កម្ពុជា វ៉ាដាច់​វៀតណាម និង​ថៃ ជាប់​ក្នុង​តារាង​ចំណាត់​ថ្នាក់សណ្ឋាគារ​ល្អ​បំផុត​ទាំង​១០​លើ​ពិភពលោក

ទស្សនាវដ្ដី​​កម្សាន្ត​ដ៏​ល្បី​ឈ្មោះ​មួយ​នៅ​សហរដ្ឋ​អាមេរិក Travel+Leisure បាន​បញ្ចេញ​នូវ​បញ្ជី​ឈ្មោះ​សណ្ឋាគារ​​ចំនួន​១០០​កន្លែង ដែល​​ល្អ​ដាច់​គេ​បំផុត​នៅ​លើ​ពិភពលោក សម្រាប់​ឆ្នាំ​២០២៤ ដោយ​ក្នុង​នោះ​​មាន​សណ្ឋាគារ​ចំនួន​២​ស្ថិត​នៅ​ក្នុង​ប្រទេស​​កម្ពុជា។

សណ្ឋាគារ​ចំនួន​២ របស់​កម្ពុជា ដែល​មាន​វត្តមា​ន​​​នៅ​ក្នុង​បញ្ជី​ឈ្មោះ​សណ្ឋាគារ​ល្អ​បំផុត មាន សណ្ឋាគារ Park Hyatt Siem Reap ជាប់​ចំណាត់​ថ្នាក់​ទី​៤ និង​សណ្ឋាគារ Rosewood Phnom Penh ជាប់​ចំណាត់​ថ្នាក់​ទី​៣០។ ចំណែក​ឯ​ប្រទេស​ក្បែរ​ខាង​កម្ពុជា មាន​ដូចជា ថៃ និង​វៀតណាម ក៏​​ជាប់​នៅ​ក្នុង​បញ្ជី​ឈ្មោះ​សណ្ឋាគារ​ល្អ​ជាង​គេ​នេះ​ផង​ដែរ។ នៅ​ថៃ មាន​សណ្ឋាគារ​​ចំនួន ៥ ដូចជា សណ្ឋាគារ Hyatt Regency Koh Samui ជាប់​លេខ​រៀង​ទី​៤០ សណ្ឋាគារ Mandarin Oreintal ជាប់​លេខ​រៀង​ទី​៤៤ សណ្ឋាគារ Capella Bangkok ជាប់​លេខ​រៀង​ទី​៤៨ សណ្ឋាគារ Four Seasons Hotel Bangkok ជាប់​លេខ​រៀង​ទី​៦៤ និង​សណ្ឋាគារ The Standard ជាប់​លេខ​រៀង​ទី​៨១។ ដោយ​ឡែក វៀតណាម មាន​សណ្ឋាគារ​ចំនួន​២ ដែល​ជាប់​ឈ្មោះ មាន​ដូចជា សណ្ឋាគារ Alma Resort Cam Ranh ជាប់​លេខរៀង​ទី​៩ និង​សណ្ឋាគារ New World Phu Quoc Resort ជាប់​លេខ​រៀង​​ទី​៩០។

ការ​ចាត់​ចំណាត់​ថ្នាក់​នេះ ធ្វើ​ឡើង​ជា​ប្រចាំ​ឆ្នាំ​សម្រាប់​ផ្ដល់​ជូន​នូវ​ពាន​រង្វាន់​កម្មវិធី World Best Awards ចំពោះ​សណ្ឋាគារ​ដែល​ល្អ​ដាច់​គេ ដែល​មាន​ការ​បោះឆ្នោត​ដោយ​មនុស្ស​ចំនួន​ជាង ៧០​ម៉ឺននាក់​នៅ​លើ​វិបសាយ​ទស្សនាវដ្ដី Travel+Leisure និង​ត្រូវ​បាន​​វាយ​តម្លៃ​តាម​លក្ខណៈ​វិនិច្ឆ័យ​ដូច​ជា​ គ្រឿង​បរិក្ខារ ទីតាំង គុណភាព​សេវាកម្ម អាហារ និង​តម្លៃ។

​ខាង​ក្រោម​នេះ គឺ​ជាការ​រាយ​ឈ្មោះ​សណ្ឋាគារ​ចំនួន​១០ ​ល្អ​ដាច់​គេ​បំផុត​លើ​ពិភពលោក៖

១. សណ្ឋាគារ The Oberoi Rajvilas នៅ​​ឥណ្ឌា

២. សណ្ឋាគារ La Casa de la Playa នៅម៉ិកស៊ិក

៣. សណ្ឋាគារ The Ritz-Carlton នៅ​កាតា

៤. សណ្ឋាគារ Park Hyatt Siem Reap នៅ​កម្ពុជា

៥. សណ្ឋាគារ Selman Marrakech នៅ​ម៉ារ៉ុក

៦. សណ្ឋាគារ Gran Hotel Mas d’en Bruno នៅ​អេស្ប៉ាញ

៧. សណ្ឋាគារ Regent Hong Kong នៅ​ចិន

៨. សណ្ឋាគារ Pendry Newport Beach នៅ​​​អាមេរិក

៩. សណ្ឋាគារ Alma Resort Cam Ranh នៅ​វៀតណាម

១០. សណ្ឋាគារ Waldorf Astoria Maldives Ithaafushi នៅ​​ម៉ាល់ឌីវ៕