ចិន ស្តីឲ្យណាតូ ថា កំពុងគំរាមកំហែងដល់សន្តិភាព និងស្ថិរភាពពិភពលោក

ឆ្លើយតបសំណួររបស់ Bloomberg ស្តីពីរបាយការណ៍ថ្មីៗដែលថា ណាតូគ្រោងនឹងចុះហត្ថលេខាលើកិច្ចព្រមព្រៀងសហប្រតិបត្តិការជាមួយប្រទេសជប៉ុន កូរ៉េខាងត្បូង អូស្ត្រាលី និងនូវែលសេឡង់នៅឯកិច្ចប្រជុំកំពូលក្នុងទីក្រុងវ៉ាស៊ីនតោននាពេលខាងមុខ, អ្នកនាំពាក្យក្រសួងការបរទេសចិន លោក Lin Jian បានអះអាងថា សម្ព័ន្ធភាពយោធា ដឹកនាំដោយសហរដ្ឋអាមេរិកមួយនេះ គឺជាការគំរាមកំហែងដល់សន្តិភាពនិងស្ថិរភាពពិភពលោក ដោយសារតែចិត្តគំនិតសង្គ្រាមត្រជាក់ ដែលចាក់ឫសគល់យ៉ាងជ្រៅ និងការលម្អៀងខាងមនោគមវិជ្ជា។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

អ្នកនាំពាក្យរូបនេះបញ្ជាក់ថា ណាតូ គឺជាផលិតផលពីសង្គ្រាមត្រជាក់និងជាសម្ព័ន្ធមិត្តយោធាដ៏ធំបំផុតរបស់ពិភពលោក ហើយត្បិតតែមានការអះអាងថា ពួកគេជាអង្គការក្នុងតំបន់និងការពារក៏ដោយ ប៉ុន្តែប្លុកនេះ បានបន្តពង្រីកអំណាចរបស់ខ្លួនហួសព្រំដែន ទម្លុះតំបន់ការពារ និងបង្កការប្រឈមមុខដាក់គ្នារួចបាត់ទៅហើយ។ 

ស្របពេលជាមួយគ្នានោះ លោកបន្តថា “ណាតូគួរតែគោរពតាមគោលជំហររបស់អង្គការក្នុងតំបន់, បញ្ឈប់ការបង្កើតភាពតានតឹងនៅអាស៊ីប៉ាស៊ីហ្វិក, លុបបំបាត់គំនិតសង្រ្គាមត្រជាក់និងការប្រឈមមុខដាក់គ្នា ហើយឈប់ធ្វើឲ្យអឺរ៉ុបរញ៉េរញ៉ៃ និងព្យាយាមធ្វើឲ្យអាស៊ីប៉ាស៊ីហ្វិករញ៉េរញ៉ៃ”។

សូមបញ្ជាក់ថា ការអត្ថាធិប្បាយរបស់លោក Lin កើតឡើងចំពេលណាតូ កំពុងព្យាយាមបង្កើនទំនាក់ទំនងជាមួយបណ្តាប្រទេសនៅទូទាំងតំបន់អាស៊ីប៉ាស៊ីហ្វិក ទាំងដែលមាត់និយាយថា ខ្លួនមិនស្វែងរកការពង្រីកជាផ្លូវការចូលទៅក្នុងតំបន់នេះទេ។

កាលពីដើមឆ្នាំនេះដែរ អគ្គលេខាធិការអង្គការណាតូ លោក Jens Stoltenberg បានពន្យល់ថា ខ្លួនត្រូវតែឆ្លើយតបទៅនឹងទិដ្ឋភាពសន្តិសុខ ដែលតែងផ្លាស់ប្តូរជានិច្ចនៅអាស៊ី ជាពិសេសដោយសារតែសកម្មភាពរបស់ចិន។ លោក​ប្រាប់​អ្នក​ចូល​រួម​ក្នុងកិច្ចប្រជុំផ្តាច់​មុខ​ក្នុង​ទីក្រុង Davos កាល​ពី​ខែ​មករា​ថា “នេះ​មិន​មែន​អង្គការ​ណាតូ​ដែល​ចូល​ក្នុង​តំបន់​អាស៊ី​ទេ ប៉ុន្តែគឺដោយសារតែ ​ប្រទេស​ចិន​មក​ជិត​យើងប៉ុណ្ណោះ”។

យ៉ាងណាក្តី សូម្បីប្រធានាធិបតីរុស្ស៊ីលោក វ្ល៉ាឌីមៀរ ពូទីន ក៏លើកឡើងដែរ បំណងរបស់ណាតូនៅអាស៊ីប៉ាស៊ីហ្វិក គឺតំណាងឲ្យការគំរាមកំហែងដល់ប្រទេសទាំងអស់ក្នុងតំបន់ រួមទាំងសហព័ន្ធរុស្ស៊ី ហើយទីក្រុងមូស្គូ ប្តេជ្ញាមិនអនុញ្ញាតឲ្យសកម្មភាពទាំងនេះប្រព្រឹត្តទៅដោយគ្មានការឆ្លើយតបឡើយ៕

អត្ថបទ៖ សុខ សុវណ្ណ

ចុចអាន៖ កូរ៉េខាងជើង៖ អាមេរិក កំពុងបង្កើត “ណាតូ Version អាស៊ី”