ព័ត៌មានអន្ដរជាតិ

ឆ្មាចិញ្ចឹមខាំក្មេងប្រុសអាយុ៣ឆ្នាំបណ្ដាលឲ្យស្លាប់ដោយសារជំងឺឆ្កែឆ្កួត ព្រោះមិននាំទៅព្យាបាលឬចាក់ថ្នាំបង្ការទាន់ពេល

បានផុស

៦ ខែ មុន

នៅ

ថ្ងៃព្រហស្បតិ៍ ១៨ កក្កដា ២០២៤

ដោយ

ក្មេងប្រុសអាយុ៣ឆ្នាំម្នាក់នៅខេត្ត Gia Lai ប្រទេសវៀតណាមបានស្លាប់ដោយសារជំងឺឆ្កែឆ្កួតមួយខែក្រោយសត្វឆ្មាចិញ្ចឹមក្នុងគ្រួសារបានខាំ។ យោងតាមការចេញផ្សាយរបស់សារពត៌មាន VN Express នៅថ្ងៃទី១៧ខែកក្កដានេះ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ក្មេងប្រុសរូបនេះត្រូវបានគ្រួសារនាំទៅកាន់មណ្ឌលសុខភាពស្រុក Chu Se កាលពីថ្ងៃអាទិត្យសប្តាហ៍មុន បន្ទាប់ពីក្អួតជាច្រើនថ្ងៃនៅផ្ទះ។ វេជ្ជបណ្ឌិតបានធ្វើរោគវិនិច្ឆ័យឃើញថា កុមារនេះមានផ្ទុកជំងឺឆ្កែឆ្កួត ដែលបណ្ដាលឲ្យមានការឆ្លងមេរោគពោះវៀន និង ខ្សោះជាតិទឹក ហើយបានបញ្ជូនកុមារនេះទៅមន្ទីរពេទ្យកុមារខេត្ត Gia Lai មួយថ្ងៃក្រោយមក។

បន្ទាប់ពីត្រូវបានគ្រូពេទ្យនៅមន្ទីរពេទ្យកុមារខេត្ត Gia Lai ណែនាំអំពីស្ថានភាពរបស់គាត់ គ្រួសាររបស់កុមាររូបនេះបានសម្រេចចិត្តនាំគាត់ទៅផ្ទះនៅព្រឹកថ្ងៃចន្ទ។ អាការៈជំងឺពេលកុមារនេះនៅផ្ទះ មានដូចជា គាត់ស្រែក ពិបាកហើបមាត់ ស្រក់ទឹកមាត់ ខ្លាចពន្លឺ ទឹក និងខ្យល់ ឈឺក្បាល មិនអាចបរិភោគអាហារ ឬផឹកអ្វីទាំងអស់ និងបានស្លាប់នៅព្រឹកថ្ងៃដដែល។

យោងតាមការបញ្ជាក់របស់ក្រុមគ្រួសារ កុមាររូបនេះត្រូវឆ្មាខាំដៃកាលពីមួយខែមុន។ មុខរបួសដែលឆ្មាខាំមានសភាពរាក់ តែមានហូរឈាម ប៉ុន្តែក្រុមគ្រួសារមិនបាននាំទៅព្យាបាលឬវ៉ាក់សាំងការពារជំងឺឆ្កែឆ្កួតទាន់ពេលនោះទេ ខណៈឆ្មាដែលជាសត្វចិញ្ចឹមបានបាត់ខ្លួន បន្ទាប់ពីខាំក្មេងប្រុសនោះ និងមិនទាន់ត្រលប់មកផ្ទះវិញតាំងពីពេលនោះមក។

តាមសេចក្តីរាយការណ៍របស់សារព័ត៌មាននោះ កាលពីខែមុនក៏មានក្មេងប្រុសអាយុប្រាំពីរឆ្នាំនៅភាគខាងជើងប្រទេសវៀតណាមបានស្លាប់ដោយសារជំងឺឆ្កែឆ្កួតមួយខែបន្ទាប់ពីត្រូវបានឆ្កែរបស់អ្នកជិតខាងខាំ។ ក្មេងប្រុសនោះត្រូវបានបញ្ជូនទៅព្យាបាលបន្ទាប់ពីមានអាការៈអស់កម្លាំង ខ្លាចទឹក ខ្យល់ និងពន្លឺ ថែមទាំងក្អួតឈាម។ គ្រូពេទ្យបានធ្វើរោគវិនិច្ឆ័យក៏រកឃើញថាក្មេងប្រុសនោះមានជំងឺឆ្កែឆ្កួត។

មធ្យោបាយតែមួយគត់ដើម្បីការពារជំងឺឆ្កែឆ្កួត គឺត្រូវទទួលថ្នាំបង្ការ បន្ទាប់ពីត្រូវបានឆ្កែ ឆ្មា ឬសត្វព្រៃណាមួយខាំ ព្រោះថា បើរោគសញ្ញាជំងឺឆ្កែឆ្កួតលេចឡើងហើយនោះ អត្រាមរណភាពគឺ ១០០ភាគរយ ខណៈក្មេងប្រុសដែលត្រូវបានឆ្មាខាំនេះគឺជាករណីស្លាប់ទីបួនហើយនៅក្នុងខេត្ត Gia Lai ប្រទេសវៀតណាមក្នុងឆ្នាំនេះ៕