បញ្ហាជាប់គាំង IT កំពុងធ្វើឲ្យផ្អើលពេញពិភពលោក

តាមសេចក្តីរាយការណ៍របស់ CNN នៅថ្ងៃសុក្រទី១៩ខែកក្កដា ពិភពលោកបានជួបប្រទះបញ្ហាជាប់គាំង IT ទ្រង់ទ្រាយធំដ៏មហិមា ដោយប៉ះពាល់ដល់ប្រព័ន្ធធនាគារ សេវារថភ្លើង យន្តហោះ មន្ទីរពេទ្យ និងផ្សារហ៊ុនជាដើម ដែលបង្កភាពភ្ញាក់ផ្អើលដល់មនុស្សគ្រប់គ្នា។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

នៅប្រទេសកម្ពុជា មានធនាគារមួយចំនួនត្រូវរងគ្រោះដោយបញ្ហានេះ ពោលគឺអតិថិជនពិបាកបើកគណនីក្នុងទូរស័ព្ទ ឬរអាក់រអួលក្នុងការទូទាត់ប្រាក់ជាដើម។

យ៉ាងណា តាមការបញ្ជាក់ពីអ្នកជំនាញអន្តរជាតិ, ដើមចមនៃបញ្ហានេះគឺបណ្តាលមកពីបញ្ហា Cloud របស់ Microsoft ខណៈខាងក្រុមហ៊ុនក៏ទទួលស្គាល់ដែរ ថែមទាំងបញ្ជាក់ទៀតថា ខ្លួនក៏ពិនិត្យលើបញ្ហាជាមួយកម្មវិធីនិងប្រព័ន្ធប្រតិបត្តិការ 365 របស់ខ្លួនដែរ ហើយនឹងព្យាយាមដោះស្រាយឲ្យបានលឿនបំផុតតាមដែលអាចធ្វើទៅបាន។

ទន្ទឹមនោះ ក្រុមហ៊ុនសន្តិសុខអ៊ីនធើណិតអាមេរិក CrowdStrike ក៏ទទួលស្គាល់ដែរថា ខ្លួនមានចំណែកក្នុងកំហុសឆ្គងនេះ ហើយក៏កំពុងធ្វើការដោះស្រាយដូចគ្នា។

សូមបញ្ជាក់ថា Windows គឺជាប្រព័ន្ធប្រតិបត្តិការដែលគេប្រើប្រាស់ច្រើនបំផុត លើពិភពលោក ដូច្នេះមានន័យថា បើប្រព័ន្ធនេះគាំង វានឹងប៉ះពាល់ដល់សេដ្ឋកិច្ចពិភពលោកសឹងតែគ្រប់ផ្នែក។

ទោះបីជាយ៉ាងណាក៏ដោយ ពេលនេះមានការចុះផ្សាយព័ត៌មានយ៉ាងព្រោងព្រាតជាបន្តបន្ទាប់អំពីការជាប់គាំងនានា ជាពិសេសវាជះឥទ្ធិពលខ្លាំងបំផុតលើវិស័យអាកាសចរណ៍ ដែលយន្តហោះនៅតាមព្រលានរាប់រយកន្លែង ត្រូវផ្អាកការហោះហើរ ហើយពេលនេះ គេកំពុងរង់ចាំមើលថាតើវានឹងបង្កផលអាក្រក់ដល់វិស័យអ្វីខ្លះទៀត និងពេលណាទើបគ្រប់យ៉ាងអាចស្តារឡើងវិញបាន៕

អត្ថបទ៖ សុខ សុវណ្ណ