ព័ត៌មានអន្ដរជាតិ

ចារកម្មអ៊ុយក្រែន ថា ធ្លាប់ប៉ុនប៉ងធ្វើឃាតលោក ពូទីន ប៉ុន្មានដង តែមិនសម្រេច

បានផុស

៦ ខែ មុន

នៅ

ថ្ងៃចន្ទ ១៥ កក្កដា ២០២៤

ដោយ

Chheang

ប្រធានក្រុមចារកម្មយោធាអ៊ុយក្រែន លោក Kyrylo Budanov បានសារភាពថា រដ្ឋាភិបាលក្រុងកៀវ ធ្លាប់មានគម្រោងធ្វើឃាតលោក វ៉្លាឌឺមៀរ ពូទីន ប៉ុន្មានដងរួចមកហើយ តែការប៉ុនប៉ងទាំងនោះមិនបានសម្រេចទាល់តែសោះ។ ការប្រកាសរបស់លោក Budanov ធ្វើឡើងអំឡុងពេលផ្ដល់កិច្ចសម្ភាសន៍ឲ្យវិបសាយព័ត៌មានអ៊ុយក្រែនមួយឈ្មោះថា “New Voice” កាលពីថ្ងៃសៅរ៍ទី១៣ ខែកក្កដា ឆ្នាំ២០២៤កន្លងទៅ។

លោក វ៉្លាឌឺមៀរ ពូទីន ប្រធានាធិបតីរុស្ស៊ី (រូបភាព៖ Getty)

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោក Budanov បាននិយាយថា “ការប៉ុនប៉ងមួយចំនួន ត្រូវបានធ្វើឡើង… ប៉ុន្តែដូចដែលគ្រប់គ្នាបានដឹង រឿងទាំងនោះមិនទទួលបានជោគជ័យនោះទេ”។ យ៉ាងណាមិញ លោក Budanov មិនបានបញ្ជាក់ពីគម្រោងលម្អិតនៃការប៉ុនប៉ងធ្វើឃាតមេដឹកនាំរុស្ស៊ីថាតើធ្វើឡើងនៅពេលណា ឬក៏ដោយនរណានោះទេ។

ប្រធានចារកម្មអ៊ុយក្រែន បានបន្ថែមថា ដោយសារតែលោក ពូទីន កាន់អំណាចរយៈពេលយូរច្រើនជាង២០ឆ្នាំ នោះប្រជាជនរុស្ស៊ីនឹងមានអារម្មណ៍ភ័យខ្លាចនៅពេលបាត់បង់មេដឹកនាំម្នាក់នេះ។ លោក ថា នៅពេលលោក ពូទីន ស្លាប់ នោះវានឹងដូចជាការដែលរុស្ស៊ីធ្លាប់បានបាត់បង់មេដឹកនាំផ្ដាច់ការសូវៀត លោក Josef Stalin កាលពីឆ្នាំ១៩៥៣ អ៊ីចឹង ដោយគ្រានោះប្រជាជននៅសហភាពសូវៀត មានអារម្មណ៍ច្របូកច្របល់ យល់ថា “ពិភពលោកទាំងមូលរបស់ពួកគេបានដួលរលំ ហើយពួកគេមិនដឹងត្រូវបន្តរស់នៅយ៉ាងណាទៀតនោះទេ”។

ពាក់ព័ន្ធនឹងការលើកឡើងបែបនេះ លោក Dmitry Peskov អ្នកនាំពាក្យវិមានក្រឹមឡាំង បានឆ្លើយតបតាមរយៈសារព័ត៌មាន RT កាលពីថ្ងៃទី១៤ ខែកក្កដាថា រដ្ឋាភិបាលក្រុងមូស្គូ បានដឹងពីការគំរាមកំហែងអម្បាលម៉ានដែលអាចបង្កគ្រោះថ្នាក់ចំពោះលោក ពូទីន។ លោក Peskov ថា “ការគំរាមកំហែងទាំងអស់ ដែលកើតចេញពីរបបក្រុងកៀវ គឺជារឿងពិតប្រាកដ។ ហេតុដូច្នោះ សន្តិសុខសម្រាប់ប្រធានាធិបតី ត្រូវបានបង្កើតឡើងនៅក្នុងកម្រិតមួយដ៏សមរម្យ”។

ទន្ទឹមនោះ ឈ្មោះប្រធានចារកម្មអ៊ុយក្រែន លោក Budanov ត្រូវបានរដ្ឋាភិបាលរុស្ស៊ីដាក់បញ្ចូលនៅក្នុងបញ្ជីភេរវករ និងជនជ្រុលនិយមដែលមានគ្រោះថ្នាក់។

លោក Dmitry Peskov អ្នកនាំពាក្យវិមានក្រឹមឡាំង (រូបភាព៖ AP)

សូមបញ្ជាក់ថា ប្រព័ន្ធផ្សព្វផ្សាយលោកខាងលិច ធ្លាប់បានចុះផ្សាយថា មានការប៉ុនប៉ងគំរាមកំហែងដល់អាយុជីវិតលោក ពូទីន ប៉ុន្មានលើករួចមកហើយ នៅអំឡុងពេលប៉ុន្មានឆ្នាំថ្មីៗកន្លងទៅ។ កាលពីឆ្នាំ២០២២ សារព័ត៌មាន The Sun បានផ្សាយថា មានការបំផ្ទុះគ្រាប់បែកមួយនៅក្បែរក្បួនរថយន្តរបស់ប្រធានាធិបតីរុស្ស៊ី។ ចំណែកនៅក្នុងឆ្នាំ២០២៣ សារព័ត៌មានអាល្លឺម៉ង់ជាច្រើន បានអះអាងថា លោក ពូទីន ត្រូវគេប៉ុនប៉ងធ្វើឃាតតាមរយៈការវាយប្រហារដោយដ្រូន តែមិនបានសម្រេច។ យ៉ាងណាមិញ នៅគ្រានោះ វិមានក្រឹមឡាំង បានបដិសេធនូវរាល់សេចក្ដីរាយការណ៍ទាំងអស់នោះ ហើយថា វាគ្រាន់តែជាការបង្កើតរឿងដើម្បីទាក់ទាញចំណាប់អារម្មណ៍តែប៉ុណ្ណោះ៕

ដោយ៖ ឈាង