ព័ត៌មានអន្ដរជាតិ

ប្រមុខយោធាមីយ៉ាន់ម៉ាប្រគល់អំណាចឲ្យលោក Min Aung Hlaing ដើម្បីសម្រាកព្យាបាលជំងឺ

បានផុស

២ ខែ មុន

នៅ

ថ្ងៃអង្គារ ២៣ កក្កដា ២០២៤

ដោយ

ប្រធានាធិបតីស្តីទីក្នុងរបបយោធារបស់ប្រទេសមីយ៉ាន់ម៉ា លោក Myint Swe បានឈប់សម្រាកព្យាបាលជំងឺ និងបានផ្ទេរភារកិច្ចរបស់ខ្លួនទៅឱ្យមេទ័ព លោក Min Aung Hlaing ដែលកំពុងកាន់អំណាច។ យោងតាមការចេញផ្សាយរបស់សារព័ត៌មាន Al Jazeera នៅថ្ងៃទី ២៣ ខែ កក្កដានេះ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ការប្រកាសប្រគល់ភារកិច្ចកំពូលនេះបានចាក់ផ្សាយតាមទូរទស្សន៍រដ្ឋរបស់របបសឹកមីយ៉ាន់ម៉ា MRTV ដែលមានខ្លឹមសារថា លោក Min Aung Hlaing បានទទួលលិខិតផ្លូវការមួយពីការិយាល័យប្រធានាធិបតីស្តីទីកាលពីថ្ងៃចន្ទ។លិខិតនេះបានអនុញ្ញាតឱ្យលោកបំពេញភារកិច្ចជាប្រធានាធិបតីស្តីទីដើម្បីដោះស្រាយបញ្ហាដែលទាក់ទងនឹងក្រុមប្រឹក្សាការពារជាតិនិងសន្តិសុខ ខណៈពេលដែលលោក Myint Swe កំពុងសម្រាកព្យាបាលជំងឺ។

ប្រព័ន្ធផ្សព្វផ្សាយរដ្ឋបានរាយការណ៍កាលពីសប្តាហ៍មុនថា ប្រធានាធិបតី Myint Swe អាយុ ៧៣ឆ្នាំបានកើតជំងឺប្រព័ន្ធប្រសាទនិងកង្វះអាហារូបត្ថម្ភ។ ទោះបី លោកបានទទួលការព្យាបាលតាំងពីដើមឆ្នាំនេះក៏ដោយ ក៏លោកនៅតែមិនអាចអនុវត្តសកម្មភាពប្រចាំថ្ងៃធម្មតាបាននោះទេ រួមទាំងការបរិភោគអាហារផងដែរ។

លោក Myint Swe គឺជាអនុប្រធានាធិបតីនៅក្រោមរដ្ឋាភិបាលរបស់លោកស្រី អ៊ុងសាន ស៊ូជី (Aung San Suu Kyi) ហើយក្រោយមកត្រូវបានតែងតាំងជាប្រធានាធិបតីស្តីទីដោយរដ្ឋាភិបាលយោធាក្នុងកាលៈទេសៈដ៏ចម្រូងចម្រាស បន្ទាប់ពីរដ្ឋប្រហារទម្លាក់លោកស្រីស៊ូជីក្នុងខែកុម្ភៈឆ្នាំ ២០២១។ ទោះបីជាលោកគ្រាន់តែជាប្រធានាធិបតីមួយរូបក៏ដោយ ប៉ុន្តែរដ្ឋាភិបាលបានពឹងផ្អែកលើលោកក្នុងការចុះហត្ថលេខាលើក្រឹត្យរបស់រដ្ឋាភិបាល និងផ្តល់នូវភាពស្របច្បាប់នៃការគ្រប់គ្រង ដែលកំពុងតែតស៊ូដើម្បីទប់ស្កាត់សង្គ្រាមស៊ីវិលដែលកំពុងរីករាលដាល និងក៏មានតួនាទីគ្រប់គ្រងសេដ្ឋកិច្ចដែលមិនច្បាស់លាស់នេះ។

លោក Min Aung Hlaing បច្ចុប្បន្នជាប្រធានក្រុមប្រឹក្សាយោធាដែលកំពុងកាន់អំណាច ខណៈលោកបានប្រកាសខ្លួនជានាយករដ្ឋមន្ត្រីប្រាំមួយខែបន្ទាប់ពីការឡើងកាន់អំណាចក្រោយរដ្ឋប្រហារទម្លាក់ លោកស្រី អ៊ុងសាន ស៊ូជី។ ជាមួយគ្នានេះ រដ្ឋាភិបាលរបស់លោក បានប្រកាសពន្យាពេលបោះឆ្នោតម្តងហើយម្តងទៀត ហើយនៅលើកចុងក្រោយ ថាខ្លួននឹងរៀបចំការបោះឆ្នោតថ្មីនៅឆ្នាំ២០២៥ ប៉ុន្តែអ្នករិះគន់និយាយថា ការបោះឆ្នោតនេះនឹងមិនប្រព្រឹត្តិទៅយុត្តិធម៌នោះទេ៕