ព័ត៌មានអន្ដរជាតិ

មនុស្សយ៉ាងតិច ២៣នាក់បានស្លាប់ ក្នុងហេតុការណ៍រថយន្តក្រុងធ្លាក់ចូលជ្រោះជម្រៅ១៩៨ម៉ែត្រក្នុងប្រទេសប៉េរូ

បានផុស

៧ ខែ មុន

នៅ

ថ្ងៃពុធ ១៧ កក្កដា ២០២៤

ដោយ

អាជ្ញាធរនៃប្រទេសប៉េរូនៅតំបន់អាមេរិកឡាទីន បានឲ្យដឹងថា មនុស្សយ៉ាងហោចណាស់២៣នាក់បានស្លាប់នៅក្នុងហេតុការណ៍គ្រោះថ្នាក់រថយន្តក្រុងមួយគ្រឿងរអិលធ្លាក់ចូលទៅក្នុងជ្រោះជម្រៅជាង១៩៨ ម៉ែត្រកាលពីថ្ងៃអង្គារ ខណៈដែលរថយន្តនេះកំពុងធ្វើដំណើរពីរដ្ឋធានី Lima ទៅកាន់ទីក្រុងAyacucho នៅភាគខាងត្បូងប្រទេស ។នេះបើយោងតាមការចេញផ្សាយរបស់សារពត៌មាន CNN នៅថ្ងៃទី១៧ខែកក្កដា។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ហេតុការណ៍គ្រោះថ្នាក់នេះបានកើតឡើងកាលពីវេលាម៉ោង៥ទៀបភ្លឺម៉ោងក្នុងស្រុក ហើយអាជ្ញាធរមិនទាន់បញ្ជាក់មូលហេតុនៅឡើយ ខណៈប្រតិបត្តិការស្វែងរកនិងសង្គ្រោះកំពុងដំណើរការ ក្នុងនោះក៏មានមនុស្ស១៣នាក់បានរងរបួស និងកំពុងសម្រាកព្យាបាលនៅមន្ទីរពេទ្យក្នុងតំបន់នោះ។

ផ្លូវភ្នំប្រទេសប៉េរូបានជួបឧបទ្ទវហេតុបង្កឱ្យមានការស្លាប់ជាញឹកញាប់ក្នុងរយៈពេលប៉ុន្មានឆ្នាំចុងក្រោយនេះ។ កាលពីខែមេសាឆ្នាំ២០២១ គ្រោះថ្នាក់រថយន្តក្រុងមួយបានកើតឡើងនៅក្នុងតំបន់មួយជិតទីក្រុងLimaនោះដែរ ដែលបណ្តាលឱ្យមនុស្ស២០នាក់ស្លាប់ និង១៤នាក់រងរបួស។ លើសពីនេះនៅក្នុងខែកុម្ភៈឆ្នាំ២០២២ មនុស្ស២០នាក់ផ្សេងទៀតបានស្លាប់ និង៣៣នាក់បានរងរបួស ក្នុងហេតុការណ៍ក្រឡាប់រថយន្តក្រុងមួយ និងធ្លាក់ចូលទៅក្នុងជ្រោះជម្រៅ១០០ម៉ែត្រ ភាគខាងជើងប្រទេសប៉េរូ។

ទន្ទឹមនោះឧបទ្ទវហេតុនៅក្នុងប្រទេសប៉េរូបានបង្ហាញនូវហានិភ័យនៅលើផ្លូវដ៏លំបាកដែលបង្កឱ្យមានក្តីបារម្ភជាអន្តរជាតិចំពោះសុវត្ថិភាពចរាចរណ៍នៅក្នុងតំបន់។ ទោះបីជាមានការខិតខំប្រឹងប្រែងជាបន្តបន្ទាប់ដើម្បីកែលម្អហេដ្ឋារចនាសម្ព័ន្ធផ្លូវថ្នល់ក៏ដោយ អង្គការសុខភាពពិភពលោកបានរាយការណ៍ថាគ្រោះថ្នាក់ចរាចរណ៍នៅតែជាបញ្ហាសុខភាពសាធារណៈដ៏សំខាន់នៅទូទាំងពិភពលោក៕

អត្ថបទ៖ ប៊ុន សុភាព