ជប៉ុន​ប្រកាស​​​ដាក់​ទណ្ឌកម្ម​ជនជាតិ​អ៊ីស្រាអែល​៥​នាក់​បង្កហិង្សា​​

ប្រទេសជប៉ុនបានប្រកាសដាក់ទណ្ឌកម្មបង្កកទ្រព្យសម្បត្តិជនជាតិអ៊ីស្រាអែលដែលរស់នៅលើទឹកដីប៉ាឡេស្ទីន៤នាក់ ជុំវិញអំពើហិង្សាប្រឆាំងនឹងប៉ាឡេស្ទីននៅតំបន់ West Bank។ យោងតាមការចេញផ្សាយរបស់ទូរទស្សន៍ជាតិជប៉ុន NHK កាលពីថ្ងៃទី២៣ខែកក្កដា​នេះ។​

លោក Yoshimasa Hayashi នាយក​ខុទ្ទកាល័យ​គណៈរដ្ឋ​មន្ត្រី​ជប៉ុន បាននិយាយថា សកម្មភាពហិង្សាបង្កដោយជនជាតិអ៊ីស្រាអែលដែលតាំងលំនៅមួយចំនួននៅតំបន់ West Bank បានកើនឡើងយ៉ាងខ្លាំងចាប់តាំងពីខែតុលាឆ្នាំមុន។ លោកបានពន្យល់ថា ក្នុងស្ថានភាពនេះ ជប៉ុនបានពិចារណាលើជំហានដែលធ្វើឡើងដោយប្រទេសសហគមន៍អន្តរជាតិ រួមទាំង G7 ក្នុងការដាក់ទណ្ឌកម្មលើអ៊ីស្រាអែលលើបញ្ហាអំពើហិង្សានានាដែលកើនឡើងនាពេលថ្មីៗនេះ។

ប្រទេសជប៉ុនបានសម្រេចចិត្តដាក់ទណ្ឌកម្មជនជាតិអ៊ីស្រាអែលទាំង៤​នាក់ដែលពាក់ព័ន្ធនឹងអំពើហិង្សាដោយការបង្កកទ្រព្យសម្បត្តិ ដែលនឹងរារាំងសកម្មភាពទូទាត់ប្រាក់ទាំងស្រុងរបស់ជនជាតិអ៊ីស្រាអែលទាំង៤នាក់នេះ។

គួរបញ្ជាក់ផងដែរថា ចក្រភពអង់គ្លេស សហរដ្ឋអាមេរិក និងកាណាដា បានដាក់ទណ្ឌកម្មលើជនជាតិអ៊ីស្រាអែលដែលរស់នៅលើទឹកដីប៉ាឡេស្ទីនមួយចំនួន ជាការឆ្លើយតបទៅនឹងការកើនឡើងនៃអំពើហិង្សានៅតំបន់ West Bank ចំពេលមានសង្រ្គាមរបស់អ៊ីស្រាអែលនៅតំបន់ហ្គាហ្សា ចាប់តាំងពីក្រុមហាម៉ាស់វាយប្រហារកាលពីថ្ងៃទី​៧ខែតុលាមក៕

អត្ថបទ៖ ប៊ុន សុភាព