តួលេខមនុស្សស្លាប់ ក្នុងហេតុការណ៍បាក់អណ្ដូងរ៉ែមាសនៅឥណ្ឌូណេស៊ី កើនដល់ ២៣នាក់

មនុស្សស្លាប់បានកើនឡើងដល់​២៣នាក់ហើយ និងរាប់សិបនាក់បាត់ខ្លួន បន្ទាប់ពីបំណាក់ដីវាយប្រហារតំបន់រុករករ៉ែមាសនៅលើកោះ Sulawesi នៃប្រទេសឥណ្ឌូណេស៊ី។ នេះបើយោងតាមការចេញផ្សាយរបស់ទូរទស្សន៍ជាតិជប៉ុន NHK នៅថ្ងៃទី ១០ ខែ កក្កដា​។

យោងតាមប្រធានការិយាល័យស្វែងរក និងជួយសង្គ្រោះបានឲ្យដឹងថា មានអ្នកភូមិជាង១០០ នាក់កំពុងជីករកមាសកាលពីថ្ងៃអាទិត្យនៅក្នុងភូមិដាច់ស្រយាលនៅភ្នំ Bone Bolango បន្ទាប់មកក៏មានបំណាក់ដីវាយប្រហារកប់កន្លែងស្នាក់នៅបណ្តោះអាសន្នរបស់ពួកគេតែម្តង។

ទោះបីជាយ៉ាងណាក៏ដោយ អ្នកភូមិចំនួន២៣នាក់ត្រូវបានជួយសង្គ្រោះ ប៉ុន្តែក្នុងនោះមាន ១៨ នាក់រងរបួស។ ចំណែកសាកសពមនុស្សទាំង ២៣ នាក់ ដែលត្រូវបានរកឃើញគឺក្នុងនោះក៏រួមមានទាំងស្ត្រី ៣នាក់ និងក្មេងប្រុសអាយុ ៤ ឆ្នាំម្នាក់ផងដែរ។

មុនបំណាក់ដីកើតឡើង គេឃើញមានភ្លៀងធ្លាក់យ៉ាងគំហុក បានវាយលុកតំបន់នេះ ចាប់តាំងពីថ្ងៃសៅរ៍មក ដែលជាហេតុបណ្តាលឲ្យបាក់ទំនប់ទឹក បង្កជាគ្រោះទឹកជំនន់ លិចដល់ដំបូលផ្ទះប្រជាពលរដ្ឋក្នុងភូមិចំនួនប្រាំ ខណៈមនុស្ស​ជាង​១ ០០០​នាក់​បាន​ភៀស​ខ្លួន​ដើម្បី​សុវត្ថិភាព។

គួរបញ្ជាក់ថា ភ្លៀងមូសុងតែងបណ្តាលឲ្យមានការរអិលបាក់ដីជាញឹកញាប់ និងទឹកជំនន់ភ្លាមៗនៅក្នុងប្រទេសឥណ្ឌូណេស៊ី ដែលជាប្រទេសមានប្រជុំកោះជាង ១៧ ០០០ ហើយមានមនុស្សរាប់លាននាក់រស់នៅក្នុងតំបន់ភ្នំ ឬនៅជិតតំបន់វាលទំនាប។

ប្រតិបត្តិការរុករករ៉ែខុសច្បាប់ ក៏ជារឿងធម្មតាដែរនៅក្នុងប្រទេសនេះព្រោះតែមនុស្សមួយចំនួន មានជីវភាពខ្វះខាត។ កាលពីឆ្នាំ ២០២២ក៏មានបំណាក់ដីលើអណ្តូងរ៉ែមាសខុសច្បាប់មួយនៅក្នុងស្រុក Mandailing Natal នៃកោះស៊ូម៉ាត្រាខាងជើងដែរ ដោយកាលនោះបានសម្លាប់ស្ត្រីចំនួន ១២ នាក់៕

អត្ថបទ៖ ប៊ុន សុភាព