ហ្វីលីពីនរកឃើញករណីឆ្លងវីរុសអាហ្វ្រិកខាងត្បូងលើកដំបូង

ក្រសួងសុខាភិបាលហ្វីលីពីនបាននិយាយនៅថ្ងៃអង្គារនេះថា ប្រទេសហ្វីលីពីនបានរកឃើញករណីឆ្លងជំងឺកូវីដ ១៩ បំប្លែងខ្លួនប្រភេទថ្មីរបស់អាហ្រ្វិកខាងត្បូងដែលគេស្គាល់ថា B.1.351 ចំនួន ៦ ករណី ខណៈអ្នកជំនាញមានការព្រួយបារម្ភថា វ៉ាក់សាំងបច្ចុប្បន្នអាចនឹងមិនមានប្រសិទ្ធភាពប្រឆាំងនឹងវីរុសនេះនោះទេ ។

ក្នុងចំណោម ៦ ករណីនៃវីរុសអាហ្វ្រិកខាងត្បូងមាន ៣ ករណីត្រូវបានរកឃើញនៅក្នុងស្រុក និង ២ ករណីពីជនជាតិហ្វីលីពីនវិលត្រឡប់មកពីបរទេស ខណៈដើមកំណើតនៃករណីផ្សេងទៀតនៅតែត្រូវបានគេផ្ទៀងផ្ទាត់ ។

ប្រទេសហ្វីលីពីនបានចាប់ផ្តើមយុទ្ធនាការចាក់វ៉ាក់សាំងការពារជំងឺកូវីដ ១៩ របស់ខ្លួនកាលពីថ្ងៃចន្ទ ។ មន្រ្តីខុទ្ទកាល័យរួមជាមួយបុគ្គលិកសុខាភិបាល យោធា និងប៉ូលិសស្ថិតក្នុងចំណោមមនុស្សដំបូងគេដែលត្រូវបានចាក់វ៉ាក់សាំងនៅក្នុងមន្ទីរពេទ្យចំនួន ៦ ក្នុងទីក្រុងម៉ានីល ។

ប្រទេសនេះបានទទួលវ៉ាក់សាំងការពារជំងឺកូវីដ ១៩ កញ្ចប់ដំបូងរបស់ខ្លួនពីក្រុមហ៊ុនចិន Sinovac Biotech កាលពីថ្ងៃអាទិត្យ ។ ប្រទេសនេះស្ថិតក្នុងចំណោមបណ្តាប្រទេសអាស៊ីអាគ្នេយ៍ចុងក្រោយដែលបានទទួលវ៉ាក់សាំងដំបូងរបស់ខ្លួនដោយសារតែការពន្យារពេលនៃការចែកចាយ ។

គួរបញ្ជាក់ថា គិតត្រឹមពេលនេះប្រទេសហ្វីលីពីនមានករណីឆ្លងជំងឺកូវីដ ១៩ ចំនួន ៥៧៨,៣៨១ ករណី និងមានអ្នកស្លាប់ចំនួន ១២,៣២២ នាក់ ៕

ប្រែសម្រួលដោយ ៖ ជីវ័ន្ត

ប្រភព ៖ CNA

ចុចអាន ៖ លោក Duterte ចុះហត្ថលេខាលើច្បាប់ផ្ដល់សំណងដល់ក្រុមហ៊ុនវ៉ាក់សាំង បើការចាក់មានប្រតិកម្ម

ចុចអាន ៖ ហ្វីលីពីនស្នើដោះដូរគិលានុបដ្ឋាយិកាជាមួយនឹងវ៉ាក់សាំងកូវីដ