ព័ត៌មានអន្ដរជាតិ
បើកកិច្ចប្រជុំណាតូ, លោក បៃដិន ប្រកាសផ្តល់ខែលការពារអាកាសថ្មី ឲ្យអ៊ុយក្រែន
ថ្លែងបើកកិច្ចប្រជុំកំពូលអង្គការណាតូក្នុងទីក្រុងវ៉ាស៊ីនតោន នៅថ្ងៃអង្គារទី៩ខែកក្កដាឆ្នាំ២០២៤ ប្រធានាធិបតិអាមេរិកលោក ចូ បៃដិន បានប្រកាសផ្តល់ប្រព័ន្ធការពារដែនអាកាសថ្មី ៥ប្រភេទ ទៅឲ្យអ៊ុយក្រែន។ នេះបើតាមការចុះផ្សាយរបស់ BBC។

លោក បៃដិន និយាយថា “ដូចដែលបានប្រាប់អ៊ីចឹង អ៊ុយក្រែននឹងទទួលបានឧបករណ៍ស្ទាក់ចាប់រាប់រយគ្រឿងបន្ថែមទៀតនៅឆ្នាំក្រោយ ដែលនឹងជួយការពារទីក្រុងរបស់អ៊ុយក្រែន ប្រឆាំងមីស៊ីលរុស្ស៊ី និងការពារកងទ័ពអ៊ុយក្រែន ដែលកំពុងប្រឈមមុខនឹងការវាយប្រហារនៅសមរភូមិជួរមុខ”។
តាមការបញ្ជាក់ពីលោក បៃដិន, “មុនសង្គ្រាមនេះ លោក ពូទីន គិតថា ណាតូនឹងបែកបាក់ ប៉ុន្តែសព្វថ្ងៃ ណាតូខ្លាំងជាងអ្វីដែលធ្លាប់មានក្នុងប្រវត្តិសាស្ត្រទៅទៀត។ នៅពេលសង្រ្គាមនេះផ្ទុះឡើង អ៊ុយក្រែនគឺជាប្រទេសសេរី ហើយសព្វថ្ងៃ អ៊ុយក្រែន ក៏នៅតែជាប្រទេសសេរី ហើយពេលសង្គ្រាមចប់ អ៊ុយក្រែនក៏នៅតែជាប្រទេសសេរី និងឯករាជ្យដដែល”។
សម្តីម៉ាត់ៗរបស់បុរសវ័យ៨១ឆ្នាំរូបនេះក្នុងសេចក្តីប្រកាសខាងលើ ត្រូវបានគេមើលឃើញថា ជាការបញ្ជាក់ពីភាពរឹងមាំរបស់ខ្លួនបង្ហាញដល់មេដឹកនាំបរទេសថា លោកនៅតែអាចបំពេញភារកិច្ចដឹកនាំសម្ព័ន្ធភាពយោធាដែលមានសមាជិក៣២ប្រទេសមួយនេះ ដោយរលូនជាទីបំផុត។

