ព័ត៌មានអន្ដរជាតិ

តៃវ៉ាន់ ថា នាវាដឹកយន្តហោះចម្បាំងចិន ត្រៀមធ្វើសមយុទ្ធនៅប៉ាស៊ីហ្វិក

បានផុស

៦ ម៉ោង មុន

នៅ

ថ្ងៃពុធ ១០ កក្កដា ២០២៤

ដោយ

ក្រសួងការពារជាតិតៃវ៉ាន់ បានប្រកាសនៅថ្ងៃទី១០ ខែកក្កដា ឆ្នាំ២០២៤ នេះថា នាវាដឹកយន្តហោះចម្បាំងចិន Shandong បានឆ្លងកាត់ជិតភាគខាងជើងប្រទេសហ្វីលីពីន ដើម្បីត្រៀមធ្វើសមយុទ្ធនៅមហាសមុទ្រប៉ាស៊ីហ្វិក។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

តៃវ៉ាន់ បានបញ្ជាក់ថា នៅព្រឹកព្រលឹមថ្ងៃពុធនេះ ខ្លួនបានរកឃើញយន្តហោះយោធាចិនចំនួន ៣៦គ្រឿង មានដូចជា យន្តហោះចម្បាំង J-16 និងយន្តហោះទម្លាក់គ្រាប់បែកនុយក្លេអ៊ែរ H-6 កំពុងហោះហើរទៅកាន់ភាគខាងត្បូង និងភាគអាគ្នេយ៍នៃកោះតៃវ៉ាន់ ឆ្ពោះទៅភាគខាងលិចមហាសមុទ្រប៉ាស៊ីហ្វិក ដើម្បីធ្វើសមយុទ្ធជាមួយនាវាចម្បាំង Shandong។ រដ្ឋមន្ត្រីក្រសួងការពារជាតិតៃវ៉ាន់ លោក Wellington Koo បានអះអាងថា ក្រុងតៃប៉ិ មានសមត្ថភាពអាចតាមដានដឹងពីរាល់សកម្មភាពរបស់នាវាចម្បាំងដ៏ធំរបស់ចិនមួយនេះបាន។

លោក Koo បានប្រាប់ថា នាវាចម្បាំងចិន មិនបានឆ្លងកាត់ច្រកទឹក Bashi ដែលជាច្រកផ្លូវទឹកខណ្ឌចែករវាងតៃវ៉ាន់ និងហ្វីលីពីន ដូចសព្វដងនោះទេ។ លោក បន្តថា នាវាចិនបានបរទៅភាគខាងត្បូងជំនួសវិញ ដោយឆ្លងតាមច្រក Balintang សំដៅទៅមហាសមុទ្រប៉ាស៊ីហ្វិកតែម្ដង។

ពាក់ព័ន្ធនឹងការលើកឡើងរបស់តៃវ៉ាន់នេះ ខាងភាគីចិនមិនទាន់មានការឆ្លើយតបណាមួយនោះទេ។ ប៉ុន្តែបើសម្រាប់ហ្វីលីពីនវិញ បានបង្ហាញក្ដីព្រួយបារម្ភអំពីការដាក់ពង្រាយនាវាដឹកយន្តហោះចម្បាំងរបស់ចិននេះជាខ្លាំង។ លោកវរសេនីយ៍ឯក Francel Margareth Taborlupa របស់ហ្វីលីពីន បាននិយាយថា “យើងសង្កត់ធ្ងន់លើសារៈសំខាន់នៃការរក្សាសន្តិភាព និងស្ថិរភាពក្នុងតំបន់ និងជំរុញឲ្យភាគីទាំងអស់ប្រកាន់ខ្ជាប់នូវច្បាប់ និងបទដ្ឋានអន្តរជាតិ”។

ការលើកឡើងរបស់ហ្វីលីពីន ធ្វើឡើងខណៈបច្ចុប្បន្នជម្លោះជាមួយចិនកំពុងកើនឡើងកម្ដៅខ្លាំងគួរឲ្យកត់សម្គាល់ ជុំវិញបញ្ហាដែនទឹកនៅតំបន់ Second Thomas Shoal ក្នុងសមុទ្រចិនខាងត្បូង។

គួររំឭកថា តៃវ៉ាន់ តែងតែយកចិត្តទុកជាខ្លាំងចំពោះរាល់សកម្មភាពយោធាចិន បន្ទាប់ពីរដ្ឋាភិបាលក្រុងប៉េកាំង ដែលរមែងអះអាងថាតៃវ៉ាន់ជាអធិបតេយ្យភាពរបស់ខ្លួននោះ បានបង្កើនសកម្មភាពជាញឹកញាប់នៅជុំវិញក្រុងតៃប៉ិ ក្នុងរយៈពេលជាង៤ឆ្នាំចុងក្រោយនេះ៕

ដោយ៖ ឈាង