ព័ត៌មានអន្ដរជាតិ

ហ្វីលីពីន ចុះកិច្ចព្រមព្រៀងអនុញ្ញាតឲ្យជប៉ុន ធ្វើសមយុទ្ធបាញ់គ្រាប់ពិតលើទឹកដីរបស់ខ្លួន

បានផុស

៧ ខែ មុន

នៅ

ថ្ងៃចន្ទ ៨ កក្កដា ២០២៤

ដោយ

Chheang

ជប៉ុន និងហ្វីលីពីន បានចុះហត្ថលេខាលើកិច្ចព្រមព្រៀងការពារជាតិដ៏សំខាន់មួយ នៅថ្ងៃចន្ទទី៨ ខែកក្កដា ឆ្នាំ២០២៤ ដែលអនុញ្ញាតឲ្យមានការដាក់ពង្រាយកងកម្លាំងជប៉ុន សម្រាប់សមយុទ្ធយោធារួមគ្នា ដោយក្នុងនោះក៏មានទាំងការធ្វើសមយុទ្ធបាញ់គ្រាប់ពិតនៅលើទឹកដីហ្វីលីពីនផងដែរ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

កិច្ចព្រមព្រៀងនេះ ធ្វើឡើងបើទោះជាប្រទេសជប៉ុនធ្លាប់មានប្រវត្តិយ៉ាងឃោរឃៅដាក់លើហ្វីលីពីន កាលពីអំឡុងសង្គ្រាមលោកលើកទី២ក៏ដោយ។ ប៉ុន្តែបច្ចុប្បន្ន ការកសាងសម្ព័ន្ធភាពរវាងប្រទេសទាំង២កាន់តែមានភាពល្អប្រសើរឡើងជាបន្តបន្ទាប់ ខណៈដែលពួកគេកំពុងប្រឈមមុខនឹងការអះអាងកាន់តែខ្លាំងឡើងរបស់រដ្ឋាភិបាលក្រុងប៉េកាំង នៅលើដែនសមុទ្រចិនខាងត្បូង។

នៅក្នុងកិច្ចព្រមព្រៀងការពារជាតិទ្វេភាគីនេះ ក៏បានអនុញ្ញាតឲ្យកងកម្លាំងហ្វីលីពីនចូលទៅកាន់ប្រទេសជប៉ុនវិញផងដែរ សម្រាប់ការហ្វឹកហ្វឺនប្រយុទ្ធរួមគ្នា។ ការចុះហត្ថលេខាលើកិច្ចព្រមព្រៀង ធ្វើឡើងដោយរដ្ឋមន្ត្រីការពារជាតិហ្វីលីពីន លោក Gilberto Teodoro និងរដ្ឋមន្ត្រីការបរទេសជប៉ុន លោកស្រី Yoko Kamikawa នៅក្នុងកម្មវិធីរៀបចំឡើងនៅក្រុងម៉ានីល ដែលមានលោក Ferdinand Marcos Jr. ប្រធានាធិបតីហ្វីលីពីន ធ្វើជាសាក្សី។ វានឹងត្រូវចូលជាធរមានភ្លាមៗ បន្ទាប់ពីការផ្តល់សច្ចាប័នដោយក្រុមមន្ត្រីនៃប្រទេសទាំង២។

រដ្ឋាភិបាលហ្វីលីពីន បាននិយាយនៅក្នុងសេចក្តីថ្លែងការណ៍មួយថា លោកស្រី Kamikawa និងរដ្ឋមន្ត្រីការពារជាតិជប៉ុន លោក Minoru Kihara កំពុងនៅក្នុងទីក្រុងម៉ានីល ដើម្បីជួបពិភាក្សាជាមួយភាគីពាក់ព័ន្ធរបស់ហ្វីលីពីន អំពីវិធីធ្វើឲ្យទំនាក់ទំនងកាន់តែស៊ីជម្រៅបន្ថែមទៀត។

សូមបញ្ជាក់ថា សន្ធិសញ្ញាការពារជាតិជាមួយហ្វីលីពីន គឺជាកិច្ចព្រមព្រៀងដំបូងគេដែលជប៉ុនបង្កើតនៅអាស៊ី។ ជប៉ុនបានចុះហត្ថលេខាលើកិច្ចព្រមព្រៀងស្រដៀងគ្នានេះជាមួយនឹងអូស្ត្រាលីក្នុងឆ្នាំ២០២២ និងជាមួយអង់គ្លេសកាលពីឆ្នាំ២០២៣៕

ដោយ៖ ឈាង