សេចក្តីប្រកាសផ្តល់ខែលការពារនេះទៀតសោត គឺកើតឡើងត្រឹមមួយថ្ងៃប៉ុណ្ណោះ បន្ទាប់ពីរុស្ស៊ី បើកការវាយប្រហារដោយមីស៊ីលយ៉ាងសាហាវ ទៅលើមន្ទីរពេទ្យកុមារនិងគោលដៅស៊ីវិលផ្សេងទៀតនៅក្នុងប្រទេសអ៊ុយក្រែន។
មន្ទីរពេទ្យកុមារធំបំផុតរបស់ប្រទេសអ៊ុយក្រែន ឈ្មោះ Ohmatdyt បានរងការវាយប្រហារយ៉ាងដំណំ ហើយបើតាមការបញ្ជាក់ពីអភិបាលក្រុងកៀវលោក Vitaliy Klitschko បានឲ្យដឹងថា អ្នកស្លាប់ទាំង២នៅទីនោះ គឺជាមនុស្សពេញវ័យដែលមានម្នាក់ជាវេជ្ជបណ្ឌិត។
ទោះបីជាយ៉ាងណាក៏ដោយ ភាគីរុស្ស៊ី បានបដិសេធថា ខ្លួនមិនមែនកំណត់គោលមន្ទីរពេទ្យនោះទេ ហើយការដែលមន្ទីរពេទ្យត្រូវរងគ្រោះ គឺដោយសារតែបំណែកគ្រាប់ធ្លាក់ពីខែលការពារមីស៊ីលរបស់អ៊ុយក្រែនប៉ុណ្ណោះ។
សូមបញ្ជាក់ថា Ohmatdyt គឺជាមន្ទីរពេទ្យធំ ដែលមានឯកទេសខាងរោគមហារីក និងការវះកាត់ប្តូរសរីរាង្គ។ ក្រុមគ្រូពេទ្យនិយាយថា មានកុមារប្រហែល២០នាក់ កំពុងទទួលការព្យាបាលពេលដែលរុស្ស៊ីបាញ់មីស៊ីលចំនោះ៕
អត្ថបទ៖ សុខ សុវណ្ណ

-
ព័ត៌មានអន្ដរជាតិ២១ ម៉ោង ago
កម្មករសំណង់ ៤៣នាក់ ជាប់ក្រោមគំនរបាក់បែកនៃអគារ ដែលរលំក្នុងគ្រោះរញ្ជួយដីនៅ បាងកក
-
ព័ត៌មានអន្ដរជាតិ៤ ថ្ងៃ ago
រដ្ឋបាល ត្រាំ ច្រឡំដៃ Add អ្នកកាសែតចូល Group Chat ធ្វើឲ្យបែកធ្លាយផែនការសង្គ្រាម នៅយេម៉ែន
-
សន្តិសុខសង្គម២ ថ្ងៃ ago
ករណីបាត់មាសជាង៣តម្លឹងនៅឃុំចំបក់ ស្រុកបាទី ហាក់គ្មានតម្រុយ ខណៈបទល្មើសចោរកម្មនៅតែកើតមានជាបន្តបន្ទាប់
-
ព័ត៌មានជាតិ១ ថ្ងៃ ago
បងប្រុសរបស់សម្ដេចតេជោ គឺអ្នកឧកញ៉ាឧត្តមមេត្រីវិសិដ្ឋ ហ៊ុន សាន បានទទួលមរណភាព
-
ព័ត៌មានជាតិ៤ ថ្ងៃ ago
សត្វមាន់ចំនួន ១០៧ ក្បាល ដុតកម្ទេចចោល ក្រោយផ្ទុះផ្ដាសាយបក្សី បណ្តាលកុមារម្នាក់ស្លាប់
-
ព័ត៌មានអន្ដរជាតិ៥ ថ្ងៃ ago
ពូទីន ឲ្យពលរដ្ឋអ៊ុយក្រែនក្នុងទឹកដីខ្លួនកាន់កាប់ ចុះសញ្ជាតិរុស្ស៊ី ឬប្រឈមនឹងការនិរទេស
-
ព័ត៌មានអន្ដរជាតិ៣ ថ្ងៃ ago
តើជោគវាសនារបស់នាយករដ្ឋមន្ត្រីថៃ «ផែថងថាន» នឹងទៅជាយ៉ាងណាក្នុងការបោះឆ្នោតដកសេចក្តីទុកចិត្តនៅថ្ងៃនេះ?
-
សន្តិសុខសង្គម១៩ ម៉ោង ago
ការដ្ឋានសំណង់អគារខ្ពស់ៗមួយចំនួនក្នុងក្រុងប៉ោយប៉ែតត្រូវបានផ្អាក និងជម្លៀសកម្មករចេញក្រៅ