អាជ្ញាធរ​ម៉ាឡេស៊ី ស្ទាក់ចាប់​នាវា​ដឹក​ប្រេង​ដែលរត់​គេច ក្រោយ​បុក​គ្នានាវា​សិង្ហបុរី​

​សមត្ថកិច្ច​ម៉ាឡេស៊ី បានស្ទាក់ចាប់នាវាដឹកប្រេងដ៏ធំមួយដែលបិទ​ប្រព័ន្ធតាមដាន និង​ ព្យាយាមបើក​រត់គេច បន្ទាប់ពីបុកគ្នាជាមួយកប៉ាល់មួយទៀត។ យោ​ង​ការចេញផ្សាយរបស់សារព័ត៌មាន BBC នៅថ្ងៃទី ២២ ខែ​កក្កដា។​

ឆ្មាំឆ្នេរសមុទ្រសមុទ្រម៉ាឡើស៊ីបានកំណត់ទីតាំង និងស្ទាក់ចាប់នាវាដឹកប្រេង ដែល​មាន​ឈ្មោះ​ថា​ Ceres I ដែលពាក់​ទង់ជាតិ Sao Tome និង Príncipe ដោយប្រើទូកពីរអូសនាវានេះចេញពីឆ្នេរសមុទ្រភាគខាងកើតរបស់ប្រទេស​ម៉ាឡេស៊ី ខណៈនាវានេះបានបុកជាមួយកប៉ាល់ Hafnia Nile ដែល​មាន​បំពាក់​ទង់ជាតិសិង្ហបុរីកាលពីថ្ងៃសុក្រ បណ្តាល​ឱ្យមានការឆាបឆេះនិងរងរបួសសមាជិកនាវិក​យ៉ាងតិច​​ពីរនាក់។

អាជ្ញាធរដែនសមុទ្រ និងកំពង់ផែសិង្ហបុរី (MPA) បានឲ្យដឹងថា សមាជិកនាវិកទាំងអស់ពីកប៉ាល់និងនាវាត្រូវបានជួយសង្គ្រោះ ប៉ុន្តែនាវា Ceres I បានចាកចេញពីទីតាំងកើត​ហេតុ​​ភ្លាមៗ បន្ទាប់ពីការប៉ះទង្គិចគ្នា។​

ឧបទ្ទវហេតុនេះបានកើតឡើងប្រហែល៥៥គីឡូម៉ែត្រភាគឦសាននៃកោះ Pedra Branca ប្រទេសសិង្ហបុរី។ មូលហេតុដែលនាវាដឹកប្រេងដែលមានទង់ជាតិ Sao Tome និង Príncipe ព្យាយាមគេចចេញនិងមូល​ហេតុ​នៃ​ការ​ប៉ះ​ទង្គិច​គ្នា​នៅ​មិន​ទាន់ដឹង​ច្បាស់​នៅ​ឡើយ​ទេ ដោយការស៊ើបអង្កេតបន្ថែមទៀតកំពុងត្រូវបានអនុវត្ត។

ចំណែកមូលហេតុដែលបណ្ដាលឲ្យមានការឆាបឆេះគឺបណ្ដាលមកពីកប៉ាល់Hafnia Nile ដែលមានទង់ជាតិសឹង្ហបុរី មានផ្ទុក naphtha ដែលជាប្រភេទប្រេងឥន្ធនៈដែលងាយឆេះខ្លាំង។ អាជ្ញាធរដែនសមុទ្រសិង្ហបុរីបានឲ្យដឹងថាមិនមានផលប៉ះពាល់អ្វីឡើយ តែទោះយ៉ាងណាក៏ដោយមន្ត្រីឆ្មាំសមុទ្រម៉ាឡេស៊ី បានរកឃើញកំពប់ប្រេង គ្របដណ្តប់ជុំវិញ ១៧ គីឡូម៉ែត្រក្រឡាពីកន្លែងប៉ះទង្គិចគ្នា។

គួរបញ្ជាក់ផងដែរថា នាវា Ceres I គឺជានាវាដឹក​ប្រេង​ឆៅ​ដ៏​ធំ​មួយ​ដែល​​ផ្ទុកលើស​ចំណុះ ខណៈរបាយការណ៍មួយចំនួនបានបង្ហាញថា វាអាចជាកងនាវាងងឹតដែលដឹកប្រេងពីប្រទេសដែលស្ថិតនៅក្រោមការដាក់ទណ្ឌកម្ម៕

អត្ថបទ៖ ប៊ុន សុភាព