មើលហើយរន្ធត់! ថតជាប់ស្ដែងៗ និស្សិតបូលីវីប្រមូលផ្តុំគ្នាលើបង្កាន់ដៃជាន់ទី ៤ បាក់ធ្លាក់ស្លាប់ ៧ នាក់

យ៉ាងហោចណាស់និស្សិតមហាវិទ្យាល័យចំនួន ៧ នាក់បានស្លាប់ បន្ទាប់ពីបានធ្លាក់ពីជាន់ទី ៤ នៃអគារសាកលវិទ្យាល័យមួយកន្លែង ។

និស្សិតទាំងនោះត្រូវបានគេថតជាប់ពីការធ្លាក់ចុះស្លាប់ភ្លាមៗនៅឯសាកលវិទ្យាល័យ Public University of El Alto (UPEA) នៅជិតទីក្រុង La Paz ប្រទេសបូលីវី នៅពេលដែលបាក់រនាំងបង្កាន់ដៃសាលា ។

វីដេអូដ៏រន្ធត់នៃគ្រោះថ្នាក់នេះបានបង្ហាញថា ក្រុមនិស្សិតមួយក្រុមធំបានប្រមូលផ្តុំគ្នានៅលើយ៉រសាលាជាន់ទី ៤ និងមានមនុស្សកកកុញនៅពេលដែលរនាំងបង្កាន់ដៃនោះបាក់ ។

យោងតាមការចុះផ្សាយរបស់គេហទំព័រ Mirror បានឲ្យដឹងថា យ៉ាងហោចណាស់មនុស្ស ៨ នាក់បានធ្លាក់ចុះ ហើយ ៧ នាក់បានស្លាប់ភ្លាមៗ ខណៈម្នាក់ទៀតកំពុងស្ថិតក្នុងបន្ទប់សង្គ្រោះបន្ទាន់ ។

សេចក្តីថ្លែងការណ៍របស់សាកលវិទ្យាល័យបានសរសេរថា “សាកលវិទ្យាល័យប្រកាសកាន់ទុក្ខរយៈពេល ៧ ថ្ងៃនៅឯសាកលវិទ្យាល័យ Public University of El Alto (UPEA) ក្នុងហេតុការណ៍នេះ” ។

ឧប្បត្តិហេតុនេះបានកើតឡើងនៅក្នុងអគារវិទ្យាសាស្ត្រហិរញ្ញវត្ថុរបស់សាកលវិទ្យាល័យដែលនិស្សិតត្រូវបានប្រមូលផ្តុំគ្នាដើម្បីចូលរួមសន្និបាតមួយ ៕

សូមទស្សនាវីដេអូ!

ប្រែសម្រួលដោយ ៖ ជីវ័ន្ត

ប្រភព ៖ Mirror