ព័ត៌មានអន្ដរជាតិ

រដ្ឋមន្ត្រីមហាផ្ទៃថៃបញ្ជាឲ្យមានការស៊ើបអង្កេតរកប្រភពផ្សព្វផ្សាយលក់លិខិតឆ្លងដែននិងសញ្ជាតិ

បានផុស

៥ ខែ មុន

នៅ

ថ្ងៃអង្គារ ២៣ កក្កដា ២០២៤

ដោយ

អាជ្ញាធរប្រទេសថៃបានបញ្ជាឲ្យដោះស្លាកផ្ទាំងប៉ាណូដ៏ធំនៅកណ្តាលទីក្រុងបាងកក ដែលផ្សព្វផ្សាយពីការលក់លិខិតឆ្លងដែននិងសញ្ជាតិថៃ ខណៈដែលប្រទេសថៃកំពុងអនុវត្តគោលនយោបាយលើកស្ទួយវិស័យទេសចរណ៍តាមរយៈការលើកលែងទិដ្ឋាការរយៈពេលវែង។

ផ្ទាំងប៉ាណូដែលផ្សព្វផ្សាយលក់លិខិតឆ្លងដែននិងសញ្ជាតិនៅប្រទេសថៃ។ ST

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

រដ្ឋមន្ត្រីក្រសួងមហាផ្ទៃថៃ លោក Anutin Charnvirakul បានបញ្ជាឲ្យដោះផ្ទាំំងប៉ាណូនោះចេញ ព្រមទាំងអំពាវនាវឱ្យមានការស៊ើបអង្កេតជាបន្ទាន់ ដើម្បីរកប្រភពដើមនៃការដាក់ស្លាកផ្ទាំងប៉ាណូផ្សព្វផ្សាយដែលដាក់លក់លិខិតឆ្លងដែននិងសញ្ជាតិរបស់ប្រទេសថៃ។ យោងតាមការផ្សាយរបស់ស្ថាប័នព័ត៌មាន The Nations នៅថ្ងៃទី២៣ខែកក្កដា។

ផ្ទាំងប៉ាណូដែលគេប្រទះឃើញនៅរង្វង់មូលតំបន់ Huai Khwang ក្នុងទីក្រុងបាងកក ហើយត្រូវបានផ្សព្វផ្សាយនិងចែកចាយយ៉ាងទូលំទូលាយតាមបណ្តាញសង្គម ហើយ តាមការចុះផ្សាយដដែល ផ្ទាំងប៉ាណូនោះត្រូវបានរើចេញអស់ គិតត្រឹមម៉ោងចេញផ្សាយដំណឹងនេះ។

ការស៊ើបអង្កេតជាផ្នែកមួយនៃផែនការរបស់រដ្ឋមន្ត្រីក្រសួងមហាផ្ទៃដើម្បីបង្កើនវិធានការប្រឆាំងបទល្មើសនិងការពារមុខមាត់ប្រទេសនិងទំនុកចិត្តសាធារណៈជន។

អ្នកនាំពាក្យក្រសួងមហាផ្ទៃ លោក Traisulee Traisaranakul បានឱ្យដឹងកាលពីថ្ងៃទី២២ខែកក្កដាដែល លោករដ្ឋមន្ត្រី Anutin បានដឹងតាមរយៈការផុសតាមបណ្តាញសង្គម ដែលបង្ហាញនិងការរិះគន់នូវផ្ទាំងប៉ាណូជាភាសាចិន ដែលបានផ្សព្វផ្សាយ អំពីការលក់លិខិតឆ្លងដែន និងសញ្ជាតិនៃប្រទេសជាច្រើន។

លោក Anutin ដែលជាឧបនាយករដ្ឋមន្ត្រី បានបញ្ជាឱ្យដោះផ្ទាំងប៉ាណូនោះចេញជាបន្ទាន់ និងធ្វើការស៊ើបអង្កេតឱ្យពេញលេញ។ ប្រសិនបើ មានកំហុសត្រូវបានរកឃើញ ការស៊ើបអង្កេតនឹងត្រូវបានធ្វើបន្ថែមដើម្បីបញ្ជាក់និងការដាក់ទោសជនល្មើស៕