ព័ត៌មានអន្ដរជាតិ

មុនលោក បៃដិន ប្រធានាធិបតីអាមេរិក២រូបក៏ធ្លាប់មិនឈរឈ្មោះសម្រាប់អាណត្តិបន្តដែរ

បានផុស

៦ ខែ មុន

នៅ

ថ្ងៃចន្ទ ២២ កក្កដា ២០២៤

ដោយ

Chheang

លោក ចូ បៃដិន បានក្លាយជាប្រធានាធិបតីទី៣ នៅក្នុងប្រវត្តិសាស្ត្រសហរដ្ឋអាមេរិក ដែលបានដកខ្លួនចេញពីការប្រកួតប្រជែងជាបេក្ខភាពឈរឈ្មោះសម្រាប់អាណត្តិទី២ បន្ទាប់ពីកើតមានបញ្ហាជាហូរហែពាក់ព័ន្ធនឹងសុខភាព និងសមត្ថភាពរបស់មេដឹកនាំវ័យ៨១ឆ្នាំរូបនេះ ក្រោយលោកបានចាញ់យ៉ាងអាម៉ាសនៅក្នុងការជជែកដេញដោលជាមួយលោក ដូណាល់ ត្រាំ ដែលជាបេក្ខភាពមកពីគណបក្សសាធារណរដ្ឋ កាលពីថ្ងៃទី២៧ ខែមិថុនាកន្លងទៅ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

នៅក្នុងរយៈពេល៧៥ឆ្នាំកន្លងទៅ មុនលោក បៃដិន ធ្លាប់មានប្រធានាធិបតីអាមេរិក២រូប ដែលធ្លាប់បោះបង់ការឈរឈ្មោះជាលើកទី២ បន្ទាប់ពីទទួលជោគជ័យនៅក្នុងអាណត្តិទី១របស់ពួកគេ។ អតីតមេដឹកនាំទាំង២ មានលោក Harry S. Truman និងលោក Lyndon B. Johnson។ លោក Truman បញ្ចប់ការឈរឈ្មោះរបស់លោកនៅក្នុងខែមីនា ឆ្នាំ១៩៥២ ខណៈលោក Johnson គឺនៅខែមីនា ឆ្នាំ១៩៦៨។ មូលហេតុចម្បងដែលគេដឹងថាអ្នកទាំង២មិនព្រមប្រកួតប្រជែងតំណែងជាប្រធានាធិបតីសាជាថ្មី ក៏ព្រោះតែបញ្ហាមិនអាចបញ្ចប់សង្គ្រាមរ៉ាំរ៉ៃចំនួន២។ សម្រាប់លោក Truman នោះគឺជាសង្គ្រាមនៅឧបទ្វីបកូរ៉េ ហើយចំពោះលោក Johnson វិញគឺពាក់ព័ន្ធនឹងសង្គ្រាមនៅវៀតណាម។

លោក Harry S. Truman (ឆ្វេង) និងលោក Lyndon B. Johnson (ស្ដាំ)/ រូបភាព៖ AP

អ្វីដែលគួរឲ្យកត់សម្គាល់ ទាំងលោក បៃដិន លោក Truman និងលោក Johnson សុទ្ធតែជាសមាជិករបស់គណបក្សប្រជាធិបតេយ្យ។ មួយវិញទៀត ក្រោយការបោះបង់ការឈរឈ្មោះរបស់លោក Truman និងលោក Johnson គណបក្សប្រជាធិបតេយ្យបានចាញ់ការបោះឆ្នោតថ្នាក់ជាតិទាំង២លើក ហើយតំណែងប្រធានាធិបតីត្រូវបានរបូតទៅលើបេក្ខភាពមកពីគណបក្សសាធារណរដ្ឋ ដែលមានដូចជា លោក Dwight D. Eisenhower ប្រធានាធិបតីអាមេរិកទី៣៤ និងលោក Richard Nixon ប្រធានាធិបតីអាមេរិកទី៣៧៕

ដោយ៖ ឈាង