ព្យុះព្រះភិរុណ បង្កការបំផ្លិចបំផ្លាញនៅភាគខាងជើង ប្រទេសវៀតណាម

តាមការចុះផ្សាយរបស់ VN Express នៅថ្ងៃអង្គារទី២៣ ខែកក្កដា ឆ្នាំ២០២៤, ព្យុះព្រះពិរុណ កំពុងវាយប្រហារខេត្ត Quang Ninh ភាគខាងជើងប្រទេសវៀតណាម ដោយបណ្តាលឲ្យមានភ្លៀងធ្លាក់ខ្លាំង និងបំណាក់ដី ព្រមទាំងបង្កការបំផ្លិចបំផ្លាញ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ព្យុះនេះវាយប្រហារនៅ Quang Ninh នាវេលាម៉ោង ៦:៣០នាទីព្រឹក ហើយសូម្បីទីក្រុង ហាណូយ ព្រមទាំងខេត្តជិតនោះដូចជា Thai Binh និង Nam Dinh ក៏រងគ្រោះដោយភ្លៀងធ្លាក់យ៉ាងគំហុកផងដែរ។

ឥទ្ធិពលព្យុះនេះ បានបង្កជាទឹកជំនន់តាមដងផ្លូវ ព្រមទាំងបោកបំបាក់ដើមឈើទៀតផង ជាហេតុបណ្តាលឲ្យមានការកកស្ទះចរាចរណ៍នៅតាមផ្លូវមួយចំនួន។

ស្របពេលជាមួយគ្នានោះ មជ្ឈមណ្ឌលឧតុនិយមវៀតណាមបានឲ្យដឹងថា ព្យុះ ព្រះភិរុណ បានបណ្តាលឲ្យមានខ្យល់ខ្លាំងចន្លោះពី៨៩ទៅ១០២គីឡូម៉ែត្រក្នុងមួយម៉ោង នៅលើកោះ Bach Long Vi ក្នុងឈូងសមុទ្រតុងកឹងហើយដោយសារឥទ្ធិពលរបស់វា ទីក្រុង Hai Phong និង Quang Ninh ដែលមានឆ្នេរនិងកោះល្បីៗ បានសម្រេចចិត្ត ផ្អាកសេវាកម្មកប៉ាល់ទេសចរណ៍សិន ដោយសារស្ថានភាពមិនសូវស្រួល។

មិនត្រឹមប៉ុណ្ណឹង អាជ្ញាធរក្រុង Hai Phong ក៏ប្រកាសបិទសាលារៀន និងអាជីវកម្មមួយចំនួនផងដែរ ដើម្បីបង្ការកុំឲ្យគ្រោះថ្នាក់ណាមួយកើតឡើង។

ទោះបីជាយ៉ាងណាក៏ដោយ គិតមកត្រឹមពេលនេះ មិនទាន់មានរបាយការណ៍អំពីជនរងគ្រោះណាម្នាក់នោះទេ។

សូមបញ្ជាក់ថា ព្រះភិរុណ គឺ​ជា​ព្យុះ​ធំ​ទី​ពីរ​នៅ​សមុទ្រ​ចិន​ខាង​ត្បូង​ក្នុង​ឆ្នាំ​នេះ បន្ទាប់​ពី​ព្យុះ​ទី​មួយ ដែលបក់បោក​កាល​ពី​ខែ​ឧសភា ហើយទីភ្នាក់ងារឧតុនិយមវៀតណាម បានចេញការព្រមានថា ឆ្នាំនេះ នឹងមានព្យុះពី១១ទៅ១៣ កកើតក្នុងសមុទ្រចិនខាងត្បូង ខណៈក្នុងនោះ នឹងមានចន្លោះពី ៥ទៅ ៧ ដែលអាចវាយប្រហារដីគោកវៀតណាម៕

អត្ថបទ៖ សុខ សុវណ្ណ

ចុចអាន៖ ឥទ្ធិពលព្យុះព្រះពិរុណ និងព្យុះហ្សាម នឹងធ្វើឲ្យកម្ពុជាបន្តមានភ្លៀងធ្លាក់លាយឡំជាមួយខ្យល់កន្ត្រាក់ដល់ថ្ងៃទី២៤កក្កដា