ស្លាប់​២២​នាក់ ក្នុង​ហេតុការណ៍​បាក់រលំ​សាលារៀន​មួយ​កន្លែង​នៅ​នីហ្សេរីយ៉ា

សាលារៀនកម្ពស់២ជាន់ បានដួលរលំកាល​ពី​ថ្ងៃសុក្រ​ទី​១២ ខែ​កក្កដា នៅភាគខាងជើងភាគប្រទេសនីហ្សេរីយ៉ា ដោយបានសម្លាប់សិស្សចំនួន ២២នាក់ និងមាន​មនុស្សជាង ១០០​នាក់ជាប់នៅក្នុងគំនរបាក់បែក។

វិទ្យាល័យ Saints Academy ក្នុងសហគមន៍ Busa Buji នៃរដ្ឋ Plateau បានដួលរលំភ្លាមៗបន្ទាប់ពីសិស្សដែលភាគច្រើនមានអាយុ ១៥​ឆ្នាំ ឬក្មេងជាងនេះ បានទៅដល់ថ្នាក់រៀន។

ទីភ្នាក់ងារគ្រប់គ្រងគ្រោះអាសន្នជាតិរបស់ប្រទេសនីហ្សេរីយ៉ា បាននិយាយថា អ្នកជួយសង្គ្រោះ និងបុគ្គលិកសុខាភិបាល ក៏ដូចជាកងកម្លាំងសន្តិសុខ ត្រូវបានដាក់ពង្រាយនៅកន្លែងកើតហេតុភ្លាមៗបន្ទាប់ពីការដួលរលំ ដោយបើកការស្វែងរកសិស្សដែលជាប់ក្នុងគំនរបាក់បែក។

អ្នកនាំពាក្យប៉ូលិស​រដ្ឋ​ Plateau លោក Alfred Alabo បាននិយាយថា ក្នុង​ចំណោម​សិស្ស និង​បុគ្គលិក​សរុបចំនួន ១៥៤​នាក់​ ដែលបានជាប់នៅក្នុងគំនរបាក់បែក មាន​មនុស្ស​ចំនួន​ ១៣២​នាក់ត្រូវបានជួយសង្គ្រោះ ហើយកំពុងត្រូវបានព្យាបាលរបួសនៅឯមន្ទីរពេទ្យ។ យ៉ាង​ណា​មិញ លោក​ថា នៅ​សេស​សល់​សិស្ស​ចំនួន ​២២​នាក់​ផ្សេង​ទៀត​​​បាន​បាត់បង់ជីវិត។

រដ្ឋាភិបាលនីហ្សេរីយ៉ា បានស្តីបន្ទោសសោកនាដកម្មនេះទៅលើ “រចនាសម្ព័ន្ធទ្រុឌទ្រោម និងទីតាំងរបស់សាលារៀននៅជិតច្រាំងទន្លេ” ហើយ​រដ្ឋាភិបាលបាន​ជំរុញសាលារៀនដែលប្រឈមមុខនឹងបញ្ហាស្រដៀងគ្នានេះឱ្យបិទទ្វារ។

សូម​បញ្ជាក់​ថា ការដួលរលំអគារ កំពុងក្លាយជារឿងធម្មតានៅនីហ្សេរីយ៉ា ដែលជាប្រទេសមានប្រជាជនច្រើនជាងគេ​បង្អស់​នៅទ្វីបអាហ្រ្វិក និង​មានឧប្បត្តិហេតុបែបនេះរាប់​សិប​ដង​ទៅ​ហើយក្នុងរយៈពេល២ឆ្នាំចុងក្រោយ។ ជារឿយៗ អាជ្ញាធរបានបន្ទោស​ទៅ​លើ​គ្រោះមហន្តរាយ និង​​ទៅ​លើ​ការខកខានក្នុងការអនុវត្តបទប្បញ្ញត្តិសុវត្ថិភាពអគារ ព្រម​ទាំង​ការថែទាំមិនល្អ៕

ដោយ៖ ឈាង