ប្រធានាធិបតីទាំង៦រូប ត្រូវគេប៉ងធ្វើឃាត ក្នុងប្រវត្តិសាស្រ្តអាមេរិក

ការប៉ុនប៉ងធ្វើឃាតលោក ដូណាល់ ត្រាំ បានបង្កការភ្ញាក់ផ្អើលទូទាំងពិភពលោក ខណៈមេដឹកនាំនានា បានចេញមុខថ្កោលទោសខ្លាំងៗចំពោះអំពើហិង្សាដ៏គួរឲ្យស្អប់ខ្ពើមនេះ។

តាមពិតទៅ ក្នុងប្រវត្តិសាស្រ្តអាមេរិក ក៏ធ្លាប់កើតមានការប៉ុនប៉ងយកជីវិតប្រធានាធិបតីកំពុងកាន់តំណែងនិងអតីតប្រធានាធិបតីបែបនេះដែរ ប៉ុន្តែថ្ងៃនេះកម្ពុជាថ្មី សូមលើកយកតែការប៉ុនប៉ងធ្វើឃាតប្រធានាធិបតីប៉ុណ្ណោះ ដោយក្នុងប្រវត្តិសាស្រ្តអាមេរិក មានចំនួន៦ដងហើយដូចជា៖

១. ថ្ងៃទី៣០ ខែមករា ឆ្នាំ១៨៣៥ – លោក Andrew Jackson

នៅឆ្នាំ ១៨៣៥ វិចិត្រករម្នាក់ឈ្មោះ Richard Lawrence បានលាក់ខ្លួន ហើយពេលប្រធានាធិបតីបានមកដល់ពិធីបុណ្យសពរបស់សមាជិកសភាមួយរូបក្នុងទីក្រុង វ៉ាស៊ីនតោន ឌីស៊ី គាត់ក៏ព្យាយាមបាញ់លោកប្រធានាធិបតី Jackson ដោយប្រើកាំភ្លើងខ្លីពីរដើមផ្សេងគ្នា ប៉ុន្តែបាញ់ខុសទាំងពីរ។ ក្រោយមក គាត់បានក្លាយជាមនុស្សដំបូងគេ ដែលត្រូវបានចោទប្រកាន់ពីបទប៉ុនប៉ងធ្វើឃាតប្រធានាធិបតីអាមេរិក។

២. ថ្ងៃទី១៤ ខែតុលា ឆ្នាំ១៩១២ – លោក Theodore Roosevelt

នៅឆ្នាំ១៩១២ ម្ចាស់ហាងម្នាក់ឈ្មោះ John Flammang Schrank បានបាញ់ប្រធានាធិបតី Roosevelt ចំទ្រូងនៅទីក្រុង Milwaukee នៃរដ្ឋ Wisconsin ពេលគាត់កំពុងធ្វើយុទ្ធនាការឃោសនាបោះឆ្នោតអាណត្តិទីបី។ យ៉ាងណា លោក Roosevelt បានរួចផុតពីការប៉ុនប៉ងធ្វើឃាតនោះ។

៣. ថ្ងៃទី១៥ ខែកុម្ភៈ ឆ្នាំ១៩៣៣ – លោក Franklin D Roosevelt

នៅឆ្នាំ១៩៣៣ កម្មករឈ្មោះ Giuseppe Zangara បានបាញ់៥គ្រាប់ សំដៅទៅប្រធានាធិបតីជាប់ឆ្នោត Roosevelt ក្នុងអំឡុងពេលថ្លែងសុន្ទរកថាទៅកាន់អ្នកគាំទ្រនៅ Bay Front Park នៃរដ្ឋ Florida។ យ៉ាងណា គ្រាប់នោះបាញ់ខុសលោក Roosevelt តែបែរជាត្រូវចំមនុស្ស៤នាក់ទៅវិញ។

៤. ថ្ងៃទី១ ខែវិច្ឆិកា ឆ្នាំ១៩៥០ – លោក Harry S Truman

នៅឆ្នាំ១៩៥០ សកម្មជនគាំទ្រឯករាជ្យព័រតូរីកូ២នាក់ឈ្មោះ Oscar Collazo និង Griselio Torresola បានប៉ុនប៉ងធ្វើឃាតប្រធានាធិបតីទី៣៥របស់សហរដ្ឋអាមេរិកនៅឯវិមាន Blair House ក្នុងទីក្រុង វ៉ាស៊ីនតោន ឌីស៊ី។ ពួកគេ​ត្រូវ​បាន​ទប់ស្កាត់មិនឲ្យ​ចូល​ទៅ​ក្នុង ហើយ​ការ​ប៉ុនប៉ង​ធ្វើ​ឃាតនោះត្រូវបរាជ័យ។ ​អ្នក​វាយប្រហារ​ម្នាក់​ត្រូវ​បាន​សម្លាប់ ខណៈ​ម្នាក់​ទៀត​ត្រូវ​ចាប់​ខ្លួន។

៥. ថ្ងៃទី៥ និងថ្ងៃទី២២ ខែកញ្ញា ឆ្នាំ១៩៧៥ – លោក Gerald Ford

នៅឆ្នាំ១៩៧៥ នារីឈ្មោះ Lynette Squeaky Fromme បានព្យាយាមបាញ់ប្រធានាធិបតី Ford នៅទីក្រុង Sacramento នៃរដ្ឋ California។ យ៉ាងណា ការប៉ុនប៉ងនោះ ត្រូវបានភ្នាក់ងារសម្ងាត់ទប់ស្កាត់ទាន់។ ប៉ុន្មានសប្តាហ៍ក្រោយមក នារីម្នាក់ទៀតឈ្មោះ Sara Jane Moore បានព្យាយាមបាញ់សម្លាប់ប្រធានាធិបតីទី៣៨របស់សហរដ្ឋអាមេរិកនៅ San Francisco រដ្ឋ California ប៉ុន្តែក៏ត្រូវបានភ្នាក់សម្ងាត់ទប់ស្កាត់ទាន់ដូចគ្នា។

៦. ថ្ងៃទី៣០ ខែមីនា ឆ្នាំ១៩៨១ – លោក Ronald Reagan

នៅឆ្នាំ១៩៨១ លោក John Hinckley Jr បានបាញ់ជាច្រើនគ្រាប់ទៅលើប្រធានាធិបតី Reagan និងក្រុមសន្តិសុខរបស់គាត់ ខណៈពេលកំពុងចាកចេញពីសណ្ឋាគារ Hilton ក្នុងទីក្រុង វ៉ាស៊ីនតោន ឌីស៊ី។ លោក Reagan បានរងរបួសនៅពេលដែលគ្រាប់កាំភ្លើងមួយគ្រាប់ប្លាតពីរថយន្តទៅត្រូវចំគាត់។ យ៉ាងណាគាត់បានរួចរស់ជីវិតពីការប៉ុនប៉ងធ្វើឃាតនោះ ប៉ុន្តែត្រូវសម្រាកព្យាបាលក្នុងមន្ទីរពេទ្យរយៈពេល ១២ថ្ងៃ៕

អត្ថបទ៖ សុខ សុវណ្ណ

ចុចអាន៖ តើខ្មាន់កាំភ្លើងប៉ុនប៉ងធ្វើឃាតលោកត្រាំ ជាមនុស្សបែបណា?