ព្រឹទ្ធសមាជិកកំពូលអាមេរិក រកឃើញ មានទោសពីបទពុករលួយ ប្រឈមជាប់ពន្ធនាគារ ២២២ឆ្នាំ

តាមការចុះផ្សាយរបស់​ BBC កាលពីថ្ងៃពុធទី១៧ខែកក្កដា, គណៈវិនិច្ឆយបានរកឃើញថា សមាជិកព្រឹទ្ធសភាដ៏មានឥទ្ធិពលរបស់សហរដ្ឋអាមេរិកលោក Robert Menendez អាយុ៧០ឆ្នាំ គឺមានពិរុទ្ធលើគ្រប់បទចោទប្រកាន់ពាក់ព័ន្ធអំពើពុករលួយ បន្ទាប់ពីដុំមាស និងសាច់ប្រាក់រាប់សែនដុល្លារ ត្រូវបានរកឃើញនៅក្នុងផ្ទះរបស់គាត់។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

អ្នកប្រជាធិបតេយ្យរដ្ឋ New Jersey រូបនេះ ត្រូវបានចោទប្រកាន់ពីបទជំរិតទារប្រាក់ រារាំងយុត្តិធម៌ ដើរតួជាភ្នាក់ងារបរទេស និងទទួលសំណូកដើម្បីជួយសម្រួលដល់ការរកស៊ីរបស់ពាណិជ្ជករ ដែលមានទំនាក់ទំនងជាមួយប្រទេសអេហ្ស៊ីប និងកាតា។

ទោះបីជាយ៉ាងណាក៏ដោយ លោក Menendez ក៏បានប្តេជ្ញាប្តឹងឧទ្ធរណ៍ចំពោះសាលក្រមនេះដែរ។

អ្នកនាំពាក្យការិយាល័យរដ្ឋអាជ្ញា Southern District នៃទីក្រុងញូវយ៉ក បាននិយាយថា បើបូករួមការចោទប្រកាន់ទាំងអស់ចូលគ្នា គាត់អាចជាប់ពន្ធនាគាររយៈពេល២២២ឆ្នាំ។

ក្នុងការឆែកឆេរផ្ទះរបស់លោក Menendez ក្នុងរដ្ឋ New Jersey, ភ្នាក់ងារ FBI បានរកឃើញប្រាក់សុទ្ធជិត ៥០០ ០០០ដុល្លារលាក់នៅជុំវិញផ្ទះ ក៏ដូចជាដុំមាសដែលមានតម្លៃប្រហែល ១៥០ ០០០ដុល្លារនិងរថយន្ត Mercedes-Benz ដ៏ប្រណីតមួយគ្រឿងផងដែរ។

មិនមែនតែគាត់ទេ សូម្បីភរិយាឈ្មោះ Nadine Menendez ដែលបច្ចុប្បន្នជាមេធាវីការពារក្តីនេះ ក៏រងការចោទប្រកាន់ដែរ គ្រាន់តែត្រូវបានកាត់ទោសដោយឡែកពីគ្នាប៉ុណ្ណោះ ព្រោះថា បច្ចុប្បន្នលោកស្រីកំពុងទទួលការព្យាបាលជំងឺមហារីកសុដន់។

លោក Menendez ត្រូវ​បាន​កាត់ទោស​រួម​ជាមួយ​​ពាណិជ្ជករ​ពីរ​រូប ​ដែលគាត់បាន​ជួយ មានដូចជា Wael Hana ជនជាតិអេហ្ស៊ីប​ដើមកំណើតអាមេរិកនិង​ Fred Daibes ដែលជាវិនិយោគិន។

អ្នកជំនួញទីបីដែលជាឈ្មួញកណ្តាលផ្នែកធានារ៉ាប់រងឈ្មោះ Jose Uribe បានសារភាពទោសកំហុស ចំពោះការចោទប្រកាន់ពីបទស៊ីសំណូកក្នុងខែមីនា ហើយក៏បានជួយដល់ក្រុមអ្នកស៊ើបអង្កេតរួចទៅហើយដែរ។

ក្រោយរកឃើញថាមានទោសដែលអ្នកទាំងអស់ចូលដៃជើងគ្នា, រដ្ឋអាជ្ញាបញ្ជាក់ថា Hana ត្រូវប្រឈមនឹងការជាប់ពន្ធនាគាររយៈពេល៨៥ឆ្នាំនិង Daibes ប្រឈមជាប់ពន្ធនាគារ១០០ឆ្នាំ៕

អត្ថបទ៖ សុខ សុវណ្ណ