ព័ត៌មានអន្ដរជាតិ

មួយប៉ប្រិចភ្នែក ហារីស បូមលុយហូរដូចទឹក ចូលបក្សប្រជាធិបតេយ្យ បង្កើតប្រវត្តិសាស្រ្តអាមេរិក

បានផុស

៦ ខែ មុន

នៅ

ថ្ងៃអង្គារ ២៣ កក្កដា ២០២៤

ដោយ

តាមការចុះផ្សាយរបស់ BBC នៅថ្ងៃអង្គារទី២៣ ខែកក្កដា ឆ្នាំ២០២៤ គ្រាន់តែលោក ចូ បៃដិន សម្រេចចិត្តដកបេក្ខភាពលែងឈរឈ្មោះបោះឆ្នោតភ្លាម ស្រាប់តែគណបក្សប្រជាធិបតេយ្យទទួលបានលុយបរិច្ចាគ ហូរចូលដូចទឹក ពោលគឺមួយថ្ងៃ លោកស្រី កាម៉ាឡា ហារីស រៃអង្គាសបានប្រាក់ ៨១លានដុល្លារ ដែលមិនធ្លាប់មានសោះក្នុងប្រវត្តិសាស្រ្តបោះឆ្នោតរបស់អាមេរិក។

Harris rakes in record $81 million for campaign war chest after Biden steps aside | The Times of Israel — លោកស្រី កាម៉ាឡា ហារីស (រូបថត៖ AP)

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ម្ចាស់ជំនួយដែលដំបូងឡើយដកមូលនិធិចេញ ព្រោះតែមើលឃើញផ្លូវទៅមុខមិនស្រួល បើលោក បៃដិន បន្តឈរឈ្មោះនោះ ស្រាប់តែឥឡូវនេះ ពួកគេបានងាកមកគាំទ្របក្សប្រជាធិបតេយ្យសាជាថ្មី។

គណបក្សប្រជាធិបតេយ្យ រៃអង្គាសបានប្រាក់ជាង២៧,៥លានដុល្លារ ក្នុងរយៈពេល៥ម៉ោងដំបូងនៃយុទ្ធនាការឃោសនាបោះឆ្នោតរបស់លោកស្រី ហារីស ហើយចំនួនទឹកប្រាក់បានហក់ឡើងសឹងតែទ្វេដងគិតត្រឹមពេលល្ងាចថ្ងៃដដែលនោះ។ ចុងក្រោយ បើគិតគ្រប់២៤ម៉ោង ផលបូកនេះបានបំបែកកំណត់ត្រាមិនធ្លាប់មាននៃប្រវត្តិសាស្រ្តរៃអង្គាសប្រាក់សម្រាប់ធ្វើយុទ្ធនាការឃោសនាបោះឆ្នោតប្រធានាធិបតីនៅសហរដ្ឋអាមេរិក។

យោងតាមកាសែត New York Times ប្រាក់បរិច្ចាគហូរចូលដូចទឹកបាក់ទំនប់ក្នុងរយៈពេល២៤ម៉ោងចុងក្រោយនេះ គឺជាចំនួនដ៏ធំបំផុតសម្រាប់ការបរិច្ចាគតាមអ៊ីនធើណិតត្រឹមតែមួយថ្ងៃ សម្រាប់គណបក្សប្រជាធិបតេយ្យ បើគិតចាប់តាំងពីឆ្នាំ២០២០មក ដែលពេលនោះមូលនិធិ ActBlue រៃអង្គាសប្រាក់បាន ៧៣,៥លានដុល្លារ ក្រោយការស្លាប់ចៅក្រមតុលាការកំពូល Ruth Bader Ginsberg។

មូលនិធិថ្មីនេះ ត្រូវបានគេមើលឃើញថា ជាកម្លាំងចលករដ៏សំខាន់មួយសម្រាប់គណបក្សប្រជាធិបតេយ្យ បន្ទាប់ពីមានការបាត់បង់ជំនឿចិត្តចំពោះលោក បៃដិន ដែលធ្វើមិនបានល្អ ក្នុងការជជែកដេញដោលប្រធានាធិបតីកាលពីខែមិថុនា ជាមួយលោក ដូណាល់ ត្រាំ។

សូមបញ្ជាក់ថា បេក្ខភាពរបស់លោកស្រី កាម៉ាឡា ហារីស កំពុងទទួលបានសន្ទុះនៃការគាំទ្រភ្លូកទឹកភ្លូកដីពីសមាជិកបក្សប្រជាធិបតេយ្យ ហើយមិនត្រឹមប៉ុណ្ណឹង តារាល្បីៗរបស់អាមេរិក និងស្រ្តីស្បែកខ្មៅរាប់ម៉ឺននាក់ ក៏ចេញមកគាំទ្រផងដែរ។

កាម៉ាឡា ហារីស គឺជាស្ត្រីជនជាតិស្បែកខ្មៅ ឬអ្នកមានដើមកំណើតអាស៊ីខាងត្បូង ដំបូងគេ ដែលឡើងឋានៈជាអនុប្រធានាធិបតីអាមេរិក ហើយប្រសិនបើលោកស្រី ក្លាយជាបេក្ខនារីដែលនឹងត្រូវតែងតាំងខាងគណបក្សប្រជាធិបតេយ្យ រួចឈានទៅដល់ការផ្តួលលោក ដូណាល់ ត្រាំ ក្នុងការបោះឆ្នោតខែវិច្ឆិកាមែននោះ ហារីស នឹងក្លាយជាស្ត្រីទីមួយដែលកាន់តំណែងជាប្រធានាធិបតីសហរដ្ឋអាមេរិក៕

អត្ថបទ៖ សុខ សុវណ្ណ

ចុចអាន៖ តារាៗ និងស្រ្តីស្បែកខ្មៅអាមេរិក ចេញគាំទ្រលោកស្រី ហារីស ភ្លូកទឹកភ្លូកដី