បន្ទាប់​ពី​វាយ​ប្រហារ​ហ្វីលីពីន ព្យុះទីហ្វុង Gaemi កំពុង​កើនឥទ្ធិពល​​នៅ​តៃវ៉ាន់

ព្យុះទីហ្វុង Gaemi កំពុងតែវាយប្រហារប្រទេសហ្វីលីពីនជាហេតុនាំឲ្យអាជ្ញាធរផ្អាកជើងហោះហើរ បិទសាលារៀន ទីផ្សារ និងអាជីវកម្មនានា ហើយព្យុះនេះ កំពុងបោះពួយសំដៅទៅកោះតៃវ៉ាន់ ក្នុងល្បឿនយ៉ាងលឿន។ យោង​តាមការចុះផ្សាយរបស់​ Bloomberge នៅថ្ងៃពុធទី២៤ខែកក្កដា​នេះ​។​

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

​ឥទ្ធិពល​ព្យុះទីហ្វុង Gaemi​នៅ​ក្នុង​ប្រទេស​ហ្វីលីពីន​ មាន​កម្លាំង​ខ្យល់បក់​បោក​ខ្លាំង​រហូត​ដល់​​​ល្បឿន​១៥៥គីឡូម៉ែត្រក្នុងមួយម៉ោង ហើយបង្កភ្លៀងធ្លាក់ខ្លាំងបណ្តាល​ឱ្យ​ជន់លិចរដ្ឋធានីម៉ានីល​និងខេត្តភាគខាងជើង​ប្រទេស​​ដែល​សម្បូរ​ដោយ​កោះ​មួយ​នេះ​។

រដ្ឋាភិបាលទីក្រុងម៉ានីល បានដាក់ចេញវិធានការទប់ទល់ជាបន្ទាន់ ហើយថែមទាំងផ្អាកសកម្មភាពធ្វើពាណិជ្ជកម្មសំខាន់ៗផងដែរ។ ទោះបីជាយ៉ាងណាក៏ដោយ ភ្លាមៗនេះ មិនទាន់មានសេចក្តីរាយការណ៍អំពីមនុស្សស្លាប់ឬរងរបួសទេ ហើយអាជ្ញាធរក៏មិនទាន់បង្ហាញទំហំនៃការខូចខាតដោយសារព្យុះនេះដែរ។

ក្រោយថម​ថយ​ឥទ្ធិពល​​នៅ​ហ្វីលីពីន ព្យុះ​​ទីហ្វុង Gaemi កំពុង​បង្កើន​ឥទ្ធិពល​​សំដៅទៅកោះតៃវ៉ាន់ នាំឲ្យទីក្រុងតៃប៉ិ ប្រុងជើងការខ្ពស់ ព្រោះបើតាមការព្យាករ ព្យុះនេះ​នឹងបណ្តាលឲ្យមានភ្លៀងធ្លាក់ខ្លាំង ថែមទាំងខ្យល់កន្ត្រាក់ទៀតផង។

មិនត្រឹមប៉ុណ្ណឹង បើយោងតាមរដ្ឋបាលអាកាសធាតុតៃវ៉ាន់ Gaemi គឺជាព្យុះទីហ្វុងដំបូង​ដែល​មាន​ឥទ្ធិពល​លើ​កោះ​នេះ​ក្នុង​រដូវ​កាល​នេះ ហើយត្រូវបានគេរំពឹងថា នឹងបង្កឲ្យមានបំណាក់ដីនៅតំបន់ឆ្នេរភាគឦសាន ចន្លោះពីថ្ងៃពុធដល់ព្រឹកព្រលឹមថ្ងៃព្រហស្បតិ៍។

ដោយសារតែឥទ្ធិពលនៃព្យុះនេះហើយ ទើបក្រសួងការពារ​ជាតិ​កោះ​តៃវ៉ាន់ ចេញសេចក្តីប្រកាសថា សមយុទ្ធយោធា Han Kuang ដែលគ្រោងរៀបចំនៅសប្តាហ៍នេះ នឹងមិនធ្វើទ្រង់ទ្រាយធំដូចផែនការ​គ្រោង​ទុក​​ទេ ដោយ​​លំហាត់យន្តហោះចម្បាំង​នឹងត្រូវដកចេញវិញ។

លើសពីនេះ តៃវ៉ាន់​ក៏បញ្ជាឲ្យផ្អាកជើងហោះហើរក្នុងស្រុក និងការធ្វើដំណើរតាមកប៉ាល់ផងដែរ ហើយព្រមានដល់ប្រជាជននៅដីគោក ដោយ​ត្រូវមានការប្រុងប្រយ័ត្នខ្ពស់៕

អត្ថបទ៖ សុខ សុវណ្ណ

ចុចអាន៖ ព្យុះព្រះភិរុណ បង្កការបំផ្លិចបំផ្លាញនៅភាគខាងជើង ប្រទេសវៀតណាម