ្ងៃអង្គារដល់ថ្ងៃសៅរ៍ សីតុណ្ហភាពនៅតំបន់ទាំងនោះ អាចស្ថិតនៅចន្លោះ​៣៥-៣៩អង្សាសេ ប៉ុន្តែយ៉ាងណា នៅតាមតំបន់ភ្នំ ក៏មានភ្លៀងធ្លាក់និងផ្គររន្ទះផងដែរ។

មិនមែនតែនៅតាមបណ្តាខេត្តទេ ព្រោះថា បើតាមការព្យាកររបស់មជ្ឈមណ្ឌលជាតិសម្រាប់ការព្យាករធនធានជលសាស្ត្រ, ទីក្រុងហាណូយ ក៏នឹងជួបសីតុណ្ហភាពឡើងដល់ ៣៥អង្សាសេដែរនៅពាក់កណ្តាលសប្តាហ៍នេះ ហើយនឹងកើនឡើងដល់ ៣៦-៣៧អង្សាសេចាប់ពីថ្ងៃព្រហស្បតិ៍ទៅ ខណៈសីតុណ្ហភាពពេលយប់ មានចាប់ពី២៧-២៨អង្សាសេ។

ស្របពេលជាមួយគ្នានោះ ទិន្នន័យពីមជ្ឈមណ្ឌលខាងលើបង្ហាញថា ឆ្នាំនេះ សីតុណ្ហភាពជាមធ្យមក្នុងខែកក្កដានៅទូទាំងប្រទេស គឺនឹងកើនខ្ពស់ជាងឆ្នាំមុន ចន្លោះពី០.៥ទៅ១អង្សាសេ។

ក្រៅពីរលកកម្តៅ ប្រទេសវៀតណាម ក៏នឹងអាចជួបព្យុះត្រូពិក ១ឬ២ ដែលកកើតឡើងនៅក្នុងសមុទ្រខាងកើតផងដែរ ដោយវានឹងវាយប្រហារហើយជះឥទ្ធិពលលើដីគោកថែមទៀតផង៕

អត្ថបទ៖ សុខ សុវណ្ណ