ព័ត៌មានអន្ដរជាតិ

ចិន រិះគន់ការចោទប្រកាន់របស់ណាតូ ដែលថាខ្លួនជាអ្នកចាក់ឲ្យមានសង្គ្រាមនៅអ៊ុយក្រែន

បានផុស

៧ ខែ មុន

នៅ

ថ្ងៃសុក្រ ១២ កក្កដា ២០២៤

ដោយ

Chheang

លោក Wang Yi រដ្ឋមន្ត្រីក្រសួងការបរទេសចិន កាលពីថ្ងៃទី១១ ខែកក្កដា បាននិយាយថា រដ្ឋាភិបាលក្រុងប៉េកាំង នឹងមិនទទួលយក “ការចោទប្រកាន់ដែលគ្មានមូលដ្ឋាន” ដែលបានធ្វើឡើងប្រឆាំងនឹងខ្លួននៅកិច្ចប្រជុំកំពូលរបស់អង្គការណាតូក្នុងរដ្ឋធានីវ៉ាស៊ីនតោននោះទេ។

លោក Wang Yi រដ្ឋមន្ត្រីក្រសួងការបរទេសចិន (រូបភាព៖ AP)

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោក Wang បានប្រាប់ថា ប្រទេសចិនមានឆន្ទៈក្នុងការរក្សាទំនាក់ទំនងជាមួយអង្គការណាតូលើ “ជំហរស្មើគ្នា” និងធ្វើការផ្លាស់ប្តូរដោយឈរលើមូលដ្ឋាននៃការគោរពគ្នាទៅវិញទៅមក ដោយសុំឲ្យសម្ព័ន្ធមិត្តយោធាកុំជ្រៀតជ្រែកកិច្ចការផ្ទៃក្នុងរបស់ខ្លួន ឬប្រជែងផលប្រយោជន៍របស់ខ្លួន។ លោកបានបន្ថែមថា ចិន និងប្រទេសជាសមាជិកអង្គការណាតូ មានប្រព័ន្ធនយោបាយ និងតម្លៃខុសៗគ្នា ប៉ុន្តែនេះមិនគួរជាហេតុផលសម្រាប់អង្គការណាតូក្នុងការញុះញង់ឲ្យមានការប្រឈមមុខដាក់គ្នាជាមួយប្រទេសចិននោះឡើយ។

ទន្ទឹមនោះ ចិន បានអះអាងថា ការភាន់ច្រឡំរបស់អង្គការណាតូនៃការទទួលខុសត្រូវរបស់ចិនចំពោះវិបត្តិអ៊ុយក្រែន បាន”កើតឡើងដោយចេតនាអាក្រក់”។

គួររំឭកថា ក្រុមមេដឹកនាំអង្គការណាតូ បានលើកឡើងថា ទីក្រុងប៉េកាំងនៅតែបន្តបង្កបញ្ហាជាប្រព័ន្ធ និងបញ្ហាសន្តិសុខចំពោះអឺរ៉ុប។ លើសពីនេះទៀត ណាតូ បានពណ៌នាប្រទេសចិនថាជា អ្នកបង្កាត់ភ្លើងដ៏សំខាន់នៃសង្គ្រាមឈ្លានពានរបស់រុស្ស៊ីប្រឆាំងនឹងអ៊ុយក្រែន។ អាកប្បកិរិយារបស់ចិនក្នុងអំឡុងពេលសង្រ្គាមនៅអ៊ុយក្រែន កំពុងត្រូវបានបណ្ដាប្រទេសជាសមាជិកអង្គការណាតូ ចាត់ទុកជាភស្តុតាងដែលអឺរ៉ុបយល់ថា មិនអាចមិនអើពើនឹងបញ្ហាប្រឈមដែលក្រុងប៉េកាំងបង្កឡើងបាននោះឡើយ។

កាលពីសប្តាហ៍មុន សហភាពអឺរ៉ុប បានបញ្ជាក់ថា ខ្លួននឹងបង្កើនពន្ធរហូតដល់ ៣៧,៦% លើការនាំចូលរថយន្តអគ្គិសនីដែលផលិតនៅក្នុងប្រទេសចិន ដែលជាវិធានការមួយបង្ហាញពីភាពតានតឹងពាណិជ្ជកម្មជាមួយទីក្រុងប៉េកាំង៕

ដោយ៖ ឈាង

ចុចអាន៖ ណាតូ ស្ដីឲ្យចិន ថាជាអ្នកចាក់ឲ្យមានភ្លើងសង្គ្រាមនៅអ៊ុយក្រែន