ព័ត៌មានអន្ដរជាតិ

ភ្លៀងធ្លាក់ខ្លាំងឆក់យកជីវិតមនុស្ស៤០នាក់ របួសរាប់រយនាក់ និងបំផ្លាញផ្ទះសម្បែង រួមទាំងកាត់ផ្ដាច់ចរន្តអគ្គិសនី

បានផុស

២ ខែ មុន

នៅ

ថ្ងៃពុធ ១៧ កក្កដា ២០២៤

ដោយ

ភ្លៀងធ្លាក់ខ្លាំងនៅភាគខាងកើតប្រទេសអាហ្វហ្គានីស្ថាន បានឆក់យកជីវិតមនុស្សយ៉ាងហោចណាស់៤០នាក់ និងមនុស្សប្រមាណ៣៥០នាក់ផ្សេងទៀតបានរងរបួស។ យោងតាមការចេញផ្សាយរបស់ទីភ្នាក់ងារព័ត៌មាន AP នៅថ្ងៃទី១៧ខែកក្កដានេះ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

មន្ត្រីខេត្ត Sediqullah Quraishi បានឱ្យដឹងថា ក្នុងចំណោមអ្នកស្លាប់នៅក្នុងព្យុះនិងភ្លៀងធ្លាក់ខ្លាំងដែលបានបោកបក់កាលពីថ្ងៃចន្ទ មាន៥នាក់ជាសមាជិកគ្រួសារតែមួយបានស្លាប់ អំឡុងពេលដែលដំបូលផ្ទះរបស់ពួកគេបានបាក់រលំនៅក្នុងស្រុក Surkh Rod។ អ្នកនាំពាក្យរបស់ក្រសួងសុខាភិបាលសាធារណៈរបស់ប្រទេសនេះក៏បានឲ្យដឹងថា អ្នករងរបួសចំនួន៣៤៧នាក់ត្រូវបាននាំយកទៅព្យាបាលនៅមន្ទីរពេទ្យនៅក្បែរនោះ។

ផ្ទះប្រហែល៤០០ខ្នងនិងបង្គោលភ្លើង៦០បង្គោល ត្រូវបានបំផ្លាញនៅទូទាំងខេត្ត Nangarhar ហើយថាមពលអគ្គិសនីត្រូវបានកាត់ផ្ដាច់នៅក្នុងតំបន់ជាច្រើន ខណៈការខូចខាតកំពុងត្រូវបានវាយតម្លៃ និងផ្តល់សេវាសុខភាពបន្ទាន់ដល់ជនរងគ្រោះដែលរងប៉ះពាល់ពីគ្រោះមហន្តរាយនេះ។

សូមជម្រាបថា គ្រោះមហន្តរាយដែលបង្កឡើងការប្រែប្រួសអាកាសធាតុនៅក្នុងប្រទេសអាហ្វហ្គានីស្ថាន បានក្លាយជាការព្រួយបារម្ភយ៉ាងធ្ងន់ធ្ងរ ខណៈប្រទេសនេះក៏កំពុងមានជម្លោះ និងវិបត្តិសេដ្ឋកិច្ចជាច្រើនទសវត្សរ៍កន្លងមក។ កត្តានេះនឹងធ្វើឲ្យប្រទេសនេះកាន់តែប្រឈមមុខនឹងការដើរថយក្រោយលើផ្នែកសេដ្ឋកិច្ចនិងសុខុមាភាពសង្គម។ ប្រសិនបើមិនមានការបង្កើនជំនួយពីម្ចាស់ជំនួយ និងសហគមន៍អន្តរជាតិនោះទេ មនុស្សជាច្រើននឹងបាត់បង់ជីវិតដោយសារបញ្ហាប្រឈមទាំងនេះ ។

បើយោងតាមកម្មវិធីស្បៀងអាហារពិភពលោក កាលពីខែឧសភា ភ្លៀងធ្លាក់ខ្លាំង ក៏បានសម្លាប់មនុស្សជាង៣០០នាក់ និងបំផ្លាញផ្ទះរាប់ពាន់ខ្នង ដែលភាគច្រើននៅក្នុងខេត្ត Baghlan ភាគខាងជើងប្រទេសអាហ្វហ្គានីស្ថាន៕