ភ្លៀងធ្លាក់ខ្លាំងនៅទីក្រុងតូរ៉ុនតូបណ្តាលឱ្យលិចលង់យ៉ាងខ្លាំង សូម្បីលំនៅឋានតារាចំរៀងរ៉េបដ៏ល្បី Drake

ជំនន់ទឹកភ្លៀងនៅទីក្រុងតូរ៉ុនតូ (Toronto) ប្រទេសកាណាដា បានបណ្តាលឱ្យលិចលង់ជាច្រើនជាពិសេសផ្លូវថ្នាល់សំខាន់ៗ និងសូម្បីលំនៅឋានរបស់តារាចម្រៀងរ៉េបដ៏ល្បី លោក Drake ក៏ត្រូវបានទឹកហូរចូលដល់បន្ទប់ដេកដែរ ហើយភ្លៀងនៅបន្តធ្លាក់ខ្លាំងយ៉ាងហោច១ថ្ងៃទៀត។

នៅក្នុងវីដេអូឃ្លីបមួយដែលបង្ហោះដោយតារាចម្រៀងរ៉េបខាងលើត្រូវបានចែកចាយតាមបណ្តាញសង្គមជាច្រើននៅថ្ងៃអង្គារ បានបង្ហាញឱ្យឃើញថា ទឹកបានហូរចូលដល់បន្ទប់ស្នាក់នៅរបស់តារាចម្រៀងរ៉េប ខណៈដែលតារាចម្រៀងនោះព្យាយាមថតបង្ហាញ ដោយបង្ហាញពីការហួសចិត្តចំពោះអ្វីដែលបានកើតឡើង។

ក្នុងវីដេអូនោះ ដោយឮតែសំឡេងទឹកហូរចូលនោះ លោក Drake បានទាញកាមេរ៉ាទូរស័ព្ទថា និងបង្វិលចុះទៅកាន់ជើងរបស់គាត់ដែលលិចក្នុងទឹករហូតដល់ពាក់កណ្ដាលកំភួនជើង។ Drakeកំពុងកាន់អំបោស ដោយដំបូងឡើយចង់រុញទឹកចេញពីបន្ទប់ ប៉ុន្តែមិនអាចធ្វើបាន ព្រោះកម្លាំងទឹងបុកចូលខ្លាំងណាស់។

សារព័ត៌មាន Toronto Star បានរាយការណ៍កាលពីថ្ងៃចន្ទទី១៥កក្កដានេះថា ទីភ្នាក់ងារអាកាសធាតុនៃប្រទេសកាណាដា បានព្រមានអំពីភ្លៀងធ្លាក់ខ្លាំងនៅទីក្រុងតូរ៉ុនតូ និងតំបន់ Greater Toronto ។

សេចក្តីប្រកាសនេះបានធ្វើឡើងបន្ទាប់ពីទឹកជំនន់បានប៉ះពាល់ដល់ប្រព័ន្ធរថភ្លើងក្រោមដីរបស់ទីក្រុងកាលពីដើមសប្តាហ៍នេះ។

ទីភ្នាក់ងារអាកាសធាតុបាននិយាយថា៖«ភ្លៀងធ្លាក់ខ្លាំងអាចបណ្តាលឱ្យមានទឹកជំនន់ភ្លាមៗ និងទឹកហូរនៅតាមផ្លូវនានា»៕

ប្រែសម្រួល៖ រ៉ាន់ រើយ