ហ្វីលីពីន​ប្រកាស ឈរតតាំង បើផ្ទុះជម្លោះជាមួយ ចិន

តាមការចេញផ្សាយរបស់សារពត៌មាន Al Jazeera កាលពីថ្ងៃសុក្រទី១២ខែកក្កដា, មន្ត្រីសន្តិសុខកំពូលហ្វីលីពីនមួយរូបបានប្រកាសថា ហ្វីលីពីននឹងឈរតតាំង ក្នុងករណីផ្ទុះជម្លោះជាមួយចិន លើបញ្ហាសមុទ្រចិនខាងត្បូង។

ទីប្រឹក្សាសន្តិសុខជាតិហ្វីលីពីន លោក Eduardo Ano កាលពីថ្ងៃសុក្របាននិយាយថា ហ្វីលីពីននឹងរក្សាជំហររបស់ខ្លួនក្នុងជម្លោះជាមួយចិន ហើយប្រឆាំងរាល់ការបង្ខិតបង្ខំ ជ្រៀតជ្រែក ឥទ្ធិពលអាក្រក់ និងកលល្បិចផ្សេងៗដែលមានគោលបំណងបំផ្លាញសន្តិសុខ និងស្ថិរភាពរបស់ហ្វីលីពីនពី​ភាគី​ជម្លោះចិន។ លោកបញ្ជាក់ថា ទីក្រុងម៉ានីលនឹងមិនប្រើកម្លាំងណាមួយដើម្បីរកផលប្រយោជន៍ជាតិឡើយ ប៉ុន្តែប្តេជ្ញាចិត្តដើម្បីបុព្វហេតុសន្តិភាព ដោយដោះស្រាយ និងគ្រប់គ្រងបញ្ហាលំបាកតាមរយៈកិច្ចសន្ទនា និងការទូតជំនួសវិញ។

កាលពីខែមុន ឆ្មាំសមុទ្រ និងកងទ័ពជើងទឹករបស់ចិន និងហ្វីលីពីន បានប្រឈមមុខដាក់គ្នាកាន់តែខ្លាំងនៅក្នុងជម្លោះដែនទឹកនេះ រួមទាំងឧបទ្ទវហេតុមួយដែលបុគ្គលិកឆ្មាំសមុទ្រចិនកាន់កាំបិត ដំបង និងពូថៅហ៊ុំព័ទ្ធ និងឡើងលើទូកកងទ័ពជើងទឹកហ្វីលីពីនចំនួនបីគ្រឿង អំឡុងពេលបេសកកម្មផ្គត់ផ្គង់ទៅកាន់ថ្មប៉ប្រះទឹក The Second Thomas Shoal នៅប្រជុំកោះ Spratly ផងដែរ។

គួរបញ្ជាក់ថា ប្រទេសចិនទាមទារស្ទើតែ ៩០%នៃសមុទ្រចិនខាងត្បូង រួមទាំងនៅក្នុងតំបន់សេដ្ឋកិច្ចផ្តាច់មុខរបស់ ហ្វីលីពីន និងប្រទេសចំនួនបួនផ្សេងទៀតនៅអាស៊ីអាគ្នេយ៍ផងដែរ ហើយថ្វីបើសាលាក្តីអន្តរជាតិនៅទីក្រុងឡាអេក្នុងឆ្នាំ ២០១៦ បានរកឃើញថា ការទាមទាររបស់ចិនមិនមានមូលដ្ឋានច្បាស់លាស់ក៏ដោយ ក៏ទីក្រុងប៉េកាំងបានច្រានចោលសេចក្តីសម្រេចនោះថាជាមោឃៈដែរ។

យ៉ាងណាមិញ ហ្វីលីពីន​មិននៅស្ងៀមទេ ​ដោយខ្លួនបាននិង​កំពុងជំរុញ​កិច្ចសហប្រតិបត្តិការ​យោធា​ជាមួយ​សហរដ្ឋអាមេរិក និង​សម្ព័ន្ធមិត្ត​របស់ខ្លួន ដើម្បី​ប្រឆាំង​នឹង​ការពង្រីក​អំណាច និង​ឥទ្ធិពល​របស់​ចិន ជាក់ស្តែងកាលពីថ្ងៃចន្ទ ទីក្រុងម៉ានីលបានចុះហត្ថលេខាលើកិច្ចព្រមព្រៀងការពារជាតិ ដែលនឹងអនុញ្ញាតឲ្យជប៉ុនដាក់ពង្រាយកងទ័ពរបស់ខ្លួននៅក្នុងទឹកដីរបស់ខ្លួនទៀតផង៕

អត្ថបទ៖ ប៊ុន សុភាព